މާލެއާއި ހުޅުލެއާ ދެމެދު އަޅައިފައިވާ ބުރިޖުގައި ދަތުރު ކުރުމަށް 9 ބަސް މިއަދު މާލެ ގެނެސްފިއެވެ.
މިބަސްތައް ގެނައީ ބުރުޖުގައި ދަތުރުކުރުމުގެ އިންތިޒާމް ހަމަޖެއްސުމަށް ހަވާލުކޮށްފައިވާ މޯލްޑިވްސް ޕޯޓްސް ލިމިޓެޑް (އެމްޕީއެލް) އިންނެވެ. މިއަދު 9 ބަސް ގެނެސްފައިވިޔަސް ޖުމްލަ 22 ބަސް ބުރިޖުގައި ދަތުރު ކުރުމަށް ބޭނުން ކުރާނެއެވެ. އޭގެތެރޭގައި 30 މީހުންގެ ޖާގައިގެ ކުދި ބަސްތަކާއި 100 މީހުންގެ ޖާގައިގެ ބަސްތައް ވެސް ހިމެނެއެވެ. މިބަސްތައް ގެނައުމަށް ހަމަޖެހިފައިވަނީ އެކިފަހަރު މަތިންނެވެ.
އެމްޕީއެލްއިން މިހާރުވަނީ 45 ބަސް ޑްރައިވަރުން ހޯދަން ވެސް އިއުލާން ކުރައްވައިފައެވެ. ބުރިޖު ހުޅުވުމަށް ހަމަޖެހިފައިވަނީ އަންނަ އޮގަސްޓްމަސްތެރޭގައެވެ.
