ފަލަސްޠީނު ރެފިއުޖީންގެ ކަންތައް ބަލަހައްޓާ އދ. ގެ އިދާރާ، ޔުނައިޓެޑް ނޭޝަންސް ރިލީފް އެންޑް ވާކްސް އެޖެންސީ ފޯ ޕެލެސްޓައިން ރެފިއުޖީސް އިން ދަ ނިއަރ އީސްޓް (އަންރުވާ) އަށް އިތުރު 46 މިލިއަން އެމެރިކާ ޑޮލަރުގެ އެހީ ދޭން ނިންމިކަން ޔޫރަޕިއަން ޔުނިއަން (އީޔޫ) އިން އިއްޔެ ނިންމައިފިއެވެ. އީޔޫން ބުނި ގޮތުގައި މި އެހީ ދިނީ އެ އިދާރާގެ މިއަަހަރުގެ ބަޖެޓުގެ 217 މިލިއަން ޑޮލަރުގެ ދަރަނި ކުޑަ ކުރުމަށެވެ.
އަންރުވާއަށް ބަޖެޓުގެ ދަރަނި ކުރިމަތިވީ އެމެރިކާއިން ދޭ 350 މިލިއަން ޑޮލަރުގެ އެހީ ކަނޑާލުމުންނެވެ. އެމެރިކާއިން ދޭ އެހީ މި ސެޕްޓެންބަރު މަހުން ފެށިގެން އެމެރިކާން އިން ވަނީ ކަނޑާލާފައެވެ. އަންރުވާގެ 1.1 ބިލިއަން ޑޮލަރުގެ އަހަރީ ބަޖެޓުގެ ތިންބައިކުޅަ އެއްބައި ކުރިން ދެމުން އައީ އެމެރިކާއިންނެވެ.
ރައީސު ޓްރަމްޕު ފަލަސްޠީނުގެ ރެފިއުޖީންނާމެދު އެމެރިކާއިން ދެކޭ ގޮތް ބަދަލުކުރައްވައި، އެތައް މިލިއަން ރެފިއުޖީންނަކީ ރެފިއުޖީން ނޫންކަމަށް އެމެރިކާއިން ވަނީ ކަނޑައަޅާފައެވެ. އަންރުވާއިން 5 މިލިއަން ފަލަސްޠީނު މީހުންނަކީ ރެފިއުޖީންކަމުގައި ބަލާއިރު، ޓްރަމްޕުގެ ސަރުކާރުން ބޭނުންވަނީ އެއަދަދު 7 ލައްކައެެއްހާ މީހުންނަށް މަދުކޮށްލާށެވެ. މި މައްސަލައިގައި އެމެެރިކާއިން އަންރުވާއަށް ދޭ އެހީ މުޅިން ކަނޑާލުމުން އެހެން ބައެެއް ގައުމުތަކުން އަންރުވާއަށް ދޭ އެހީ އިތުރުކުރާނެ ކަމުގެ ވައުދު ވިއެވެ.
އެމެރިކާއިން އަންރުވާ އަށް ދޭ އެހީ ކަނޑާލުމުން، އެ އިދާރާގެ 135 މުވައްޒަފުން ކަނޑާލައި، 584 މުވައްޒަފުން ޕާޓްޓައިމް މުވައްޒަފުންނަށް ބަދަލުކުރަން ޖެހުނެވެ. އަދި މިކަމާ ހިތް ހަމަނުޖެހިގެން ޣައްޒާގައި ތިބޭ އެއިދާރާގެ މުވައްޒަފުން ވަނީ އިހުތިޖާޖުވެސް ކޮށްފައެވެ.
އެމެރިކާ ފިޔަވައި އަންރުވާއަށް އެންމެ ބޮޑު އެއީއެއް ދެމުން އަންނަނީ އީޔޫއާއި، ސައޫދީ އަބިއްޔާއާއި، ޖަރުމަނާއި، އިނގިރޭސިވިލާތުންނެވެ. އެމެރިކާއިން ދޭ އެހީ ކަނޑާލުމުން އަންރުވާގެ ސެކްރެޓަރީ ޖެނެރަލް ޕިޔާ ކްރޭންބުލް އިތުރު އެހީއަށް އެދި ގައުމުތަކަށް އިލްތިމާސް ކުރެއްވިއެވެ. މި އިލްތިމާސަށް އެންމެ ފުރުތަމަ އިޖާބަދިން ބެލްޖިއަމުން ވަނީ 23 މިލިއަން އެމެރިކާ ޑޮލަރުގެ އެހީ ދީފައެވެ.
ޖަރުމަނުންވެސް އިތުރު އެހީ ދޭނެކަމަށް ވައުދުވެފައި ވީ ނަމަވެސް އަދި އެއެހީ ދީފައި ނުވެއެެވެ.
