ރައްޔިތުންގެ މަޖިލީހުގެ 12 ދާއިރާއެއްގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ކުރިން ނިންމެވި ނިންމެވުމުން ބަދަލުކޮށް އެ ގޮނޑިތަކުގެ މައްސަލަ ސްޕްރީމް ކޯޓުން ނިންމުމުގެ ފުރުސަތު އިލެކްޝަންސް ކޮމިޝަނުން ސްޕްރީމް ކޯޓަށް ދެއްވައިފިއެވެ.
އިލެކްޝަންސް ކޮމިޝަނުން މިއަދު ކުރައްވާފައިވާ ޓްވީޓެއްގައި ވިދާޅުވެފައިވަނީ "ސްޕްރީމްކޯޓުން ވަކިގޮތެއް ކަނޑައަޅުއްވަންދެން ރައްޔިތުންގެ މަޖިލީހުގެ ބާރަ ދާއިރާއެއްގެ ބައިއިލެކްޝަން ބޭއްވުމަށް އިލެކްޝަންސްކޮމިޝަނުން ކުރިން ނިންމެވި ނިންމެވުން ބާތިލްކޮށް، އެކަން މަޖިލީހަށާއި، ކަމާބެހޭ ފަރާތްތަކަށް އެންގުމަށް ނިންމަވައިފި،" ކަމަށެވެ.
އިލެކްޝަންސް ކޮމިޝަންގެ ރައީސް އަހުމަދު ޝަރީފް އާފަތިހަށް މައުލޫމާތު ދެއްވަމުން ވިދާޅުވީ އެ 12 މެމްބަރުންގެ ތެރެއިން ހަ މެމްބަރުންގެ ގޮނޑި ނުގެއްލޭކަމަށް އެމައްސަލަ އަލުން މުރާޖައަކުރިއިރު އެނގިފައިވާ ކަމަށެވެ.
ބާކީ 6 މެމްބަރުންގެ މައްސަލަ ސްޕްރީމްކޯޓަށް ހުށަހެޅުމުން އެކޯޓަށް އެބަލައިގަނެ މައްސަލަ ކުރިއަށްދާތީ އެ މައްސަލަ ނިމެންދެން އެދާއިރާތަކުގެ ބައިއިލެކްޝަންސް ނުބާއްވަން ނިންމެވީ ކަމަށް ޝަރީފް ވިދާޅުވިއެވެ.
"އެންމެ ފުރަތަމަ ނިންމުމަކީ ޕީޕީއެމްގެ ޓިކެޓްގެ ނޫންގޮތުގައި ހޮވިގެން ޕީޕީއަށް ވަދެތިބި މެމްބަރުން ޕީޕީއެމުން ވަކިކުރީމައި އެމީހުންގެ ގޮނޑި ގެއްލޭނެ ކަމަށް ނިންމި ނިންމުން. އެއީ ސްޕްރީމްކޯޓުގައި ގޮނޑި ގެއްލޭނެ ކަމަށް ނިންމާފައިވާ ނިންމެވުމުގައި ބަޔާންކޮށްފައިވާ ހާލަތްތަކެއް މި ހަ މެމްބަރުންނަށް ތަންފީޒެއް ނުކުރެވޭނެ. ސްޕްރީމްކޯޓުގެ ހުކުމުގައި ވަރަށް ރަނގަޅަށް އެވާހަކަ އެބައޮތް ބުނެފައި. އެ ހަ މެމްބަރުންގެ ގޮނޑި ގެއްލިއްޖެ ކަމަށް އަޅުގަނޑުމެންނަށް ވެސް ގަބޫލެއް ނުކުރެވޭ އަލުން މުރާޖާ ކުރިއިރު،" ޝަރީފް ވިދާޅުވިއެވެ.
"ބާކީ ހަ މެމްބަރުންގެ މައްސަލަ ސްޕްރީމްކޯޓުން ބަލައިގަނެ އެމައްސަލަތައް ހިނގަމުންދާތީ ގާނުނުއަސާސީގައިވާ ހަތްދިހަ ހަތަރުވަނަ މާއްދާގެ ދަށުން ސްޕްރީމްކޯޓަށް ލިބިގެންވާ އިޚްތިޔާރުގެ ދަށުން (ޚިލާފެއް އުފެދިއްޖެ ކަމަށްވާނަމަ) ދެން ގޮތެއް ނިންމާނީ ސްޕްރީމްކޯޓުންނޭ ވީދާޅުވުމުން އެ މައްސަލަ އަލުން މުރާޖައާ ކޮށްފައި އިލެކްޝަންސް ކޮމިޝަނުން މިނިންމީ (ޖުލައިމަހުގައި މިކޮޅުން ނިންމާފައިއޮތް އެދާއިރާތަކުގެ ބައިއިލެކްޝަންސް) ބޭއްވުމަށް ނިންމާފައިއޮތް ނިންމުން ބާތިލް ކުރަން. އެކަން މިކުރީ،" ޝަރީފް ވިދާޅުވިއެވެ.
ޝަރީފް ވިދާޅުވީ އެގޮތަށް ނިންމެވީ ސްޕްރީމްކޯޓުން އެމައްސަލަ ބެއްލެވުމަށްފަހު އެބޭފުޅުންގެ ގޮނޑި ގެއްލިއްޖެކަން ނުވަތަ ނުގެއްލޭކަން އަންގަންދެން ކަމަށެވެ. "ގޮނޑި ގެއްލިއްޖެކަން އަންގައިފިނަމަ ގާނޫނުގައި އޮންނަ ގޮތަށް އަޅުގަނޑުމެން އެދާއިރާތަކުގެ ބައިއިލެކްޝަނާގެން ކުރިއަށްދާނަން،" ޝަރީފް ވިދާޅުވިއެވެ.
