އެއްވެސް އުރަތްޕެއްހުރި ލީޑަރަކު އިދިކޮޅުގައި ނެތްކަމަށާއި ތިބި ލީޑަރުންވެސް ތިއްބެވީ ފުޅިއެއްގައި ބަންދުވެފައި ކަމަށާއި އޭގެ ތަޅުދަނޑިވަނީ ރައީސް ނަޝީދު އަތްޕުޅުގައި ކަމަށް ރައީސް ޔާމީން ވިދާޅުވެއްޖެއެވެ.
އެމަނިކުފާނު ވިދާޅުވީ އިދިކޮޅު ރިޔާސީ ކެންޑިޑޭޓް އިބްރާހީމް މުހައްމަދު ސާލިހު (އިބޫ) ލަންކާއަށް ވަޑައިގަންނަވަނީ ފުޅީގެ މަތިގަނޑު ބާރުކޮށް ދޫކޮށް ހަދަންވީ މިންވަރު ރައީސް ނަޝީދު އަރިހުން އޮޅުން ފިލުވުމަށް ކަމަށް ވެސް ރައީސް ވިދާޅުވިއެވެ.
ނ. ވެލިދޫ ރައްޔިތުންނާ ބައްދަލު ކުރައްވައި ރޭ ދެއްކެވި ވާހަކަފުޅުގައި ވިދާޅުވީ އެމަނިކުފާނު ގެންދަވަނީ ރައްޔިތުންގެ ޙައްޤުގައި ދޫކޮށްނުލައްވާނެ އުސޫލުތަކެއް ހިފަހައްޓަވަމުން ކަމަށެވެ. އެހެންކަމުން އެހެން ލީޑަރުންނަށް ކުރިމަތިވެ ވަޑައިނުގަންނަވާ، ގޮންޖެހުންތަކާއި ކުރިމަތިލައްވަން ޖެހިވަޑައިގަންނަވާ ކަމުގައި ވިދާޅުވިއެވެ.
ރައީސް ވިދާޅުވީ އެމަނިކުފާނަށް ކުރިމަތިވެވަޑައިގެންނެވި މިގޮންޖެހުންތަކާއެކު ވެސް އެމަނިކުފާނު މަސައްކަތް ކުރެއްވީ ރާއްޖެ ކުރިއަރުވަން ކަމަށް ވިދާވިއެވެ.
ރޭ ރައީސުލްޖުމްހޫރިއްޔާ ދެއްކެވި ވާހަކަފުޅުގައި ތަޢުލީމީ ދާއިރާއިން ދުނިޔޭގެ ފެންވަރުގައި ވެސް ފާހަގަކޮށްލެވޭފަދަ ރަން ވަނަ ތަކެއް ދިވެހި ދަރިވަރުން ހޯދަމުންދާކަން ފާހަގަކުރެއްވިއެވެ. އަދި ތަޢުލީމީ ދާއިރާ މިގޮތުގައި ކުރިއަރުވާ ތަރައްޤީ ކުރެއްވުމަށް ސަރުކާރުން ކުރައްވާފައިވާ ބައެއް މަސައްކަތްތަކަށް އަލިއަޅުއްވައިލައްވައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ މިވޭތުވެދިޔަ ހަތަރު އަހަރުގެތެރޭގައި ރާއްޖޭގެ އެކި ކަންކޮޅުތަކުގައި، މަލްޓިޕާޕަސް ހޯލާއި، އިތުރު ކްލާސްރޫމްތައް ހިމެނޭ ގޮތަށް 774 ކްލާސްރޫމް އިތުރުކޮށްދެއްވާފައިވާ ކަމަށެވެ.
