ހުޅުމާލޭގައި އާސަންދަ ކުންފުނިން ހިންގަމުން އަންނަ ހުޅުމާލޭ ހޮސްޕިޓަލުގައި އެމްއާރުއައި މެޝިން ބަހައްޓައި ޚިދުމަތްދޭން ތައްޔާރުވެއްޖެއެވެ. އެ ޚިދުމަތް ފެށުމަށް ތައްޔާރުވެފައިވާތީ ރެޑިއޮލޮޖީ ޑިޕާޓްމެންޓަށް ގެނެވިފައިވާ ބަދަލުތައް މިއަދުވަނީ މީޑިއާއަށް ދައްކާލައިފައި ކަމަށް އާސަންދައިން ވިދާޅުވިއެވެ.
ހުޅުމާޅޭ ހޮސްޕިޓަލަކީ 2004 ވަނަ އަހަރުން ފެށިގެން ޚިދުމަތްދެމުން ގެންދާ ހޮސްޕިޓަލެކެވެ. އޭރުން ފެށިގެން ޚިދުމަތް ފަށައި 2013 ވަނަ އަހަރާ ހަމައަށްއައިރުވެސް އެތަނުން ލިބެމުން އައިސްފައިވަނީ ވަރަށް އާދައިގެން ޚިދުމަތްތަކެކެވެ. އެހެންނަމަވެސް މިސަރުކާރުން ވަނީ ކުރިން ނުލިބޭ އެތައް ސްޕެޝަލިސްޓް ޚިދުމަތްތަކެއް ތައާރަފް ކޮށްފައި ކަމަށް އާސަންދައިން ވިދާޅުވިއެވެ. އޭގެ ތެރޭގައި ކެންސަރު ބަލި ދަނެގަނެ އެބައްޔަށް ފަރުވާކުރުމަށް އޮންކޮލޮޖީ ސެންޓަރެއްވަނީ ގާއިމް ކުރައްވައިފައެވެ. އަދި ރެޑިއޯލޮޖީން އާ ޚިދުމަތްތަކެއްވަނީ ތައާރަފްކޮށްފައެވެ.
އެމްއާރުއައިގެ ޚިދުމަތް ފެށުމަށް އެތަން ތައްޔާރުވެފައިވާއިރު ސިޓީސްކޭނާއި މެމޮގްރާމްގެ ޚިދުމަތް ކުރިއަށްއޮތް ދެމަސްތެރޭގައި ލިބިގެންދާނެ ކަމަށްވެސް އާސަންދައިން ވިދާޅުވިއެވެ.
