ކުރިއަށްއޮތް ރިޔާސީ އިންތިޚާބުގައި ގުޅިފައިވާ ޕާޓީތަކުން ވާދަކުރައްވާ ރިޔާސީ ކެންޑިޑޭޓް އިބްރާހީމް މުހައްމަދު ސާލިހު (އިބޫ) އަށް ތާއީދު ކުރުމުގެ ގޮތުން އައްޑޫ ސިޓީ ހިތަދޫގައި ސައިކަލް ބުރެއް މިއަދު ބާއްވައިފިއެވެ.
އެމްޑީޕީގެ އައްޑޫ ދާއިރާގެ ނާއިބު ރައީސް އިބްރާހީމް ރަޝީދު (އިބުރޭ) ވިދާޅުވީ މިއަދުގެ ސައިކަލް ބުރުގައި ހާހެއްހާ މީހުން ބައިވެރިވި ކަމަށް ލަފާކުރެވޭ ކަމަށެވެ.
"މިއީ ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބޫއަށް ތާއީދު ހޯދުމުގެ ގޮތުން ގުޅިފައިވާ ޕާޓީތަކުން އިންތިޒާމް ކޮށްގެން ހިތަދޫގައި ބޭއްވި ސައިކަލްބުރެއް،" އިބުރޭ ވިދާޅުވިއެވެ.
އޭނާ ވިދާޅުވީ އަންނަ ހަފްތާގެ ހުކުރު ދުވަހު އައްޑޫގައި ވެހިކަލް ބުރެއް ބާއްވާނެ ކަމަށެވެ. އެއީ ވެސް އިބޫއަށް ތާއީދު އިތުރުކުރުމަށް ގުޅިފައިވާ ޕާޓީތަކުން ބާއްވާ ބުރެއް ކަމަށް އޭނާ ވިދާޅުވިއެވެ.
މިދިޔަ ހަފްތާގައި ވެސް އައްޑޫގައި ވަނީ ސައިކަލް ބުރެއް ބާއްވައިފިއެވެ.
