ޖަރުމަނުގެ ކެތޮލިކް ނަސާރާއިންގެ ފާދިރީން ވަނީ 1946 އާއި 2014 އާއި ދެމެދު 3677 ކުޑަކުދިންނަށް ޖިންސީ ގޯނާކޮށްފައި ކަމަށް ފައްޅީގެ ތެރޭގައި ހިނގާ ކުޑަކުދިންނަށް ގޯނާކުރުމުގެ އަމަލުތަކާ ބެހޭ ދިރާސާއަކުން ދައްކައިފިއެވެ.
ޖަރުމަނުގެ އިސް ފާދިރީންގެ ކޮންފަރެންސުން އިސްނަގައިގެން ޖަރުމަނުގެ ތިން ޔުނިވަސިޓީއަކުން ކުރި ދިރާސާ ވަނީ އެގައުމުގެ މަޝްހޫރު ދެ ނޫސް ކަަމުގައިވާ ސްޕީގަލް އަދި ޑިޓް ޒަައިޓްގައި ޝާއިއުކޮށްފައެވެ. އެ ދިރާސާގައި ވާގޮތުން އަނިޔާ ލިބުނު ކުދިންގެ ދެބައިކުޅަށް އެއްބަޔަށް ވުރެ ގިނައީ 13 އަހަރުން ދަށުގެން ކުދިންނެވެ. އަދި ގިނަ ކުދިންނަކީ ފިރިހެން ކުދިންނެވެ. އެފަދަ ކޮންމެ ހަ ހާދިސާއަކުން އެއް ހާދިސާއަކީ އިއްފަތްތެރިކަން ނަގާލުމުގެ ހާދިސާއެކެވެ. މި އަމަަލުތައް ހިންގުމުގައި 1670 ފާދިރީން ބައިވެރިވެފައި ވެއެވެ. އަދި އެކަމުގެ ޝިކާރައަކަށްވި 969 ފިރިހެން ކުދިންނަކީ ފައްޅީގައި ފާދިރީންގެ ޚިދުމަތުގައި ތިބޭ ކުދިންނެވެ.
މި ރިޕޯޓު ނޫސްތަކުން އާއްމުކުރި ފަހުން ޖަރުމަނު އިސް ފާދިރީންގެ ކޮންފަރެންސުން ނެރުނު ބަޔާނެއްގައި ބުނެފައި ވަނީ ރިޕޯޓު އާއްމުވުމުން ދެރަވާ ކަމަށާއި، އެއިން ދައްކައި ދެނީ ޖިންސީ ގޯނާކުރުމުގެ އަމަލުތައް ހިނގާފައިވާވަރު ކަމަށެވެ.
ކެތޮލިކް ފާދިރީންގެ ޖިންސީ ގޯނާގެ ވާހަކައަކީ އިހުއްސުރެ ދެކެވެމުން އަންނަ ވާހަކައެެކެވެ. ފަހަކަށް އައިސް ކުރާ މިފަދަ ދިރާސާތަކުން އެކަން ހިނގާފައިވާ މިންވަރު ދަނީ ހާމަވަމުންނެވެ.
ފާއިތުވި މަހު އެމެރިކާގެ ޕެންސިިލްވޭނިޔާ ސްޓޭޓްގައި ނެރުނު ދިރާސާ ރިޕޯޓަކުން އެނގުނު ގޮތުގައި އެ ސްޓޭޓްގެ ކެތޮލިކް ފާދިރީންގެ މެދުގައިވެސް ޖިންސީ ގޯނާ ވަނީ އާއްމުވެފައެވެ. މިގޮތުން 300 ފާދިރީއަަކު 1000 އަށްވުރެ ގިނަ ކުޑަކުދިންނަށް ޖިންސީ ގޯނާކޮށްފައިވާކަން އެ ރިޕޯޓުން ވަނީ ހާމަވެފައެވެ.
