ދިވެހި ޤައުމީ ބޭންކް ބީއެމްއެލްގެ މާލީ ހާލަތު މިވަގުތު އޮތީ ވަރަށް ރަނގަޅު ހާލަތެއްގައިކަމަށް އެބޭންކްގެ ސީއީއޯ އެންޑްރޫ ހީލީ ވިދާޅުވެއްޖެއެވެ.
ބީއެމްއެލްގެ ކޯޕަރޭޓް ބޭންކިންގ ޑައިރެކްޓަރގެ މަޤާމަށް އަލަށް ބޭފުޅަކު އައްޔަނުކުރުމާއި ގުޅިގެން ހީލީ ވިދާޅުވީ، މިދިއަ އަހަރު ބީއެމްއެލްއަށް ކޯޕަރޭޓް ބޭންކިންގ އިން ވަރަށް ރަނގަޅު ނަތީޖާތަކެއް ހާސިލްވެފައިވާކަމަށެވެ. މިގޮތުން ހުސްވިއަހަރުގެ ތެރޭގައި އަލަށް ދޫކުރި ލޯންތައް ދެގުނަ އިތުރުވެފައިވާކަން ހީލީ ފާހަގަކުރެއްވިއެވެ.
ބީއެމްއެލްގެ ކޯޕަރޭޓް ބޭންކިންގ ޑައިރެކްޓަރެއްގެ ގޮތުގައި އަލަށް އައްޔަނުކޮށްފައިވަނީ އިންޑިއާގެ އެކިއެކި ބޭންކްތަކުގައި އިސް ބޭފުޅެއްގެ ގޮތުގައި ހަރަކާތްތެރިވެފައިވާ ކުލްދީޕް ޕަލިވާލްއެވެ. އޭނާ ވަނީ ބޭންކިންގގެ ދާއިރާގައި ސަތާރަ އަހަރަށްވުރެ ގިނަ އަހަރު ހޭދަކޮށްފައެވެ.
މިކަމާއި ބެހޭގޮތުން ހީލީ ވިދާޅުވީ ކުލްދީޕް ފަދަ ތަޖުރިބާހުރި ބޭފުޅަކާއިއެކު ބީއެމްއެލްގެ ވިޔަފާރި އިތުރު ހަރުފަތަކަށް ކުރިއަށްގެންދެވޭނޭކަމަށެވެ.
