ޔަމަނުގައި ސައޫދީން އިސްވެތިބެ ކުރަމުންދާ ހަނގުރާމައިގައި މަރުވާ މީހުންގެ އަދަދު މަދުކުރުމަށް މަސައްކަތްނުކުރާނަމަ، އެމެރިކާއިން ދޭ އަސްކަރީ އަދި ޖާސޫސީ އެހީ ކުޑަކޮށްލަން ޖެހިދާނެ ކަމުގެ އިންޒާރު އެމެރިކާގެ ދިފާއީ ވުޒާރާ ޕެންޓަގަން އިން ސައޫދީ އަރަބިއްޔާއަށް ދީފިކަމަށް ސީއެންއެން ބުނެފިއެވެ.
އެ ޗެނެލުން ޚަބަރުދިން ގޮތުގައި ޕެންޓަގަންއާއި ސެޓޭޓް ޑިޕާޓްމަންޓް (ޚާރިޖީ ވުޒާރާ) އިން ވަނީ ސައޫދީ ސަރުކާރަށް އިންޒާރުގެ ސިޓީ ފޮނުވާފައެވެ.
މިކަމުގައި ޕެންޓަގަންގެ ނިންމުމާ ބެހޭ މައުލޫމާތު އެނގޭ ދެ މަސްއޫލުވެރިއަކު ސީއެންއެންއަށް މައުލޫމާތުދެމުން ބުނީ، ސައޫދީން ޔަމަނުގައި ކުރާ ހަނގުރާމައަށް އެމެރިކާއިން އެހީވާއިރު، ހަނުގުރާމައިގައި މަރުވާ އާއްމުންގެ އަދަދު އިތުރުވަމުން ދާތީ ދިފާއީ ވަޒީރު ޖޭމްސް މެޓިސްއާއި، މެދުއުރުމަތީގައ އެމެރިކާގެ އަސްކަރިއްޔާގެ ކޮމާންޑަރު ޖޯޒެފް ވޮޓެލް ވަނީ ކަންބޮޑުވުން ފާޅުކުރައްވާފައެވެ.
ޕެންޓަގަންގެ ބައެއް މަސްއޫލުވެރިން ބުނިގޮތުގައި، އޮގަސްޓު މަހުގެ 9 ވަނަ ދުވަހު ސައޫދީ ކޯލިޝަނުން ޔަމަނުގައި ބަހަކަށް ދިން ހަމަލާއެއްގައި ގިނަ އަދަދެއްގެ ކިޔަވާކުދިން މަރުވުމަށް ފަހު، ޕެންޓަގަނުން ވަނީ ޔަމަނުގެ މަސްރަހު ވަރަށް ގާތުން ބަލަން ފަށާފައެވެ.
އެމެރިކާގެ ވިސްނުންހުރި ގޮތް ހާމަވެގެން ދިޔައިރު، ރޭގެ ވަގުތެއްގައި އެމިރޭޓްސް ވައިގެ އަސްކަރިއްޔާއިން ސަންއާގެ ވައިގެ ބަނދަރަށާއި، ސަންއާ ކައިރީގައި އޮންނަ އައްދައިލަމީ އަސްކަރީ ވައިގެ މަރުކަޒަށް ހަމަލާދީފައެވެ.
މިހަމަލާއާ ގުޅިގެން ޔަމަނުގެ ސަރުކާރާ ހަނގުރާމަކުރަމުންދާ ޙޫޘީން ބުނީ، އެހަމަލާއަށް ރައްދު ދިނުމުގެ ގޮތުން އެމީހުންގެ "ޞަމާދު-3" މަރުކާގެ ޑްރޯންއަކުން ދުބައިގެ ބައިނަލްއަޤްވާމީ ވައިގެ ބަނދަރަށް ހަމަލާދީފައިވާ ކަމުގައެވެ. އަދި އެހަމަލާގެ ސަބަބުން އެއާޕޯޓު އިރުކޮޅަކަށް ހުއްޓުމަކަށް އައިކަމުގައެވެ ޙޫޘީން އިތުރަށް ބުނީ މިހާރު ޔޫއޭއީ ކޮންމެ ހިސާބަކަށް ވެސް ހަމަލާދިނުމުގެ ގާބިލުކަން އެމީހުންނަށް ލިބިގެންވާ ކަމުގައެވެ.
އެހެންނަމަވެސް އެމިރޭޓްސް އިން ބުނެފައިވަނީ ދުބައި އެއާޕޯޓު އެއްވެސް ވަރަކަށް ހުއްޓުމަކަށް އައިސްފައިނުވާ ކަމަށާއި، މައްސަލައެއް ދިމާނުވެ ފްލައިޓްތަކުގެ ދަތުރުތައް ކުރިއަށް ދާކަމަށެވެ.
