ކުރިޔަށް އޮތް ރިޔާސީ އިންތިޚާބުގައި ވާދަކުރައްވާ ރިޔާސީ ކެންޑިޑޭޓުންގެ މެދުގައި ގައުމީ ޔުނިވާރސިޓީ އާއި ޕީއެސްއެމް ގުޅިގެން ބާއްވަން ނިންމާފައިވާ ރިޔާސީ ބަހުސްގައި ބައިވެރިވެވަޑައިގަތުމުގެ ޝައުގުވެރިކަން އިދިކޮޅު ކޯލިޝަނުގެ ކެންޑިޑޭޓް އިބްރާހިމް މުޙަންމަދު ސޯލިޙް (އިބޫ) މިހާރު ނުގެންގުޅުއްވާ ކަމަށް އިބޫގެ ފަރާތުން ހާމަކުރައްވައިފިއެވެ.
އިބޫގެ ތަރުޖަމާނު މާރިޔާ އަޙްމަދު ދީދީ މިއަދު ވިދާޅުވީ ގައުމީ ޔުނިވާރސިޓީން އިންތިޒާމު ކޮށްގެން ބާއްވާ ރިޔާސީ ބަހުސްގައި ބައިވެރިވެވަޑައިގަތުމުގެ ޝައުގުވެރިކަން އިބޫ ކުރިން ގެންގުޅުއްވި ކަމަށާއި ނަމަވެސް އެ ބަހުސްގައި ބައިވެރިވެވަޑައި ނުގެންނެވުމުގެ ވިސްނުންފުޅު މިހާރު ގެންގުޅޭ ސަބަބަކީ ގައުމީ ޔުނިވާރސިޓީގެ ބަހުސް ފިޔަވައި އެހެން އެއްވެސް ފަރާތަކުން ބާއްވާ ރިޔާސީ ބަހުސެއްގައި ބައިވެރިވެވަޑައިނުގަތުމަށް ޕީޕީއެމްގެ ރިޔާސީ ކެންޑިޑޭޓް، ރައީސް ޔާމީން ނިންމަވާފައިވުން ކަމަށެވެ. މާރިޔާ ވިދާޅުވީ ރާއްޖެ ޓީވީން ބާއްވާ ރިޔާސީ ބަހުސްގައި ރައީސް ޔާމީން ބައިވެރިވެވަޑައި ނުގަންނަވާ ނަމަ ގައުމީ ޔުނިވާރސިޓީ އާއި ޕީއެސްއެމް ގުޅިގެން ބާއްވާ ބަހުސްގައި އިބޫވެސް ބައިވެރިވެވަޑައިގަތުން ކޮންމެހެން މުހިންމު ނޫން ކަމަށެވެ.
މާރިޔާ ވިދާޅުވީ ވަކި ތަނަކުން ބާއްވާ ބަހުސެއްގައި ބައިވެރިވެވަޑައި ނުގެންފައި ވަކިތަނަކުން ބާއްވާ ބަހުސްގައި ބައިވެރިވެވަޑައިގަތުމަށް ރައީސް ޔާމީން ނިންމެވުމާއެކު ގައުމީ ޔުނިވާރސިޓީގެ ބަހުސް މިނިވަން ބަހުސަކަށް ވެދާނެކަމާމެދު މިހާރު ވަނީ ސުވާލު އުފެދިފައެވެ.
ގައުމީ ޔުނިވާރސިޓީގެ ބަހުސްގައި ބައިވެރިވެވަޑައިގަތުމަށް އެތަނުން ވަނީ އިބޫ އާއި ރައީސް ޔާމީނަށް ދައުވަތު ފޮނުވާފައެވެ. ރައީސް ޔާމީން ދައުވަތު ގަބޫލުފުޅު ކުރެއްވިކަން ހާމަކުރެއްވިތާ ދެދުވަހެއް ފަހުން އިބޫވެސް ދައުވަތު ގަބޫލުފުޅު ކުރެއްވި ކަމަށް މީޑިޔާއަށް ހާމަވިއެވެ. ނަމަވެސް މާރިޔާ މިއަދު ވިދާޅުވީ އިބޫ އެއްވެސް އިރަކު އެ ދައުވަތު ގަބޫލުފުޅު ނުކުރައްވާ ކަމަށާއި ހަމައެކަނި ޝައުގުވެރިކަން ފާޅުކުރެއްވީ ކަމަށެވެ.
