މީގެކުރިން އިދިކޮޅު އެމްޑީޕީގެ މީހުން އެންމެ ރުޅި އަންނަ ބޭފުޅަކީ ރައީސް ޔާމީންގެ ކުރީގެ ޓޫރިޒަމް މިނިސްޓަރު އަދި ފަހުން ދެވަނަ ނައިބު ރައީސަކަށް ވެވަޑައިގެންނެވި އަޙްމަދު އަދީބު ކަމަށާއި ނަމަވެސް ސުޕްރީމް ކޯޓުން ޖަލުގައިތިބި ސިޔާސީ ބޭފުޅުން ދޫކޮށްލަން ނެރުނު ލިސްޓުގައި ކުރީގެ ރައީސް މުޙަންމަދު ނަޝީދުގެ ނަންފުޅާއެކު އަދީބުގެ ނަން އޮތީ ކީއްވެތޯ ރައީސް އަބްދުﷲ ޔާމީން މިއަދު ސުވާލު އުފައްދަވައިފިއެވެ.
ތ. ގުރައިދޫއަށް މިއަދު ވަޑައިގެން އެމަނިކުފާނުގެ ސަޕޯޓަރުންނާއެކު އޮތް ބައްދަލުވުމެއްގައި ވިދާޅުވީ އެމްޑީޕީ މީހުން ކުރިން އެންމެ ރުޅި އައި އަދީބު ކަމަށްވިޔަސް މިއަދު ގޮވަނީ އަދީބު ދޫކޮށްލަން ކަމަށެވެ. ރައީސް ވިދާޅުވީ އެމްއެމްޕީއާރުސީގެ ޚިޔާނާތުގެ ފައިސާ އަނބުރައި ހޯދާނެކަމުގެ ވާހަކަ އިދިކޮޅު ފަރާތްތަކުން ދައްކާއިރު އެކަމުގެ އެންމެ އިސްކޮށް އެމަނިކުފާނުގެ ދެވަނަ ނައިބު ރައީސް އަދީބު ކަމަށާއި، ނަމަވެސް އަދީބު ދޫކޮށްލަން އެމްޑީޕީންވެސް ގޮވާލުމުން އެމްޑީޕީއާ އަދީބާ ދެމެދު މިހާރު އޮތް ގުޅުން ހާމަވެގެންދާ ކަމަށެވެ.
ރައީސް ވިދާޅުވީ އެމްއެމްޕީއާރުގެ ޚިޔާނާތުގެ ބޮޑު މައްސަލައިގެ އެންމެ އިސްފަރާތަކީ އަދީބު ކަމަށްވާއިރު އަދީބު ދޫކޮށްލަން އިދިކޮޅު ފަރާތްތަކުން މަސައްކަތް ކުރަމުންދަނީ ކީއްވެގެންތޯ ސުވާލު އުފެދޭ ކަމަށެވެ. އަދި އިދިކޮޅު ކޯލިޝަނުގެ ރިޔާސީ ކެންޑިޑޭޓްވެސް އެ ފައިސާއަށްވީ ގޮތެއް ހޯއްދަވަންޖެހޭނެ ކަމަށާއި، ނަމަވެސް އެފައިސާ އިދިކޮޅަށް ހޯދިދާނެތޯ ރައީސް ވަނީ ސުވާލު ކުރައްވާފައެވެ.
ރައީސް ވިދާޅުވީ އެމްއެމްޕީއާރުސީގެ ޚިޔާނާތުގެ ފައިސާއާ ގުޅުންހުރި މީހުން މިހާރު ވަނީ އިދިކޮޅާ ގުޅިފައި ކަމަށާއި އެ ފައިސާ އިދިކޮޅު ހަރަކާތްތަކަށްވެސް ހޭދަކުރަމުންދާ ކަމަށެވެ. އެހެންވެ ޚިޔާނާތުގެ ފައިސާ ހުރިތަނެސް މިހާރު އެނގޭނީ އިދިކޮޅު މީހުންނަށް ކަމަށް ރައީސް ވިދާޅުވިއެވެ. އެމަނިކުފާނުގެ ސަރުކާރުން އެ ފައިސާ ހޯދަން މަސައްކަތްތަކެއް ކޮށްފި ކަމަށާއި ނަމަވެސް އެ ފައިސާ ހުރިތަނެއް އެނގިވަޑައިނުގަންނަވާ ކަމަށް ވިދާޅުވިއެވެ.
ރައީސް ވިދާޅުވީ އެމްއެމްޕީއާރުސީގެ ޚިޔާނާތުގެ ފައިސާ ހޯދުމުގެ ކުރިން އިދިކޮޅު ފަރާތްތަކުން ކުރަންވީ ކަމަކީ ރައީސް މުޙަންމަދު ނަޝީދުގެ ވެރިކަމުގެ ތިން އަހަރު ދައުލަތުގެ އެކިއެކި މިނިސްޓްރީ ތަކުން ގެއްލިފައިވާ ފައިސާ ހޯދުން ކަމަށެވެ.
