މިމަހުގެ 23 ވަނަ ދުވަހު އޮންނަ ރިޔާސީ އިންތިޚާބުގައި އިދިކޮޅު ކޯލިޝަނުން ވާދަކުރައްވާ ރިޔާސީ ކެންޑިޑޭޓް އިބްރާހިމް މުޙަންމަދު ސޯލިޙް (އިބޫ) އާއި ރަނިންމޭޓް ފައިސަލް ނަސީމު އަތޮޅުތެރެއަށް ކުރައްވާ ކެމްޕޭން ދަތުރުފުޅެއްގައި މިއަދު ފުރާވަޑައިގެންފިއެވެ.
ދެބޭފުޅުން ދެސަރަހައްދަކަށް މިއަދު ހެނދުނު ފުރާވަޑައިގެންނެވިއިރު އިބޫ ވަޑައިގެންނެވީ ށ. އަތޮޅާއި ނ. އަތޮޅުގެ ރަށްތަކަށް ޒިޔާރަތް ކުރެއްވުމަށެވެ. ފައިސަލް ވަޑައިގެންނެވީ ތ. އަތޮޅުގެ ރަށްތަކަށެވެ. ފައިސަލް ތ. އަތޮޅަށް ވަޑައިގެންނެވިއިރު ޖެހިގެން އޮތް ދ. އަތޮޅުގައި ޕީޕީއެމްގެ ރިޔާސީ ކެންޑިޑޭޓްގެ ރަނިންމޭޓް ޑރ މުޙަންމަދު ޝަހީމް އަލީ ސައީދުވެސް ވަޑައިގެން އެބައުޅުއްވައެވެ.
މައުލޫމާތު ލިބިފައިވާ ގޮތުގައި ށ. އަދި ނ ގެ ވަރަށްގިނަ ރަށްރަށަށް އިބޫ ވަޑައިގަންނަވާނެއެވެ. އަދި ފައިސަލްވެސް ތ އަތޮޅުގެ ގިނަ ރަށްރަށަށް ވަޑައިގަންނަވާނެއެވެ.
