މިމަހުގެ 23 ވަނަ ދުވަހު ބޭއްވި ރިޔާސީ އިންތިޚާބަށް ފަހު ސަތޭކަ ފަހަރު މަރުގެ އިންޒާރު ލިބިވަޑައިގެންފައިވާ ކަމަށް ރައީސުލްޖުމްހޫރިއްޔާގެ އޮފީހުގެ ލީގަލް މިނިސްޓަރު އަދި ކުރީގެ ބަންޑާރަ ނައިބު އައިޝަތު އާޒިމާ ޝުކޫރު ވިދާޅުވެއްޖެއެވެ.
އަމިއްލަފުޅު ފޭސްބުކުގައި އެކަމަނާ ވަނީ އެފަދަ ކަންކަމަކީވެސް ޑިމޮކަރްސީތޯ އަދި ބޭރު ދުނިޔެއަށްވެސް އެކަންކަން ރަނގަޅުތޯ ސުވާލު ސުވާލު އުފައްދަވާފައެވެ. އިންތިޚާބުގެ ނަތީޖާ ބާތިލު ކުރުމަށް ގާނޫނީ ގޮތުން އެންމެ އިސްރޯލެއް ކުޅުއްވަނީ އާޒިމާ ކަމަށާއި އިއްޔެ އެކަމާ އާޒިމާ ހައިކޯޓަށް ވަޑައިގެންނެވި ކަމުގެ ޚަބަރު ތަކެއްވެސް އިވިގެން ދިޔައެވެ.
އެކަމާ އާޒިމާ ވިދާޅުވީ އިންތިޚާބު ބާތިލު ކުރަން އެދެން ކޯޓަށް ވަޑައިނުގަންނަވާ ކަމަށާއި ހުންނެވީ ގޭގައި ކަމަށެވެ. ނަމަވެސް އެ ޚަބަރަށް ފަހު ބަޔެއް މީހުން އާޒިމާގެ ކާރުގެ ރަޖިސްޓްރީ ނަންބަރު ދިނުމަށް އެދިފައިވާ ކަމަށްވެސް ވިދާޅުވިއެވެ.
މަރުގެ 100 އިންޒާރު އައި ނަމަވެސް އެކަންކަން ފުލުހުންގެ ސަމާލު ކަމަށް ގެންނަވައި މައްސަލަ ހުށަހެޅުއްވިކަން ނުވަތަ ނޫންކަން އާޒިމާ އަދި ކަށަވަރުކޮށް ނުދެއްވައެވެ.
