ފާއިތުވި އާދީއްތަ ދުވަހު ތަޖިކިސްތާނުގެ ވެރިރަށް ދުޝަންބޭގެ 150 ކިލޯމީޓަރު ދެކުނުން ބައިސިކަލް ދުއްވާފައި ދިޔަ ބަޔަކަށް ހަމަލާދީ މަރާލި މީހުން ތަމްރީނު ހޯދާފައި ވަނީ އީރާނުން ކަމަށް ތަޖިކިސްތާނުން ބުނެފިއެވެ. އެ ހަމަލާގައި ހުޅަނގުގެ 4 ފަތުރުވެރިން މަރުވެފައިވާ އިރު އިސްލާމިކް ސްޓޭޓް އޮފް އިރާގު އެންޑް ސީރިޔާ (އައިސިސް) އިން ވަނީ ހަމަލާގެ ޒިންމާ އުފުލާފައެވެ.
ހުޅަނގުގެ 7 ފަތުރުވެރިއަކު ބައިސިކަލް ދުއްވާފައި ދަނިކޮށް ކާރަކުން އެމީހުން ގައިގައި ޖެއްސުމަށްފަހު ހަތިޔާރު އެޅި ބަޔަކު އެމީހުންނަށް ހަމަލާދީފައި ވެއެވެ. އެ ހަމަލާގައި އެމެރިކާ ދެމީހުންނާއި، ސުވިޒަލޭންޑުގެ މީހަކާއި ނެދަލޭންޑްސްގެ މީހަކު މަރުވެފައިވާއިރު، ސުވިޒަލޭންޑުގެ މީހަކާއި، ނެދަލޭންޑްސްގެ މީހަކާއި، ފްރާންސުގެ މީހަކު މީހަކު ވަނީ ސަލާމަތްވެފައެވެ.
ހަމަލާއަށް ފަހު އެ ހަމަލާގެ ޒިންމާ އުފުލައި އައިސިސްއިން ނެރުނު ކުރު ވީޑިއޯގައި ވަނީ ހަމަލާ ދިން 5 މީހުން އައިސިސްގެ ޒައީމު އަބޫބަކްރު އަލްބަޣްދާދީއަށް ތަބައަވާކަން ހާމަކުރާ މަންޒަރު ދައްކާފައެވެ.
އެ ހާދިސާއަކީ މަގުމަތީގެ އެކްސިޑެންޓެއް ކަމަށް ފުރަތަމަ ބުނި ނަމަވެސް، ތަޖިކިސްތާނުން ފަހުން ބުނެފައި ވަނީ އެއީ ޓެރަރިސްޓް ހަމަލާއެއް ކަމަށާއި، ހަމަލާދިން މީހުންގެ އަތުގައި ބަޑިއާއި، ވަޅި ހުރި ކަމަށެވެ.
އައިސިސް އިން ހަމަލާގެ މަސްއޫލިއްޔަތު އުފުލި ނަމަވެސް، އެމެރިކާއިން ހޯމަ ދުވަހު ބުނެފައި ވަނީ ހަމަލާދިނީ އައިސިސްކަން ދޭހަވާ ހެއްކެއް ފެންނަން ނެތް ކަމަށެވެ. އަދި އަންގާރަ ދުވަހު ތަޖިކިސްތާނުގެ ދާޚިލީ ވުޒާރާއިން ބުނެފައި ވަނީ ހަމަލާ ދިނީ މަނާކުރެވިފައިވާ އިދިކޮޅު ސިޔާސީ ޕާޓީއެއް ކަމަށްވާ އިސްލާމިކް ރިނެއިސެންސް ޕާޓީ އޮފް ތަޖިކިސްތާން ކަމަށާއި، ހަމަލާދިން މީހުން ހަރަކާތްތެރިވެފައި ވަނީ އެޕާޓީގެ އިސް ހަރަކާތްތެރިއެއް ކަމަށް ނަސީރު ޚައުދަޖީ އުބައިދޯފްގެ އަމުރަށް ކަމަށެވެ.
ތަޖިކިސްތާނު ސަރުކާރުން ބުނި ގޮތުގައި ހަމަލާދިނުމުގައި އިސްކޮށް ހަރަކާތްތެރިވީ އެޕާޓީގެ މެންބަރެއް ކަމަށްވާ ހުސައިން އަބްދުއްސަމަދޯފް އެވެ. އަދި އޭނާ ވަނީ "ގެއްލުން ދެނިވި ހަމަލާތަކެއް ދިނުމަށް އާގީދާގެ ގޮތުންނާއި، އަސްކަރީގޮތުން އީރާނުގައި ތަމްރީނު ހޯދާފައެވެ." އަދި މިބޭނުމުގައި 2014 ވަނަ އަހަރާއި 2015 ވަނަ އަހަރު އޭނާ ހަތަރު ފަހަރު އީރާނުގެ ޤުމްއަށާއި، މަޒަންދާރަށް ގޮސްފައި ވެއެވެ.
އެހެންނަމަވެސް، އަންގާރަ ދުވަހު މިކަން ދޮގުކުރަމުން އީރާނުގެ ފޮރިން މިނިސްޓްރީން ބުނެފައި ވަނީ އެހަމަލާ ހަރުކަށި އިބާރާތުން ކުށްވެރިކުރާ ކަމަށާއި، އެހަމަލާގައި އީރާނުގެ އެއްވެސް ބައިވެރިވުމެއް ނުވާ ކަމަށާއި، އީރާނުގައި ޓެރަރިސްޓުން ތަމްރީނުކުރާ މަރުކަޒުތަކެއް ނުހުންނާނެ ކަމަށެވެ.
