ޒިމްބާބްވޭގައި ބޭއްވުނު އާއްމު އިންތިޚާބާއި ރިޔާސީ އިންތިޚާބުގައި މަކަރުހަދާފައި ނުވާކަމަށާއި، އެއީ އިންސާފުވެރި އިންތިޚާބުތަކެއް ކަމަށް ރައީސު އެމަސަން މްނާންގަގްވާ ވިދާޅުވެއްޖެއެވެ. އޭނާ މިހެން ވިދާޅުވީ އިންތިޚާބުގައި މަކަރުހަދާފައިވާކަމަށް އިދިކޮޅު ޕާޓީން ކުރާ ތުހުތުމަތުތަކަށް ރައްދުދެއްވަމުންނެވެ.
އިންތިޚާބުގައި ވާދަކުރެއްވި އިދިކޮޅު ކެންޑިޑޭޓު ނެލްސަން ޗަމީސާ ވަނީ އިންތިޚާބަކީ ލަދުވެތިވާން ޖެހޭވަރަށް މަކަރުހަދާފައިވާ އިންތިޚާބެއް ކަމަށް ވިދާޅުވެފައެވެ.
"ދުނިޔޭގެ ލޯތައް އަހަރުމެންގެ މައްޗަށް ހުއްޓިފައި ތިއްބާ އަހަރުމެން މިވަނީ މިނިވަން، އިންސާފުވެރި، އިތުބާރުކުރެވޭ އިންތިޚާބެއް ބާއްވާފައި" އިއްޔެ ރިޕޯޓަރުންނާ ވާހަކަފުޅު ދައްކަވަމުން ރައީސު މްނާންގަގްވާ ވިދާޅުވިއެވެ. އޭނާއަކީ އެއް އިރެއްގައި ކުރީގެ ރައީސު ރޮބަޓް މުގާބޭގެ އެންމެ އަރިސް ބޭފުޅާއެވެ.
"އެއްވެސް ޑިމޮކްރެޓިކް ހަރަކާތަކީ ގޯހެއް ނުހިނގާނެ ހަރަކާތެއް ނޫން" އޭނާ އިތުރަށް ވިދާޅުވިއެވެ. ޒިމްބާބްވޭގައި މިފަހަރު ބޭއްވުނު އިންތިޚާބަކީ މުގާބޭގެ 37 އަހަރުގެ ވެރިކަމުގައި ބޭއްވި އިންތިޚާބުތަކުގައި މަަކަރު ހަދާފައިވާ ފެންވަރަށް މަކަރު ހަދާފައިވާ އިންތިޚާބެއް ނޫންކަން ރިޕޯޓަރުންވެސް ފާހަގަކޮށްފައި ވެއެވެ.
ޒިމްބާބްވޭ އިލެކްޓޯރަލް ކޮމިޝަން (ޒެޑްއީސީ) އިން އިއުލާންކުރި ރަސްމީ ނަތީޖާއިން ދައްކާ ގޮތުގައި ވެރިކަންކުރާ ޒާނޫ-ޕީއެފް ޕާޓީގެ ކެންޑިޑޭޓު، ރައީސު އެމަސަން މްނާންގަގްވާއަށް ލިިބިވައިޑައިގަތީ 50.08 އިންސައްތަ ވޯޓެވެ. އިދިކޮޅު މޫވްމެންޓް ފޯ ޑިމޮކްރެޓިކް ޗޭންޖް (އެމްޑީސީ) ގެ ކެންޑިޑޭޓް ނެލްސަން ޗަމީސާއަށް ލިބިވަޑައިގަތީ 44.3 އިންސައްތަ ވޯޓެވެ. ދެވަނަ ދައުރަކަށް ދާންޖެހޭ ވަރަށްވުރެ އިތުރަށް މްނާންގަގްވާއަށް ލިބިވަޑައިގަތީ އެންމެ 0.08 އިންސައްތަ ވޯޓެވެ.
އެހެންނަމަވެސް، ޗަމީސާ ވިދާޅުވެފައި ވަނީ ހަގީގަތުގައި މޮޅުވީ އޭނާ ކަމަށާއި، "މަަކަރުހަދާފައިވާ، ޣައިރުގާނޫނީ، ސައްހަކަމެއް ނެތް" އިންތިޚާބު ކުށްވެރިކުރައްވާ ކަމަށެވެ. އަދި އޭނާ ވަނީ އިންތިޚާބުގެ މައްސަަލަ ކޯޓަށް ވައްދަވާނެކަމަށް ވިދާޅުވެފައެވެ.
އިންތިޚާބުގައި މަކަރުހަދާފައިވާ ކަމަށް އިދިިކޮޅު ޕާޓީން ކުރާ ތުހުތުމަތުތަކާ ގުޅިގެން ހަރާރޭގައި ވަނީ ސަރުކާރާ ދެކޮޅަށް ވަރުގަދަ މުޒާހަރާތަކެއް ކޮށްފައެވެ. މުޒާހަރާތައް މައިތިރިކުރަން ސިފައިން ބަޑިޖެހުމާ ގުޅިގެން ހަ މީހަކު މަރުވެފައި ވެއެވެ.
ޒެޑްއީސީން ވަނީ މަކަރު ހަދާފައިވާކަން ދޮގުކޮށްފައެވެ. އީޔޫގެ މޮނިޓަރުން ބުނެފައި ވަނީ ސިފައިން ތާއީދާއި، ސަރުކާރުގެ މުއައްސަަސާތަކުގެ ކޮންޓްރޯލާއެކު މްނާންގަގްވާ "ކުޅުއްވާފައި ވަނީ ހަމަހަމަކަމެއް ނެތް ދަނޑެއްގައެވެ."
އިންތިޚާބު އޮބްޒާވްކުރި އަމިއްލަ ޖަމާއަތެއް ކަމުގައިވާ ޒިމްބާބްވޭ އިލެކްޝަން ސަޕޯޓު ނެެޓްވާކުން ލަފާކޮށްފައިވަނީ އިދިކޮޅު ކެންޑިޑޭޓް ޗަމީސާއަށް 47.8 އިންސައްތަ ވޯޓު ލިބިވަޑައިގަންނަވާނެކަމަށެވެ.
އާއްމު އިންތިޚާބުގެ ނަތީޖާ ދައްކާގޮތުން ވެރިކަންކުރާ ޒާނޫ-ޕީއެފަށް ގާނޫނުހަދާ މަޖިލީހުގެ 201 ގޮނޑީގެ ތެރެއިން 210 ގޮނޑި ލިބުނު އިރު، އިދިކޮޅޫ އެމްޑީސީއަށް ލިބުނީ 60 ގޮނޑިއެވެ.
