ޑްރަގު ގޭންގުތަކުން ދަރިން ސަލާމާތް ކުރުމަށް އެމަނިކުފާނު ކަނޑައަޅުއްވައިފައިވާ މަތިވެރި އަޒުމަކަށް އެއްވެސް ބަދަލެއް ނާންނަ ކަމަށް ކުރީގެ ހޯމްމިނިސްޓަރ އުމަރު ނަސީރު ވިދާޅުވެއްޖެއެވެ.
އެމަނިކުފާނުގެ ފޭސްބުކު ޕޭޖުގައި ލިޔުއްވާފައިވަނީ މިގައުމުގެ މަގުތައް އަމާންކުރާނެ ދުވަސް އަދި އަންނާނެ ކަމަށެވެ. "މި ގައުމުގެ މަގުތައް އަމާން ކުރާނެ ދުވަސް އިރާދަ ކުރެއްވިއްޔާ އަދި އަންނާނެ. ޑްރަގު ގޭންގުތަކުން އަޅުގަނޑުމެންގެ ދަރިން ސަލާމާތް ކުރުމުގެ މަތިވެރި އަޒުމަކަށް ބަދަލެއް ނާދޭ،" އުމަރު ވިދާޅުވިއެވެ.
އެމަނިކުފާނު ހޯމް މިނިސްޓަރަކަށް ހުންނެވިއިރު ވަނީ ރާއްޖޭގެ މަގުތައް އަމާން ކުރުމަށް މަސައްކަތްތަކެއް ކުރައްވައިފައެވެ. ޑްރަގު ގޭންގުތައް ނައްތާލުމަށް ތަފާތު ގޮތްގޮތުން ވަނީ ފިޔަވަޅުތަކެއް އަޅުއްވައިފައެވެ.
މިމަހު ބާއްވާ ރިޔާސީ އިންތިޚާބުގައި ވާދަކުރައްވާނެ ކަމަށް ކުރިން ވިދާޅުވުމަށްފަހު އެމަނިކުފާނު ހާމަކުރެއްވި މެނިފެސްޓޯގެ އެންމެ ކުރިއަށް ލައިފައިވާ ކަންތައްތަކުގެ ތެރޭގައި ޑްރަގް ގޭންގުތައް ނައްތާލައި ގޭންގުތަކުގައި އުޅޭ ކުދިން އިސްލާހު ކުރުމަށް މަސައްކަތް ކުރައްވާނެ ކަމަށް ވިދާޅުވެފައިވެއެވެ. އަދި ރާއްޖޭގެ މަގުތަކަކީ އެންމެންނަށް އަމާން އަދި އޮމާން ތަނަކަށް ހައްދައި ދެއްވާނެ ކަމަށް ވައުދުވެ ވަޑައިގެންފައި ވެއެވެ. އެހެންނަމަވެސް އެންމެ ފަހު ވަގުތު އުމަރު ވަނީ އެމަނިކުފާނުގެ ވަގުތު އަދި ނުޖެހޭ ކަމަށް ވިދާޅުވެ ރައީސް ކަމަށް ކުރިމަތި ނުލައްވާ ގޮތަށް ނިންމަވައިފައެވެ.
އުމަރަކީ ރާއްޖޭގައި ހަރަކާތްތެރިވާ ސިޔާސީ ލީޑަރުންގެ ތެރެއިން މަސްތުވާ ތަކެއްޗާއި ގޭންގިތަކާ ދެކޮޅަށް އެންމެ ވަރުގަދައަށް ވަކާލާތު ކުރައްވާ ބޭފުޅާއެވެ.
