ސްކޫލްތަކުގައި މަސައްކަތްކުރައްވާ ކައުންސެލަރުން ތަމްރީން ކުރުމުގެ ފުރަތަމަ ޕްރޮގްރާމް އެޑިޔުކޭޝަން މިނިސްޓްރީން މިއަދު ފަށްޓަވައިފިއެވެ.
އަރަބިއްޔާ ސްކޫލުގައި މިއަދު ފެށު ތަމްރީން ޕްރޮގްރާމް މިއަދުން ފެށިގެން މިމަހުގެ 13 ވަނަ ދުވަހުގެ ނިޔަލަށް ކުރިއަށްދާނެއެވެ. މިޕްރޮގްރާމުގައި މާލޭގެ އިތުރަށް 7 އަތޮޅަކުންނާއި 2 ސިޓީއަކުން ޖުމްލަ 33 ކައުންސެލަރުން ބައިވެރިވެ ވަޑައިގަންނަވާ ކަމަށް އެޑިޔުކޭޝަނުން ވިދާޅުވިއެވެ.
މި ޕްރޮގްރާމްގެ މަގްސަދުތަކުގެ ތެރޭގައި ސްކޫލް މާހައުލުގައި މަސައްކަތްކުރާއިރު ދިމާވާ ކުޑަކުދިންނާ ގުޅޭ މައްސަލަތައް އެންމެ އެކަށޭނަ ގޮތެއްގައި ކަމާގުޅޭ މުއައްސަސާ ތަކާއި ގުޅިގެން ހައްލުކުރުމަށް ކުރެވިދާނެ ކަންކަމަށް ކައުންސެލަރުން ހޭލުންތެރި ކުރުވުމާއި، ކުޑަކުދިން ރައްކާތެރި ކުރުމަށް ހެދިފައިވާ ގަވާއިދުތަކާއި ގާނޫނުތަކަށް ސްކޫލް ކައުންސެލަރުން އަހުލުވެރި ކުރުވުން ހިމެނެއެވެ. މީގެ އިތުރަށް ސްކޫލް މާހައުލުގައި ދަރިވަރުންނަށް ދިމާވާ މައްސަލަތައް އެކުދިންނާ ގުޅިގެން ހައްލު ކުރުމުގައި ކައުންސިލަރުންގެ ގާބިލްކަން އިތުރުކުރުންވެސް މަގުސަދުގެ ތެރޭގައި ހިމެނޭ ކަމަށް މިނިސްޓްރީން ވިދާޅުވިއެވެ.
މި ތަމްރީން ޕްރޮގްރާމްގައި އެޑިއުކޭޝަން މިނިސްޓްރީގެ އިތުރުން، މޯލްޑިވްސް ޕޮލިސް ސަރވިސާއި، މިނިސްޓްރީ އޮފް ޖެންޑަރ އެންޑް ފެމިލީ، ޖުވެނައިލް ޖަސްޓިސް ޔުނިޓް އަދި ސޮސައިޓީ ފޮރ ހެލްތް އެޑިއުކޭޝަނުންވެސް ސެޝަންތައް ނަންގަވައި ދެއްވާނެ ކަމަށް އެޑިޔުކޭޝަނުން ވިދާޅުވިއެވެ.
މިއީ އެޑިއުކޭޝަން މިނިސްޓްރީން އިންތިޒާމް ކުރައްވައިގެން ބާއްވަވާ މިފަދަ ފުރަތަމަ ތަމްރީން ޕްރޮގްރާމެވެ.
