ފަސް އަހަރުގެ ތެރޭގައި އޮސްޓްރޭލިޔާގެ ބޮޑުވަޒީރުކަން ކުރައްވާ ފަސްވަނަ ބޭފުޅާ، ސްކޮޓް މޮރިސަން މިއަދު މަގާމުގެ ހުވައި ކުރައްވައިފިއެވެ. ވެރިކަންކުރާ ލިބަރަލް ޕާޓީ ތެރޭގައި ވެރިކަމާހެދި އުފެދުނު އަރައިރުމުގައި ބޮޑުވަޒީރު ކަމުގައި ހުންނެވި މެލްކަމް ޓާންބުލް އަށް އެންމެ ފަހުން މަގާމު ދޫކޮށްލައްވަން ޖެހިވަޑައިގަތުމުން، އެމަގާމާ ހަވާލުވެވަޑައިގަތުމަށް ފަހު މޮރިސަން ވިދާޅުވީ "ސިޔާސީ ލީޑަރުން އެއް ބަޔަކު އަނެއް ބަޔަކާ އަރައިރުންވުމުގައި މާގިނަ ވަގުތު ނަގާލައިފި ކަމުގައެވެ.
ގާނޫނުހަދާ މަޖިލީހުގައި ލިބަރަލް ޕާޓީގެ ލީޑަރަކު ހޮވުމަށް ލެވުނު ވޯޓު ކާމިޔާބުކުރައްވައި، މާލީ ވަޒީރުގެ މަގާމުގައި ހުންނެވި މޮރިސަން ވެރިކަމާ ހަވާލުވެވަަޑައިގަތީ 45 ވޯޓާއެކުގައެވެ. އޭނާއާ ވާދަކުރެއްވި ދާޚިލީ ވަޒީރު ޕީޓާ ޑަޓަންއަށް ލިބިވަޑައިގަތީ 40 ވޯޓެވެ.
ލިބަރަލް ޕާޓީ ތެރޭގައި ޓާންބުލްއާ ދެކޮޅަށް އުފުލޭ އަޑުތައް އިތުރުވެ، އޭނާގެ އިތުބާރު ނެތްކަމުގެ ވޮޓެއް ފުރަތަމަ ލެވުނީ މި އޮގަސްޓު މަހުގެ 21 ވަނަ ދުވަހުއެވެ. އެފަހަރު އޭނާއާ ވާދަކުރެއްވީ ދާޚިލީ ވަޒީރު ޕީޓާ ޑަޓަންއެވެ. އެދުވަހު 48 ވޯޓު 35 ވޯޓުން ބޮޑުވަޒީރު ޓާންބުލް އޭނާ ބަލިކުރެއްވިޔަސް ޑަޓަން ދޫކުރައްވާކަށް ގަސްތެއް ނުކުރެއްވިއެވެ. އޭނާ ބޭނުންފުޅުވީ އަލުން ވޯޓުލާށެވެ. ޑަޓަން ދޫނުކުރައްވައި ކުރެއްވި މަސައްކަތުން އޭނާއަށް ގާނޫނުހަދާ މަޖިލީހުގައި ތިއްބެވި ލިބަރަލް ޕާޓީގެ މެންބަރުގެ ތާއީދު ގެއްލެމުންދާކަން އެނގިވަޑައިގަތުމާއެކު ޓާންބުލް މިއަދު މަގާމުން އިސްތިއުފާދެއްވިއެވެ.
އެހެންނަަމަވެސް، މިފަހަރުވެސް ޕީޓާ ޑަޓަންއަށް ބޮޑުވަޒީރުކަން ލިބިވަޑައިގަންވާ ގޮތެއް ނުވިއެވެ. ސްކޮޓް މޮރިސަން މިވަނީ އޭނާ ބަލިކުރައްވައި ބޮޑުވަޒީރުކަމުގެ މަގާމަށް ވަޑައިގެންފައެވެ. މަގާމާ ހަވާލުވެވަޑައިގެންނެވުމަށް ފަހު ދެއްކެވި ވާހަކަފުޅުގައި، ޓާންބުލް ބޮޑުވަޒީރުކަމުން ދުރުކުރަން ޖެހުނީ ކީއްވެގެން ކަމެއް މޮޮރިސަންއަށް ބުނެ ނުދެއްވުނެެވެ. އެހެނަސް، އޭނާއާ ވާދަކުރެއްވި ޕީޓާ ޑަޓަންއަށް ތާއީދުކުރާ މީހުން ވަނީ ޓާންބުލް ދުރުކުރަން ޖެހުނީ ކުންފުނިތަކުން 'ކޮމްޕެނީ ޓެކްސް ނެގުމުގެ މައްސަލައާއި، މޫސުމަށް އަންނަ ބަދަލުތަކާ ގުޅޭ ސިޔާސަތުގެ ސަބަބުންެނެވެ.
ސްކޮޓް މޮރިސަން ބޮޑުވަޒީރުކަމާ ހަވާލުވެވަޑައިގަތަސް އޭނާއަށް އެމަގާމުގައި ހުންނެވޭނީ ކިހާދުވަހަކު ކަމާމެދު ވަނީ ސުވާލު އުފެދިފައެވެ. ޓާންބުލް ކުރިން ވިދާޅުވެފައި އޮތީ އޭނާއަށް ބޮޑުވަޒީރުކަމުގެ މަގާމު ގެއްލިއެްޖެނަމަ، މެންބަރުކަމުން އިސްތިއުފާދެއްވާނެ ކަމުގައެވެ. އޭނަ އެހެން ހައްދަވައިފިނަމަ، އެ ގޮނޑި ހުސްވެ ބައިއިލެކްޝަނެއް ބާއްވަން ޖެހޭނެއެެވެ. އިދިކޮޅު ލޭބާ ޕާޓީން އެ ގޮނޑި ކާމިޔާބުކޮށްފިނަމަ، ލިބަރަލް ޕާޓީއަށް އޮތް އެއް ގޮނޑީގެ އަޣުލަބިއްޔަތު ގެއްލި އާއްމު އިންތިޚާބަކަށް ދާން ޖެހޭނެއެވެ. ޚިޔާލު ހޯދުމުގެ ވޯޓުތަކުގެ ނަތީޖާއަށް ބަލާއިރު، މިވަގުތު އިންތިޚާބު ބާއްވައިފިނަމަ، ކާމިޔާބުކުރާނީ ލޭބާ ޕާޓީއެވެ.
