ޕާކިސްތާނުގެ ކުރީގެ ބޮޑުވަޒީރު މިޔާން މުޙައްމަދު ނަވާޒު ޝަރީފާއި އޭނާގެ ދަރިކަނބަލުން މަރްޔަމް ނަވާޒު ރޭގެ ވަގުތެއްގައި ޕާކިސްތާނަށް ވަޑައިގަތުމާއެކު އެ ދެބޭފުޅުން ހައްޔަރުކޮށްފިއެވެ. ދެބޭފުޅުން ވަޑައިގެންނެވީ ލަންޑަނުން ފުރާވަޑައިގެން އަބޫދާބީ މަގުން ލާހޯރަށެވެ. އަބޫދާބީ އެއާޕޯޓުން އެ ދެބޭފުޅުން ހައްޔަރުކުރާނެ ކަމުގެ ޚަބަރު ފެތުރުނު ނަމަވެސް އެކަން އެގޮތަށް ހިނގާފައި ނުވެއެެވެ.
ނަވާޒު ޝަރީފާއި ދަރިކަނބަލުން މަރްޔަމް ދަތުރުކުރެއްވި އިއްތިހާދު އެއާވޭޒްގެ ފްލައިޓު ލާހޯރުގެ އައްލާމާ އިޤްބާލް އިންޓަނޭޝަނަލް އެއާޕޯޓަށް ޖެއްސުމާއެކު، ދެބޭފުޅުން ނޭޝަނަލް އެކައުންޓެބިލިޓީ ބިއުރޯ (އެންއޭބީ) ގެ އޮފިސަރުންގެ ބެލުމުގެ ދަށަށް ގެންދެވުނެވެ.
ލާހޯރު އެއާޕޯޓުގެ ބޭރުގައި ނަވާޒު ޝަރީފަށް ތާއީދުކުރާ އެތައްހާސް ބަޔަކު މުޒާހަރާކުރަމުން ދިއުމާއެކު އެއާޕޯޓުން ބޭރަށް އޭނާ ނުކުމެވަޑައިގަތުމަކި ސަލާމަތީގޮތުން ރަނގަޅު ކަމަކަށް ނުވާނެތީ، އޭނާއާއި ދަރިކަނބަލުން އިސްލާމްއާބާާދަށް ގެންދެވުނީ ޗާޓަރު ފްލައިޓެއްގައެވެ. އިސްލާމްއާބާދުން އެދެބޭފުޅުން ވަނީ ރާވަލްޕިންޑީގެ އަޑިޔާލާގައި ހުންނަ ސެންޓްރަލް ޖަލަށް ގެންދެވިފައެވެ.
ނަވާޒު ޝަރީފާއި ދަރިކަނބަލުން އެކައުންޓެބިލި ކޯޓަށް ހާޒިރުކުރަން ޖެހޭ ނަަމަވެސް، އެކަމުގައި އޮތް ސަލާމަތީ ނުރައްކާ ބޮޑުކަމުން، އެންއޭބީގެ ޕްރޮސިކިއުޓަރުން ވަނީ އެ ދެބޭފުޅުން ހާޒިރު ނުކުރުމުގެ ހުއްދައަކަށް ކޯޓުގައި އެދިފައެވެ.
'އެވެންފީލްޑް ރެފަރެންސް' މައްސަލައިގައި ނަަވާޒު ޝަރީފު 10 އަހަރަށް ޖަލަށް ލުމަށާއި، 8 މިލިއަން ޕައުންޑުން ޖުރުމާނާ ކުރުމަށް އެ ގައުމުގެ އެކައުންޓެބިލިޓީ ކޯޓުން ވަނީ ހުކުމްކޮށްފައެވެ. މީގެ އިތުރަށް އޭނާގެ ދަރިކަނބަލުން މަރްޔަމް ނަވާޒު 7 އަހަރަށް ޖަލަށް ލުމަށާއި، 2 މިލިއަން ޕައުންޑުން ޖުރުމާނާ ކުރުމަށް އަދި ލިޔެކިއުންތައް އޮޅުވާލި މައްސަލައިގައި މަރްޔަށް އެއް އަހަރަށް ޖަަލަށް ލުމަށް ވެސް އެ ކޯޓުން ހުކުމްކޮށްފައި ވެއެވެ. އަދި މަރްޔަމް ނަވާޒުގެ ފިރިކަލުން ކެޕްޓަން (ރިޓަޔާޑް) މުޙައްމަދު ސަފްދަރު އެއް އަހަރަށް ޖަލަށްލުމަށާއި، މަރްޔަމް އާއި ސަފްދަރު އިންތިޚާބުކުރެވޭ އެއްވެސް މަޤާމަކަށް 10 އަަހރު ވަންދެން ކުރިމަތިނުލެވޭނެގޮތަށް ހެދުމަށްވެސް އެކޯޓުގެ ހުކުމުގައި ވެއެވެ.
ނަަވާޒު ޝަރީފުގެ އަނބިކަނބަލުން ބޭގަމް ކުލްސޫމް ނަވާޒު ދަނީ ލަންޑަނުގެ ހޮސްޕިޓަލެއްގައި ކަރުގެ ކެންސަރަށް ފަރުވާ ހޯއްދަވަމުންނެވެ. މިވަގުތު އޭނާ އައިސީޔޫގައި އޮންނެވި ނަމަވެސް، ނަވާޒު ޝަރީފު ނިންމެވީ ޖަލު ހުުކުމާއި ކުރިމަތިލެއްވުމަށް ގައުމަށް އެނބުރިވަޑައިގަތުމަށެވެ.
