ސެޕްޓެމްބަރ 23 ގައި ރާއްޖޭގައި ބޭއްވި ރިޔާސީ އިންތިޚާބުގައި އިލެކްޝަންސް ކޮމިޝަނުން ވަނީ އޮޅުވާލައި ވޯޓުން "ވައްކަން ކޮށްފައި" ކަމަށް ޕީޕީއެމްގެ ކައުންސިލް މެމްބަރ އަހުމަދު ސިއްދީގު ވިދާޅުވެއްޖެއެވެ.
ސިއްދީގު ވިދާޅުވީ ޕީޕީއެމުން ގެންދަނީ ވޯޓު އޮޅުވާލި މައްސަލައިގައި އިންސާފު ހޯދުމަށް މަސައްކަތް ކުރަމުން ކަމަށެވެ. އެގޮތުން ކޮންމެ ރެއަކު ޕީޕީއެމްގެ އޮފީސް ދޮށަށް އެއްވެތިބެ އިހުތިޖާޖު ކުރުމުގެ މަސައްކަތް ގެންދަނީ ކުރަމުންނެވެ.
އޭނާ ވިދާޅުވީ އިންތިޚާބަށްފަހު ޕީޕީއެމްގެ ލީޑަރޝިޕްގެ ބޭފުޅުންނާއި އެބޭފުޅުންގެ އާއިލާތަކަށް ފުރައްސާރަކޮށް މަރުގެ އިންޒާރުދޭ ކަމަށެވެ. އެހެންނަމަވެސް އެގޮތަށްދޭ އިންޒާރަކުން ލީޑަރޝިޕްގެ އަޒުމެއް ނުގުޑާނެ ކަމަށް ވެސް ވިދާޅުވިއެވެ. "އެމްޑީޕީން ތަގުން ފޮނުވަނީ އިންތިޚާބު ބާތިލްވާނެކަން އެނގޭތީ. ވޯޓުން ވައްކަންކޮށްގެން ވެރިކަމުގައި ނުތިބޭނެވޭނެ،" ސިއްދީގު ވިދާޅުވިއެވެ.
އިލެކްޝަންސް ކޮމިޝަނުން ވިދާޅުވީ ރިޔާސީ އިންތިޚާބުގެ ހުރިހާކަމެއް ވެސް ދިޔައީ ގާނޫނާއި ގަވާއިދުގެ ތެރެއިން އެއްވެސް މައްސަލައެއް ނެތި ކަމަށެވެ. ވޯޓު އޮޅުވާޅުމާއި ރިޝްވަތު ހިފުން ފަދަ އެއްވެސް ކަމެއް ހިނގާފައި ނުވާނެކަމަށާއި ރައްޔިތުން ނިންމި ގޮތް އަޑުއަހައި ކިޔަމަންވާންޖެހޭނެ ކަމަށް ވެސް އިލެކްޝަންސް ކޮމިޝަނުން ވިދާޅުވިއެވެ.
އިންތިޚާބަށްފަހު އިލެކްޝަންސް ކޮމިޝަންގެ ރައީސް އަހުމަދު ޝަރީފް ފިޔަވައި އެހެން މެމްބަރުންވީ ރާއްޖެއިން ބޭރުގައެވެ. ޝަރީފް ވިދާޅުވީ އެބޭފުޅުން ބޭރަށް ވަޑައިގެންނެވީ ލިބެމުންދިޔަ އިންޒާރުތަކަށް ކެތްނުވެގެން ކަމަށެވެ.
