ސީރިޔާގެ އިދިކޮޅު ހަނގުރާމަވެރިންގެ އަތްދަށުގައި މިހާރު އޮތް އިދްލިބު ޕްރޮވިންސަށް ސަރުކާރު ސިފައިން ފުޅާ ދާއިރާއެއްގައި ހަމަލާ ދީފިނަމަ މި ގަރުނުގެ އެންމެ ބޮޑު ކާރިސާ ކުރިމަތިވާނެ ކަމުގެ އިންޒާރު އދ. އިންސާނީ އެހީއާ ބެހޭ އެންމެ އިސްވެރިޔާ ދެއްވައިފިއެވެ. "ކުރިއަށް އޮތް މަސްތަކުގައި މިކަން 21 ވަނަ ގަރުނުގެ އެންމެ ބޮޑު، އެންމެ ގިނަ މީހުން މަރުވާ ކާރިސާއަށް ބަދަލުވުމުގެ ކުރިން މިކަން ހައްލުކުރެވޭނެ ގޮތްތަކެއް ހޯދަން ޖެހޭނެ." ޖެނީވާގައި ވާހަކަފުޅުދައްކަވަމުން އދ. ގެ އަންޑަރ ސެކްރެޓަރީ ޖެނެރަލް ފޯ ހިއުމެނިޓޭރިއަން އެފެއާޒް އަދި ޔުނައިޓެޑް ނޭޝަންސް އޮފީސް ފޯ ދަ ކޯޑިނޭޝަން އޮފް ހިއުމެނިޓޭރިއަން އެފެއާޒްގެ ކޯޑިނޭޓަރ މާކް ލޯކޮކް ވިދާޅުވިއެވެ.
އޭނާ މި މޭމުރުމުން ވާހަކަފުޅުދައްކަވާފައި ވަނީ، ވަރުގަދަ ހަމަލާއަކަށް ތައްޔާރުވުމުގެ ގޮތުން ރަޝިޔާ އާއި އީރާނު ސިފައިގެ އެހީއާއެކު، ސީރިޔާ ސިފައިން ސީރިޔާގެ ހުޅަނގު އުތުރުގައި އޮންނަ އިދްލިބް ޕްރޮވިންސަށް ޖަމާވަމުން ދަނިކޮށެވެ.
2015 ވަނަ އަހަރުން ފެށިގެން އިދްލިބު އޮތީ ސީރިޔާ ސަރުކާރާ ދެކޮޅަށް ހަނގުރާމަކުރާ އެތައް ޖަމާއަތަކަށް ނިސްބަތްވާ ހަނގުރާމަވެރިންގެ އަތްދަށުގައެވެ. އޭގެތެރޭގައި ސެކިއުލާ މީހުންނާއި، ހަރުކަށި މީހުންނާއި، އަލްގާއިދާ ފަދަ ޖިހާދީ ޖަމާއަތްތަކަށް ނިސްބަތްވާ ސީރިޔާއި އާއި ބޭރު ގައުމުތަކުގެ ހަނގުރާމަވެރިން ހިމެނެއެވެ.
އދ. ގެ ހިސާބުތަކުން ދައްކާ ގޮތުގައި އެ ޕްރޮވިންސުގައި 3 މިލިއަނެއްހާ މީހުން ދިރިއުޅެއެވެ. އޭގެ ތެރެއިން ދެބައިކުޅަ އެއްބަޔަކީ ސީރިޔާގެ އެހެން ސަރަހައްދުތަކުން ހިޖުރަކުރި މީހުންނެވެ.
ލޯކޮކް ވިދާޅުވި ގޮތުގައި ތަފާތު 'ޓެރަރިސްޓް' ޖަމާއަތްތަކަށް ނިސްބަތްވާ ހަނގުރާމަވެރިން އެ ޕްރޮވިންސުގައި އެބަތިއްބެވެ. އެހެންނަމަވެސް ކޮންމެ ހަނގުރާމަވެރިއަކަށް 100 އާއްމުން އެ ސަރަހައްދުގައި ދިރިއުޅެއެވެ. އޭގެ ތެރޭގައި ގިނައީ އަންހެނުންނާއި ކުޑަކުދީންނެވެ.
"އަހަރުމެން މިތިބީ ހާލަތާމެދު ވަރަށް ކަންބޮޑުވެފައި. މީހުންގެ އަދަދު ގިނަކަމުންނާއި، އެމީހުންނަށް އޮތް ނުރައްކާ ބޮޑުކަމުން." ލޯކޮކް ވިދާޅުވިއެވެ.
އޭނާ ވިދާޅުވިގޮތުގައި އދ. އިން ދަނީ 8 ލައްކަ ވަރަކަށް މީހުންނަށް އެހީތެރިކަން ފޯރުކޮށްދިނުމަށް ރާވަމުންނެވެ. ލަފަކުރެވޭ ގޮތުގައި ލައްކައެއްހާ މީހުން އިދްލިބު ދޫކޮށް، ސީރިޔާ ސަރުކާރުގެ ބާރުގެ ދަށުގައިވާ އެހެން ސަރަހައްދުތަކަށް ދަތުރުކުރާނެއެވެ. އަދި 7 ލައްކައެއްހާ މީހުން އިދްލިބު ތެރޭގައި އެއް ތަނުން އަނެއް ތަނަށް ބަދަލުވާނެއެވެ.
އދ. ގެ ކާނާއޭ ބެހޭ އިދާރާ، ވޯލްޑް ފުޑް ޕްރޮގްރާމުން ބުނީ، ބޮޑު ހަމަލާއެއް ފެށިއްޖެ ހާލަތެއްގައި ފުރަތަމަ ހަފުތާތެރޭގައި 8 ލައްކަ 50 ހާސް މީހުންނަށް ދޭނެ ކާބޯތަކެތި ތައްޔާރުކޮށްފައިވާ ކަމުގައެވެ.
