ކުރިއަށް އޮތް ރިޔާސީ ފަސްއަހަރަށް ހޮވިވަޑައިގެންފި ކަމަށްވާނަމަ މާމިގިއްޔަށް މުހިންމު ތިންކަމެއް ކަމެއް ކޮށްދެއްވާނެ ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.
މިއަދު އެރަށަށް ވަޑައިގެން ރައްޔިތުންނާ ބައްދަލު ކުރައްވައި ދެއްކެވި ވާހަކަފުޅުގައި އެމަނިކުފާނު ވިދާޅުވީ މާމިގިލީ ހޮސްޕިޓަލް ތަރައްގީ ކޮށްދެއްވާނެ ކަމަށެވެ. އަދި ބެންކް އޮފް މޯލްޑިވްސްގެ ބްރާންޗެއް އެރަށުގައި ގާއިމްކޮށްދެއްވާނެ ކަމަށާއި އެރަށުގެ މަގުތައް ޒަމާނީ ފެންވަރަށް ތަރައްގީ ކޮށްދެއްވާނެ ކަމަށް ވެސް އެމަނިކުފާނު ވިދާޅުވިއެވެ.
މިއަދުގެ ރަސްމިއްޔާތުގައި ރައީސުލްޖުމްހޫރިއްޔާ ވިދާޅުވީ ރާއްޖެއަށް އަންނަ ތަރައްގީގެ ހުރަހަކަށް އެއްވެސް ރަށެއްގައި ތިބި މަދު މީސްކޮޅެއް ވެގެން ނުވާނެކަމަށެވެ. އަދި ރައްޔިތުންނަށް ތަރައްގީގެ ސަބަބުން ލިބޭ ފައިދާތަކާއިމެދު ވިސްނާލުމަށް ރައީސް އެދިވަޑައިގެންނެވިއެވެ.
ރައީސް ވިދާޅުވީ ކުރީގެ ބޯދާ ޚިޔާލުތަކުގައި ނުތިބެ އައު ވިސްނުންތަކަކަށް ޖާގަދޭނެ ރައްޔިތުންތަކެއް މި ސަރުކާރުގެ ތެރެއިން އުފެއްދެވިއްޖެކަމަށެވެ.
ރައިސް ވިދާޅުވީ އެންމެވެސް ތަރައްގީ ބޭނުންވާ ކަމަށެވެ. އެހެން ކަމުން އެންމެން ވެސް ވިސްނަންވީ ތަރައްގީގެ ފަހަތުގައި ތިބެ މަސައްކަތްކުރަން ކަމަށް އެމަނިކުފާނު ވިދާޅުވިއެވެ.
ރައީސުލްޖުމްހޫރިއްޔާ ވަނީ މި ސަރަކާރުން ތަރައްގީއަށްޓަކާ ކުރައްވާފައިވާ އަދި ކުރައްވަމުން ގެންދަވާ މަސައްކަތްތަކާބެހޭ ގޮތުން ވެސް ވާހަކަފުޅު ދައްކަވައިފައެވެ. ޚާއްސަކޮށް ރަށްރަށުގެ ތަރައްގީއަށް އެމަނިކުފާނު ކޮށްދެއްވާފައިވާ ކަންތައްތަކުގެ މައްޗަށާއި، ކުރިއަށް އޮތް ދައުރުގައި ކޮށްދެއްވާނެ ކަންތައްތަކުގެ މައްޗަށް ރައީސުލްޖުމްހޫރިއްޔާ ވާހަކަފުޅު ދެއްކެވިއެވެ.
އަރިއޮތޮޅާއި ނިލަންދެ އަތޮޅު ދެކުނުބުރީގެ ބައެއް ރަށްރަށަށް މިހާރު ކުރައްވަމުން ގެންދަވާ ދަތުރުފުޅުގައި، އދ. މާމިގިއްޔަށް މިއަދު ވަޑައިގެން އެރަށުގެ ނަރުދަމާގެ ޚިދުމަތް ވެސް ރައީސް ވަނީ ފައްޓަވައިދެއްވައިފައެވެ.
މިދަތުރު ފުޅުގައި އެމަނިކުފާނު އިއްޔެ ވަނީ އދ. ދަނގެއްޗަށް ވަޑައިގެން އެރަށުގެ ބަނދަރު ހުޅުއްވައިދެއްވައި އެރަށުގެ ފެނުގެ ނިޒާމު ޤާއިމު ކުރުމުގެ މަޝްރޫޢުގެ ނިމުން ފާހަގަކޮށްދެއްވައިފައެވެ. އަދި އެމަނިކުފާނުވަނީ އދ. މަހިބަދޫއަށް ވަޑައިގެން އެރަށުގެ މަގު ހެދުމުގެ މަސައްކަތް ނިމުން ފާހަގަކޮށްދެއްވައިފައެވެ. މީގެއިތުރުން މިއަދު ރައީސުލްޖުމްހޫރިއްޔާ ވަނީ އއ. މަތިވެރިއަށާއި ތޮއްޑުއަށް ވަޑައިގެން އެރަށްރަށުގެ ރައްޔިތުންނާ ބައްދަލުކުރައްވާފައެވެ.
