އެމެރިކާގެ ރައީސު ޑޮނާލްޑް ޓްރަމްޕަކީ ރައީސުކަމުގައި ދެމިހުންނެވުމަށް އެކަށީގެންނުވާ ބޭފުޅެއް ކަމުގައި ސަރުކާރުގެ އިސްވެރިންނަށް ގަބޫލުފުޅުކުރެއްވޭނަމަ، އެމެރިކާގެ ގާނޫނު އަސާސީއަށް ގެނެސްފައިވާ 25 ވަނަ އިސްލާހުގެ ބޭނުންކޮށްގެން ރައީސު ޓްރަމްޕް މަގާމުން ދުރުކުރަންވެއްޖެ ކަމުގައި ސެނެޓަރު އެލިޒަބެތު ވޮރެން ވިދާޅުވެއްޖެއެވެ.
ޑިމޮކްރެޓިކް ޕާޓީގެ އެންމެ އިސް ސެނެޓަރު ކަމުގައިވާ ވޮރެން މިހެން ވިދާޅުވީ، ޓްރަމްޕުގެ ސަރުކާރުގެ އިސް ބޭފުޅަކު ނަން ހާމަނުކުރައްވައި ނިއުޔޯކު ޓައިމްސްގައި ލިއުއްވާފައިވާ މަޒުމޫނެއްގައި ޓްރަމްޕަކީ ރައީސުކަމަށް ގާބިލު ބޭފުޅެއް ނޫންކަމުގައި ވިދާޅުވުމާ ގުޅިގެންނެވެ.
2016 ވަނަ އަހަރުގެ ރިޔާސީ އިންތިޚާބުގައި ހިލަރީ ކްލިންޓަންގެ ރަނިންމޭޓަށް ވެވަޑައިގަންނަވާނެކަމަށް ހީކުރެވުނު އަދި 2020 ވަނަ އަހަރުގެ ރިޔާސީ އިންތިޚާބުގައި ޑިމޮކްރެޓިކް ޕާޓީގެ ފަރާތުން ވާދަކުރައްވާނެކަމަށް ބެލެވޭ އެލިޒަބެތު ވޮރެން ވިދާާޅުވީ ސަރުކާރުގެ އިސްވެރިންނަށް ޓްރަމްޕުގެ ގާބިލުކަމާ މެދު ސުވާލުއުފެދޭނަމަ، ގާނޫނު އަސާސީގެ 25 ވަނަ އިސްލާުހުގެ ބޭނުން ހިފަންޖެހޭނެ ކަމުގައެވެ.
"ގާނޫނު އަސާސީގެ 25 ވަނަ އިސްލާހު ބުނާ ފަދައިން ރައީސު 'އޭނާގެ މަގާމުގެ ބާރުތަކާއި ވާޖިބުތައް އަދާކުރުމަށް ނުކުޅެދިފައިވާ' ކަމަށް އޭނާގެ ވަޒީރުންގެ މަޖިލީހަށް ގަބޭލުކުރެވޭނަމަ، އެބޭފުޅުން އެމާއްދާގެ ބޭނުން ހިއްޕެވުމަށް އުޒުރުދައްކަވާ ކޮންމެ މިނެޓަކީ އަހަރުމެންގެ ގައުމު ނުރައްކަލަށް ހުށެހެޅޭ މިނެޓެެއް." ސީއެންއެން އަށާއި، އޭނާގެ ސަޕޯޓަރުންނަށް ފޮނުއްވި އީމޭލެއްގައި އޭނާ ވިދާޅުވިއެވެ.
"އިސް މަސްއޫލުވެރިންނަށް ރައީސަކީ ނާގާބިލު ބޭފުޅެއްކަމުގައި ގަބޫލުކުރެއްވޭނަމަ، ވަކި މީހަކު ނޭނގޭ ގޮތަށް ނޫސްތަކުގައި މަޒުމޫނުތައް ލިއުއްވައި، ބޮބް ވުޑްވާޑަށް މައުލޫމާތު ލީކުކުރައްވައި ހައްދަވައިގެން، (ފިއަރ: ޓްރަމްޕް އިން ދަ ވައިޓްހައުސްގެ ނަމުގައި އޭނާ ލިއުއްވާފައިވާ ފޮތުގައި އިސް މަސްއޫލުވެރިންގެ ވާހަކަތައް ހިމަނުއްވާފައިވޭ) ތިމަންބޭފުޅުން ގައުމު ސަލާމަތްކުރައްވަނީކަން ދައްކަވައި މޮޅުބަސް ވިދާޅުވުމުގެ ބަދަލުގައި އެބޭފުޅުން ޖެހެނީ ގާނޫނު އަސާސީން އެބޭފުޅުންނަށް ލާޒިމުކުރާ ކަންތައް ކުރައްވަން؛ އެއީ 25 ވަނަ އިސްލާހުގެ ބާރުގެ ބޭނުންކުރައްވައި ރައީސު މަގާމުން ދުރުކުރެއްވުން." އޭނާ އިތުރަށް ވިދާޅުވިއެވެ.
ނިޔުޔޯކް ޓައިމްސްގައި ޝާއިއުކުރި މަޒުމޫނުގައި ވާގޮތުން ރައީސު ޓްރަމްޕް ކުއްލިކުއްލިއަށް ކަންކަން ނިންމެވުމާ، ނިންމެވުންތައް އަވަސް އަވަހަށް ބަދަލުކުރެއްވުން ފަދަ ކަންކަން ކުރައްވަމުން ގެންދަަވަނީ ގައުމު ނުރައްކަލަށް ހުށަހެޅިދާ ފަދަ ގޮތަކަށެވެ. އެހެންކަމުން 25 ވަނަ އިސްލާހުގެ ބޭނުން ހިފުމުގެ ވާހަކަތަކެއްވެސް އިސްވެރިންގެ މެދުގައި ކޮންމެވެސް ވަރަކަށް ދެކެވުނެވެ.
އެމެރިކާގެ ގާނޫނު އަސާސީއަށް ގެނައި 25 ވަނަ އިސްލާހަކީ 1963 ވަނަ އަހަރު ރައީސު ޖޯން އެފް. ކެނެޑީ އަވާހަރަކޮށްލެވުމަށް ފަހު ގެނައި އިސްލާހެކެވެ. 1967 ވަނަ އަަހަރު ގާނޫނު އަސީސީގެ ދެވަނަ ބާބުގެ ފުރަތަމަ ބައިގެ 6 ވަނަ މައްދާއަށް ގެނައި އެ އިސްލާހުގެ 4 ވަނަ މައްދާގައި ވާގޮތުން އެއްވެސް ކަމެއް ދިމާވެގެން ރައީސު އޭނާގެ މަސްއޫލިއްޔަތު އުފުލުމަށް ނުކުޅެދިއްޖެ ކަމަށް ފެނިއްޖެ ހާލަތެއްގައި، ރައީސު މަގާމުން ދުރުކުރުމަށް އެދި ކޮންގްރެސްއަށް ލިއިމުގެ ބާރު ނާއިބު ރައީސަށާއި، ސަރުކާރުގެ އިސްވެރިންނަށް ލިބިގެން ވެއެވެ.
