ރައްޔިތުންގެ މަޖިލީހުގެ ފޭދޫ ދާއިރާގެ ކުރީގެ މެމްބަރު އަދި އެމްޑީޕީގެ ކުރީގެ ނާއިބު ރައީސް އަލްހާން ފަހުމީ މިރޭ ޕީޕީއެމަށް ސޮއިކުރައްވައިފިއެވެ.
އަލްހާން ޕީޕީއެމަށް ސޮއިކުރެއްވީ ކާނިވާ ސަރަހައްދުގައި ޕީޕީއެމުން މިހާރު ބާއްވަމުން ގެންދާ "ބުރިޖު ސަޅި" ޖަލްސާގައެވެ. އަލްހާން ޕީޕީއެމަށް މިރޭ ސޮއި ކުރެއްވުމުގެ ކުރިން ވެސް ގެންދެވީ ރައީސް ޔާމީންގެ ސިޔާސަތަށް ތާއިދު ކުރައްވައި ވާހަކަ ދައްކަވަމުންނެވެ. އަދި ބައެއް ޓްވީޓްތައް ވެސް ކުރައްވަމުންނެވެ.
އަލްހާން ޕީޕީއެމާ ގުޅިވަޑައިގެންނެވުމުން އެޕާޓީގެ މުސްތަޝާރު ރައީސް ޔާމީންވަނީ މަރުހަބާ ދަންނަވައިފައެވެ.
އަލްހާން ސިޔާސީ ކެރިއަރ ފެއްޓެވީ ރައީސް މައުމޫނުގެ ޒައާމަތުގައި ޑީއާރުޕީގެ ތެރެއިން 2008 ވަނަ އަހަރުއެވެ. އެފަހުން އޭނާ ވަނީ ޑީއާރުޕީގައި މުހިންމު ދައުރެއް އަދާކުރައްވައިފައެވެ. ފަހުން އެމްޑީޕީއާ ގުޅިވަޑައިގެން އެޕާޓީގެ މުހިންމު މަގާމްތަކެއް ވެސް ވަނީ ފުރުއްވައިފައެވެ.
