އިސްރާއީލުގައި ހުންނަ ޕެރެގުއޭގެ އެންބަސީ ޤުދްސުން ޓެލްއަވީވަށް ބަދަލުކުރަން ނިންމައި، އެކަމަށް ވަގުތުން އަމަލީ ސިފަ ގެންނާނެކަމަށް އެގައުމުން ބުނެފިއެވެ. ޕެރެގުއޭގެ އެންބަސީ ޓެލްއަވީވުން ޤުދްސަށް ބަަދަލުކުރީ ހަތަރު މަސް ކުރިންނެވެ. އެއީ އެެމެރިކާއާއި ގުއަޓިމާލާއަށް ފަހު އެފަދައިން ކަންކުރި ތިންވަނަ ގައުމުގެ ގޮތުގައެވެ.
މިނިންމުންވީ އިސްރާއީލަށް ލިބުނު ޑިޕްލޮމެޓިކް ސިހުމަކަށެވެ. އިސްްރާއީލުން އުއްމީދުކުރީ އެމެރިކާއާއި، ގުއަޓިމާލާއަށް ފަހު ޕެރެގުއޭއިން ޤުދްސަށް އެންބަސީ ބަދަލުކުރުމުން އެ ސިލްސިލާ ކުރިއަށް ދާނެކަމަށެވެ.
އިސްރާއީލަށް ލިބުނު ސިހުމާއެކު، ގުއަޓިމާލާގެ ނިންމުމާމެދު ނުރުހޭކަން ހާމަކުރުމުގެ ގޮތުން އިސްރާއީލުން ވަނީ ޕެރެގުއޭގައި ހުންނަ އިސްރާއީލުގެ އެންބަސީ ބަންދުކޮށް، އެންބެސެޑަރު އަނބުރާ ގެނެސްފައެވެ. އަދި ޕެރެގުއޭގެ ނިންމުމުގެ ސަބަބުން ދެގައުމުގެ ގުޅުން އިތުރަށް ގޯސްވެދާނެ ކަމުގެ އިންޒާރުދީފައެވެ.
ޕެރެގުއޭގެ ވެރިރަށް އަސުންސިއޯންގައި ނޫސްވެރިންނާ ވާހަކަފުޅުދައްކަވަމުން ޚާރިޖީ ވަޒީރު އަލްބަރްޓޯ ކަސްޓިލިއޯނީ ވިދާޅުވީ، އޭނާގެ ގައުމު އެންބަސީ ކުރިން ހުރި ގޮތަށް ބަދަލުކުރުމުން "އިސްލާއީލުގެ ރަހުމަތްތެރިން ކަންބޮޑުނުވާނެ" ކަމަށް އުއްމީދުކުރައްވާ ކަމުގައެވެ. އަދި އިސްރާއީ ފަލަސްޠީނާއެކު ރަނގަޅު ގުޅުންތަކެއް ދެމެހެއްޓޭނެ ކަމުގެ އުއްމީދު އޭނާ ފާޅުކުރެއްވިއެވެ.
އެންބަސީ ޓެލްއަވީވުން ޤުދްސަށް ބަދަލުކުރައްވަން ނިންމަވައި، ފާއިތުވި މޭ މަހު 21 ވަނަ ދުވަހު އެނިންމެވުމަށް އަމަލީ ސިފަ ގެންނެވީ ޕެރެގުއޭގެ ކުރީގެ ރައީސު އޮރާސިއޯ ކަރްޓޭސްއެވެ. އެއީ އޭރުވެސް ޕެރެގުއޭގެ ގިނަ ބަޔަކު ދެކޮޅު ހަދަމުން ދިޔަ ކަމެކެވެ.
އޮގަސްޓް މަހުގެ 15 ވަނަ ދުވަހު ވެރިކަމާ ހަވާލުވެވަޑައިގަތުމުގެ ކުރިންވެސް އާ ރައީސު މާރިއޯ އަބްޑޯ ބެނިޓޭޒް އެންބަސީ ބަދަލުކުރުމާ ދެކޮޅުހައްދަވާފައެވެ.
ޕެރެގުއޭގެ ނިންމުމާ ވިދިގެން ފަލަސްޠީނުގެ ޚާރިޖީ ވަޒީރު ރިޔާޟު އަލްމާލިކީ ވިދާޅުވީ ފަލަސްޠީނު އެންބަސީއެއް އަސުންސިއޯންގައި ވަރަށް އަވަހަށް ހުޅުވަން ރައީސު މަޙްމޫދު ޢައްބާސް ނިންމަވާފައިވާ ކަމުުގައެވެ.
