"ރާއްޖެ ހިފަންޖެހޭ" ކަމަށް ބުނާ މީހުންނާއެކު އިދިކޮޅު އެމްޑީޕީން ގާތްގުޅުމެއް ބާއްވައި މަޝްވަރާ ކުރަމުން އެބަގެންދާ ކަމަށް ހައުސިންގ މިނިސްޓަރ ޑރ މުޙަންމަދު މުއިއްޒު ވިދާޅުވެއްޖެއެވެ.
ކުރިޔަށް އޮތް ރިޔާސީ އިންތިޚާބުގެ ވޯޓުގެ ކަންކަން ދާގޮތަކުން އިންޑިޔާ ސިފައިން ރާއްޖެ އަރައި، ރާއްޖެ ހިފަންޖެހޭ ކަމަށް އިންޑިޔާގެ އިސްބޭފުޅަކު ގޮވާލި ގޮވާލުމަށް ރައްދު ދެއްވައި ޑރ މުއިއްޒު ކުރެއްވި ޓްވީޓެއްގައި ވިދާޅުވީ ރާއްޖެ ހިފަންޖެހޭ ކަމަށް ބުނާ މީހުންނާއި އެމްޑީޕީއާ ގުޅުވައިގެން ސަރުކާރުން ދައްކަމުން އަންނަ ވާހަކަ ތަކަކީ ހަގީގަތެއްކަން މިހާރު މިދަނީ ސާބިތު ވަމުން ކަމަށެވެ.
ޑރ. މުއިއްޒު ވިދާޅުވީ މި ސަބަބު ތަކާއިހުރެ އަންނަ މަހުގެ 23 ވަނަ ދުވަހު އޮންނަ ރިޔާސީ އިންތިޚާބުގެ ވޯޓު ވެފައި ވަނީ ރާއްޖޭގެ މިނިވަންކަމާއި، އިސްތިޤުލާލު ދިފާއު ކޮށްދިނުމަށް ނަގާ ވޯޓަކަށް ކަމަށެވެ.
އިންޑިޔާގެ ސުބަރުމާނިއަން ގޮވާލާފައި ވަނީ ރިޔާސީ އިންތިޚާބުގެ ވޯޓު ސަރުކާރުން އޮޅުވާލާފާނެ ކަމަށާއި އެހެން ހަދައިފިއްޔާ އިންޑިޔާ ސިފައިން ރާއްޖެ ފޮނުވައިގެން ރާއްޖެ ހިފަންޖެހޭނެ ކަމަށެވެ. އޭނާގެ މި ވާހަކަ ތަކަށް ސަރުކާރުގެ ތެރެއިންނާއި އިދިކޮޅު ކޯލިޝަނުގެ ބަޔެއް އިސްބޭފުޅުންވެސް ދަނީ ފާޑުކިޔުން އަމާޒު ކުރައްވަމުންނެވެ.
