ދުނިޔެ ސާފުކުރުމުގެ ބައިނަލްއުވާމީ ދުވަސް ފާހަގަ ކުރުމުގެ ގޮތުން، ޖޫނިއަރ ޗެމްބަރ އިންޓަނޭޝަލް (ޖޭސީއައި) ގެ ފަރާތުން އައްޑޫ ސިޓީ ހިތަދޫގައި ސާފުކުރުމުގެ ހަރަކާތެއް ބާއްވައިފިއެވެ.
ޖޭސީއައި އިން މި ހަރަކާތް ކުރިއަށް ގެންގޮސްފައިވަނީ ލެޓްސް ޑޫއިޓް މޯލްޑިވްސްއާ ގުޅިގެންނެވެ. މިހަރަކާތުގައި ދިވެހިރެޑުކްރެސެންޓާއި، އެމްއެންޑީއެފާއި، ވެމްކޯ އިން ބައިވެރިވެފައިވެއެވެ.
އިއްޔެ (ހޮނިހިރު ދުވަހު) ހެނދުނު 7 އިން 10 އަށް ކުރިއަށް ގެންދިޔަ މިހަރަކާތުގައިވަނީ ހިތަދޫ ކިނބި ވަލު ސާފުކޮށްފައެވެ. ދުނިޔެ ސާފުކުރުމުގެ ހަރަކާތްވަނީ ދުނިޔޭ އެކިކަންކޮޅު ތަކުގައި ބާއްވައިފައެވެ.
މި ހަރަކާތް ކުރިއަށް ގެންދިޔަ ފަރާތުގެ މަގުސަދަކީ އައްޑޫ ސިޓީ ރައްޔިތުންގެ މެދުގައި، ތިމާވެށީގެ ހޭލުންތެރިކަން އިތުރުކުރުމާއި، ސިޓީ ސާފުކޮށް ބޭއްވޭނީ އެންމެން ގުޅިގެން މަސައްކަތްކޮށްގެން ހާމަކޮށްދިނުމެވެ. "މިހަރަކާތުގައި ބައިވެރިވި އައްޑޫ ސިޓީގެ ކައުންސިލާއި، ދިވެހިރެޑްކްރެސެންޓާއި، ދިވެހި ސިފައިންނާއި، ވެމްކޯއާއި ވޮލަންޓިއަރުންނަށް ވަރަށް ބޮޑަށް ޝުކުރު ދަންނަވަން" ޖޭސީއައި އިން ބުންޏެވެ.
މި ހަރަކާތުގައި ޖުމްލަ 14،160 ލިޓަރުގެ ކުނި (އާންމު ކުނި) އަދި 4 ޓަނުގެ ދަނގަނޑުގެ ބާވަތްތައް ނެގިފައިވާ ކަމަށް ކުނިއުކާލުމުގައި އިސްކޮށް ހަރަކާތްތެރިވި ވެމްކޯއިން މައުލޫމާތު ދެއްވިއެވެ.
ޖޭ.ސީ.އައި އަކީ ޒުވާނުން ބާރުވެރި ކުރުވުމުގެ މަގުސަދުގައި މަސައްކަތްކުރާ ޖަމްއިއްޔާއެކެވެ. އެޖަމިއްޔާއިން މަސައްކަތް ކުރަނީ ހުރިހާ ދާއިރާއެއްގެ މަސައްކަތް ކުރާ 18 އަހަރާއި 40 އަހަރާ ދެމެދުގެ ޒުވާނުން ބައިވެރިކޮށްގެން އެމީހުންގެ ޚިޔާލާއި މަޝްވަރާއާ އެކުގައެވެ.
