ސްރީލަންކާގައި ދިރިއުޅެމުންދާ ހުރިހާ ދިވެހިންނަށް ލަންކާގައި ހުންނަ ދިވެހި އެމްބަސީން ޚާއްސަ އިލްތިމާސެއް ކޮށްފިއެވެ.
ގިނަ އަދަދެއްގެ ދިވެހިން ދިރިއުޅެމުންދާ ސްރީލަންކާގައި ހުންނަ ދިވެހި އެމްބަސީން ދިވެހިންނަށް ޚާއްސަ އިލްތިމާސެއް މިކުރީ އެގައުމުގެ އިދިކޮޅު މައި ޕާޓީތަކުން މާދަމާއިން ފެށިގެން އަންނަ ހުކުރު ދުވަހާ ހަމައަށް ކޮލަމްބޯ އާއި ކޮލަމްބޯގެ ކައިރީގައިވާ ބަޔެއް ސްޓޭޓް ތަކުގައިވެސް ކުރަން ތައްޔާރު ވަމުން އަންނަ ބޮޑު މުޒާހަރާގެ ސަބަބުން އުފެދިދާނެ ހަމަނުޖެހުމެއްގެ ސަބަބުން ދިވެހިންނަށް ގެއްލުމެއް ލިބިދާނެތީއެވެ.
ދިވެހި އެމްބަސީން ބުނެފައި ވަނީ މާދަމާއިން ފެށިގެން ހުކުރު ދުވަހާ ހަމައަށް ކޮންމެހެން ބޭނުމެއް ޖެހިއްޖެ ޙާލަތެއްގައި ނޫނީ މަގުތަކަށް ނުކުމެ ނޫޅުމަށް އެދޭ ކަމަށެވެ. އަދި މަގުމައްޗަށް ނުކުންނައިރުވެސް ބަޔެއް މަގު ތަކުގައި އެދުވަސް ތަކުގައި ޓްރެފިކްގެ އުދަނގޫ ބޮޑުވާނެ ކަމަށާއި އެކަންކަމަށްވެސް ސަމާލުވުމަށް ވަނީ އެދިފައެވެ.
ލަންކާގެ ވެރިރަށް ކޮލަމްބޯގައިވެސް ގިނަ އަދަދެއްގެ ދިވެހިން ކިޔެވުމާއި އެނޫންވެސް ކަންކަމަށް ގޮސް ދިރިއުޅެމުންދާއިރު ކޮލަމްބޯ ކައިރީގައި އޮންނަ ދެހިވަލަ، ވެއްލަވައްތަ، މައުންޓްލެވީނިއާ، ކަޅުބޯވިލާ ފަދަ އަވަހަށް ތަކުގައިވެސް ގިނަ އަދަދެއްގެ ދިވެހިން އުޅެއެވެ. އަދި ލަންކާއަކީ ބޭސްފަރުވާ އާއި ވިޔަފާރީގެ ތަފާތު ބޭނުން ތަކަށްވެސް ކޮންމެ ދުވަހަކު އެތައް ދިވެހިންނެއް މިހާރު ގޮސްއުޅޭ ގައުމެކެވެ.
މާދަމާ ކޮލަމްބޯގައި އިދިކޮޅު ޕާޓީތަކުން ބާއްވާ ބޮޑު މުޒާހަރާއަކީ ހަމަނުޖެހުން ހިނގާނެ މުޒާހަރާއެއް ކަމަށް ސަރުކާރު ކޯލިޝަނުން ދަނީ ބުނަމުންނެވެ. ނަމަވެސް އިދިކޮޅު ޕާޓީތަކުން ބުނަނީ އެއްވެސް ހަމަނުޖެހުމެއް މި މުޒާހަރާގައި ނުހިންގާނެ ކަމަށެވެ. މުޒާހަރާ ބޭއްވުމުގެ އެންމެ އިސްކޮށް ހުންނެވީ ލަންކާގެ ކުރީގެ ބޮޑުވަޒީރު ރާޖަޕަކްސާގެ ދަރިކަލުން ނަމާލް ރާޖަޕަކްސައެވެ.
