ރައީސް ޔާމީންގެ ސަރުކާރަށްވުރެ ބޮޑަށް ޒުވާނުންނަށް އޮޅުވާލި ސަރުކާރެއް ދެކެވަޑައި ނުގަންނަވާނެ ކަމަށް ފުވައްމުލަކު ސިޓީގެ މެދުދާއިރާގެ މެމްބަރު އަލީ ފަޒާދު ވިދާޅުވެއްޖެއެވެ.
ފަޒާދު މިހެން ވިދާޅުވީ ގުޅިފައިވާ ޕާޓީތަކުން ހޯރަފުށީގައި ބޭއްވި ޖަލްސާގައި ވާހަކަ ދައްކަވަމުންނެވެ.
"ޒުވާނުންނަށް މިއަށްވުރެ ބޮޑަށް އޮޅުވާލި ސަރުކާރެއް އަޅުގަނޑު ނުދެކެން. ފުރަތަމަ ކަމެއްގެ ގޮތުގައި 2013 ވަނަ އަހަރު ރިޔާސީ އިންތިޚާބުގެ ވައުދުތައް ނުވަތަ މެނިފެސްޓޯގައި ހިމެނީ ސްޕޯޓްސް އެރީނާތަކެއްގެ ވާހަކަ. އޭގެ ވާހަކަ ވަރަށް ތަފްސީލްކޮށް އެމެނިފެސްޓޯގައި އޮތް. އަޅުގަނޑު ދަންނަވާނީ ފަސް އަހަރު ނިމުނުއިރު އެ މެނިފެސްޓޯގައި އޮތް އެންމެ ސްޕޯޓްސް އެރީނާއެއް ވެސް ދިވެހި ރާއްޖޭގެ ސަތޭކަ އަށްޑިހައެތައް ރަށެއްގެ ތެރެއިން އެންމެ ރަށެއްގައި ވެސް ނެތޭ،" ފަޒާދު ވިދާޅުވިއެވެ.
އެހެންނަމަވެސް އެ އެރީނާތަކުގެ ވާހަކަ ވަރަށް ތަފްސީލްކޮށް މެނިފެސްޓޯގައި ބުނެފައިވާ ކަމަށް ވެސް އޭނާ ވިދާޅުވިއެވެ. "ސްޕޯޓްސް އެރީނާއަކީ މެނިފެސްޓޯގައި އޮތް ގޮތުން ހަމައެކަނި ފުޓުސަލް ދަނޑެއްނޫން. އޭގައި ބޮޑު ފުޓުބޯޅަ ދަނޑެއް، ޓްރެކެއް، ވޮލީކޯޓެއް، ބަށިކޯޓެއް، ބާސްކެޓް ކޯޓެއް، އިންޑޯ ހޯލެއް ހުރިހާ އެއްޗެއް ހިމެނޭ، ޖިމްއާއި ރާޒުވާއި ކެރަމް ވެސް ކުޅެވޭނެގޮތަށް އެތަންތަން ތަރައްގީކުރަންއޮތީ،" ފަޒާދު ވިދާޅުވިއެވެ.
އޭނާ ވިދާޅުވީ ކުރިން ސަރުކާރު ތަމްސީލް ކުރައްވާ މެމްބަރެއްގެ ގޮތުގައި ހުންނެވުމަށްފަހު ސަރުކާރު ދޫކުރެއްވީ ގާނޫނީ އިމުން ބޭރުން ކަންތައްތަކެއް ކުރުމާއި ދޮގު ހެދުމުގެ ސަބަބުން ކަމަށެވެ. "އަޅުގަނޑު ސަރުކާރު ދޫކޮށްލާފައި ދާންޖެހުނު އެންމެބޮޑު އެއް ސަބަބަކީ ގާނޫނީ އިމުން ބޭރުން ކަންތައްތަކެއް ކުރުން. ދޮގުހެދުން،" ފަޒާދު ވިދާޅުވިއެވެ.
ފަޒާދު ވިދާޅުވީ އެންމެހާ ދިވެހިންނާއި، ޕާޓީތަކަށް ވުރެ އިސްވާނީ ދިވެހިންގެ ގައުމު ކަމަށެވެ. ޕާޓީތަކަށްވުރެއ ގައުމު ބޮޑުވާނެ ކަމަށް ވެސް އޭނާ ވިދާޅުވިއެވެ. ދިވެހި ގައުމުގެ މުސްތަގުބަލް ވެސް ބައްޓަންކުރި ގޮތަކަށް ބައްޓަން ވެގެންދާނެ ކަމަށް އޭނާ ވިދާޅުވިއެވެ.
