އެމަނިކުފާނަކީ ވަރަށް ބޮޑަށް ވަތޮނީ އުސޫލުތަކެއް ގެންގުޅުއްވާ ބޭފުޅެއް ކަމަށާއި އަބަދުވެސް ގެންގުޅުއްވާނީ ވަތޮނީ އުސޫލު ކަމަށާއި ނިމިދިޔަ ރިޔާސީ އިންތިޚާބުން އެމަނިކުފާނު ދެވަނަ ދައުރަކަށް އިންތިޚާބު ކުރުމަށް ރައްޔިތުންގެ އަޣްލަބިއްޔަތު ނުދިނުމަކީ އެމަނިކުފާނު ގެންގުޅުއްވާ ވަތޮނީ އުސޫލުތައް ގަބޫލު ނުކުރެވިގެން ދިން އަދަބެއް ކަމުގައިވާނަމަ ރައްޔިތުން ދިން އެ އަދަބު ގަބޫލުފުޅު ކުރައްވާ ކަމަށް ރައީސް އަބްދުﷲ ޔާމީން މިރޭ ވިދާޅުވެއްޖެއެވެ.
ޕީޕީއެމްގެ ޚާއްސަ ކޮންގްރެސްގައި ޕީޕީއެމްގެ ރައީސް ކަމަށް ހޮވިވަޑައިގަތުމުން ފުރަތަމަ ފަހަރަށް ސަޕޯޓަރުންގެ ކުރިމައްޗަށް ވަޑައިގެން ވާހަކަފުޅު ދައްކަވަމުން ރައީސް ޔާމީން މިރޭ ވިދާޅުވީ އެމަނިކުފާނަށްވެސް އިންތިޚާބުގައި ބަޔަކާއެކު ކޯލިޝަން ހެދުނީސް ކަމަށާއި އެކަމަށް ބަޔަކާއެކު އިށީދެވުނީސް ކަމަށެވެ. ނަމަވެސް އެމަނިކުފާނު ގަބޫލުފުޅު ކުރައްވާ އުސޫލުތަކުގައި ހިފަހައްޓަވާނެ ކަމަށާއި އަދި ކުރިޔަށް އޮތްތަނުގައިވެސް އެއުސޫލު ތަކުގައި ހިފަހައްޓަވާނެ ކަމަށް ވިދާޅުވިއެވެ. ވިދާޅުވީ ގެންގުޅުއްވާ އުސޫލުތަކާ ދެކޮޅަށް މަސައްކަތް ކުރައްވަން އުދަނގޫފުޅު ކަމަށެވެ.
ރައީސް ވިދާޅުވީ އެމަނިކުފާނު ގެންގުޅުއްވާ ވަތޮނީ އުސޫލުގެ ތެރެއިން އެންމެ އިސްކަންދެއްވި އުސޫލަކީ އިސްލާމް ދީނަށް ލޯބި ކުރުން ކަމަށާއި ރާއްޖޭގައި އިސްލާމީ ކަންކަމަށް މިހާބޮޑަށް އިސްކަންދިން ސަރުކާރެއް އައިސްފައި ނުވާނެ ކަމަށެވެ. މީގެއިތުރުން ގެންގުޅުއްވި އަނެއް އުސޫލަކީ ރާއްޖޭގެ ކަންކަން ނިންމުމުގައި ބޭރުގެ ފަރާތްތަކުން ނުބެހޭ އުސޫލު ކަމަށް ވިދާޅުވިއެވެ. އަދި ސިޔާސީ ގޮތުން ހިޔާލު ތަފާތު ވުމަކީ އަނެކާއަށް ޖިސްމާނީގޮތުން އަނިޔާ ދިނުމާއި ފުރައްސާރަ ކުރަންޖެހޭ ކަންކަން ކަމަށް ގަބޫލުކުރާ އުސޫލަކީ އެމަނިކުފާނު ގެންގުޅުއްވާނެ އުސޫލެއް ނޫން ކަމަށް ވިދާޅުވިއެވެ.
ރައީސް ވިދާޅުވީ ރާއްޖޭގެ މަސްލަހަތު ހިފަހައްޓައި މުޖުތަމައުގައި އޮތް ނާމާންކަން ފޮހެލައްވައި އަމާން ތަނަކަށް ރާއްޖެ ހެދުމަށް މަސައްކަތް ކުރަމުން ދިޔައީ އަދި ތަހުޒީބީ މުޖުތަމައަކަށްވެސް އެމަނިކުފާނު ބާރު އެޅުއްވި ކަމަށެވެ. ނަމަވެސް މިހުރިހާ ކަމަކަށް ރައްޔިތުން ނޫނެކޭ ބުނީ ސިޔާސީ ހަތަރު ފަސް ލީޑަރުން ޖަލުގައި ތިއްބެވުމުންތޯވެސް ސުވާލު ކުރެއްވެވިއެވެ.
