މިމަހުގެ 23 ވަނަ ދުވަހު ރާއްޖޭގައި ބޭއްވުނު ރިޔާސީ އިންތިޚާބު ކާމިޔާބު އިދިކޮޅު ރިޔާސީ ކެންޑިޑޭޓް އިބްރާހިމް މުޙަންމަދު ސޯލިޙް ކާމިޔާބު ކުރައްވާފައިވާތީ ސަރުކާރު ބަދަލު ކުރުމުގެ ކަންކަން އަމާންކަމާއެކު ކުރިޔަށް ގެންދިޔުމަށް ދިވެހި ސިފައިންގެ އެހީތެރިކަން ލިބޭނެ ކަމަށް ޑިފެންސް މިނިސްޓަރ އާދަމް ޝަރީފް އުމަރު ވިދާޅުވެއްޖެއެވެ.
އަމިއްލަފުޅު ފޭސްބުކުގައި މިނިސްޓަރު ވިދާޅުވީ ރިޔާސީ އިންތިޚާބުގެ ވަގުތީ ނަތީޖާއަށް ފަހުވެސް ރާއްޖޭގެ އަމާންކަން ބެލެހެއްޓުމުގައި ސިފައިން ހަރަކާތްތެރިވަމުންދާނީ ޕްރޮފެޝަނަލް ކަމާއެކު ކަމަށެވެ. ޝަރީފް ވިދާޅުވީ ރައްޔިތުން ކަންބޮޑުވާ ކޮންމެ ކަމެއްގައިވެސް ދިވެހި ސިފައިން ތިބޭނީ ރައްޔިތުންނާއެކު ކަމަށާއި ގާނޫނީ ގޮތުން އުފެދޭ ސަރުކާރެއް ދެމެހެއްޓުމަކީވެސް ދިވެހި ސިފައިންގެ ގާނޫނީ ވާޖިބެއް ކަމަށެވެ.
ޑިފެންސް މިނިސްޓަރު މިފަދައިން ވިދާޅުވިއިރު ދިވެހި އަސްކަރިއްޔާއިންނާއި ފުލުހުންގެ މުއައްސަސާގެ އެހެން ވެރިންވެސް ވަނީ އިންތިޚާބުގައި ރައްޔިތުން ނިންމި ނިންމުން ދަމަހައްޓާނެ ކަމަށް ބުނެފައެވެ. ސިފައިންނާއި ފުލުހުން މިފަދައިން ބުނެފައި ވަނީ އިންތިޚާބުގެ ނަތީޖާ ބާތިލު ކުރަން ވެރިކަންކުރާ ޕީޕީއެމުން މަސައްކަތް ކުރަން އުޅޭ ކަމަށް އަޑު ފެތުރިގެންދިޔަ ވަގުތަކުއެވެ.
ޕީޕީއެމުންވެސް ބުނެފައި ވަނީ އިންތިޚާބާބެހޭ ހިތްހަމަނުޖުންތަކެއް ހުރުމުން އެކަންކަން ބަލައިދިނުމަށް އެދި އިލެކްޝަން ކޮމިޝަނަށް އެޕާޓީން ހުށަހެޅާފައިވާނެ ކަމަށާއި ނަމަވެސް އިންތިޚާބު ބާތިލު ކުރަން، ނުވަތަ ދާއިމީ ނަތީޖާ އިއުލާނު ކުރުން ފަސްކުރަން އެއްވެސް މުއައްސަސާއަކަށް އެޕާޓީން ހުށަހަޅާފައި ނޯންނާނެ ކަމަށެވެ.
