މާލެއަތޮޅުގައި އޮންނަ އަނަންތަރާ ދިގުފިނޮޅު ރިސޯޓުގެ ހުޅަނގު ފަރާތުގައި އޮންނަ ގިރިއަކަށް ޑައިވިން ދޯންޏެއް އަރައިފިއެވެ.
ފަތުރުވެރިން ގޮވައިގެން ދަތުރުކުރި "އަމިސް ޑެސް މޯލްޑިވްސް" ނަމަކަށް ކިޔާ ޑައިވިންގ ދޯނި ފަރަށް އެރުމުން ދޯނީގެ ވެރިފަރާތާ ގުޅިގެން އެމްއެންޑީއެފް މާލޭ އޭރިއާ ކޯސްޓްގާޑު ސްކޮޑްރަންއިން ގެންދަނީ ދޯނި ފުންކުރުމުގެ މަސައްކަތް ކުރަމުންނެވެ.
މި ހާދިސާގެ މަޢުލޫމާތު އެމްއެންޑީއެފް ކޯސްޓްގާޑު މެރިޓައިމް ރެސްކިޔު ކޯޑިނޭޝަން ސެންޓަރ (އެމްއާރުސީސީ) އަށް ލިބިފައިވަނީ މިރޭ 19:19 އެހައިކަންހާއިރުއެވެ. ހާދިސާގެ ރިޕޯޓް ލިބުމާ ގުޅިގެން އެމްއެންޑީއެފް މާލޭ އޭރިއާ ކޯސްޓްގާޑު ލޯންޗެއްގައި ސިފައިން ވަނީ އެސަރަޙައްދަށް ގޮސް، ހަރަކާތްތެރިވާން ފަށާފައެވެ.
މި ހާދިސާ ހިނގިއިރު، އެ ދޯނީގައި 24 ފަތުރުވެރިންނާއި 6 ފަޅުވެރިން ތިއްބެވެ. އޭގައި ތިބި ފަތުރުވެރިންވަނީ އެ ޑައިވިންގ ދޯނި ދުއްވަމުންދާ "މޯލްޑިވިއަން ޑްރީމް ޓޫ" ނަމަކަށް ކިޔާ ސަފާރީއަށް މިރޭ 19:52 އެހައިކަންހާއިރު ނަގައިފައެވެ. މި ހާދިސާއާ ގުޅިގެން އެއްވެސް މީހަކަށް ގެއްލުން ވެފައެއް ނުވެއެވެ.
