ދުނިިޔޭގެ ކަންކޮޅުތަކުގައި ހިފާފައިވާ ބިންތަކުގައި އުފައްދާ ތަކެތި ވިއްކުން މަނާކުރާ ގާރާރެއް އަޔަލޭންޑުގެ ސެނެޓުން ފާސްކޮށްފިއެވެ. މި ގަރާރުގައި އިސްލާއީލުން ނުހައްގުން ހިފައި އަތްގަދަކޮށްގެން އުޅޭ ފަލަސްޠީނުގެ ބިންތަކުގައި ބިނާކޮށްފައިވާ ޔަހޫދީ އާބާދީތަކުގައި އުފައްދާ ތަކެތިވެސް ހިމެނެއެވެ.
ރުޅިވެރިކަމާއެކު އެ ގަަރާރަށް ރައްދު ދެމުން އިސްރާއީލުން ބުނީ އެއީ "ތަފާތުކުރުން ހިމެނޭ، ހައްދު ފަހަނައަޅާފައިވާ، ނުރައްކާތެރި" ގަރާރެއް ކަމުގައެވެ. ފަލަސްޠީނުން ވަނީ ގަރާރަށް މަރުހަބާ ކިޔާފައެވެ. ޕެލެސްޓައިން ލިބަރޭޝަން އޯގަނައިޒޭޝަން (ޕީއެލްއޯ) ގެ ތަރުޖަމާނު ސިފަކުރި ގޮތުގައި އެ ގަރާރަކީ "ތާރީޚީ، ހިތްވަރުގަދަ" ނިންމުމެކެވެ.
އަޔަލޭންޑުގެ ސެނެޓުގެ މިނިވަން މެންބަރެއް ކަމުގައިވާ ފްރާންސިސް ބްލެކް ހުށަހެޅި އެ ގަރާރަށް ވެރިކަންކުރާ ޕާޓީ ފައިން ގާއެލް ފިޔަވައި އެހެން ހުރިހާ ސިޔާސީ ޕާޓީއަކުން ތާއީދުކުރިއެވެ.
އަޔަލޭންޑު ސަރުކާރުން ބުނީ ޔޫރަޕިއަން ޔުނިއަން (އީޔޫ) ގެ މެންބަރު އެއްވެސް ގައުމަކުން މީގެ ކުރިން އެފަދަ ގަރާރެއް ފާސްކޮށްފައި ނުވާކަމަށާއި، އެއީ އަމަލީގޮތުން ތަންފީޒުކުރެވޭނެ ގަރާރެއް ނޫންކަމަށެވެ. އެއީ، އީޔޫގެ ގުޅިފައިވާ ވިޔަފާރީގެ ބަޒާރުގައި އެ ގަރާރުން ހުރަހެއް ގާއިމުކުރާތީ ކަމަށާއި، އެކަމުން އެ ބާޒާރުގައި އަޔަލޭންޑުގެ ނުފޫޒަށް އަސަރުކުރާނެ ކަމަށެވެ.
އަތްތިލަބަޑީގެ ގަދަ އަޑާއެކު، އަޔަލޭންޑުގެ ސެނެޓުން "އިގްތިސާދީ ހަރަކާތްތައް ހިފެހެއްޓުން (ހިފާފައިވާ ބިންތައް)" ގެ ނަމުގައި ގަރާރު ފާސްކުރީ 20 ވޯޓުގެ އަޣުލަބިއްޔަތުނެވެ. ދެކޮޅަށް ވޯޓުލީ 5 މެންބަރުންނެވެ. ގަރާރު ފާސްވުމަށް ފަހު، އެ ހުށަހެޅި ސެނެޓަރު ބްލެކް ބުނީ "އަހަރުމެންގެ ކުރިމަތީގައި އޮތް ރާސްތާ ދިގު ވެދާނެ. އެހެންނަަމެވެސް، އަހަރެންނަށް ގަބޫލުކުރެވޭ ގޮތުގައި އަހަރުމެންނަށް މައްސަލަ ސާފުކޮށްދެވިއްޖެ" ކަމުގައެވެ.
އެ ގަރާރަށް ރުޅިވެރިކަމާއެކު ރައްދު ދިނުމުގެ އިތުރަށް، އިސްރާއީލުން ވަނީ އަޔަލޭންޑުގެ ސަފީރު ހާޒިރުކޮށް ސުވާލުވެސް ކޮށްފައެވެ.
ގަރާރަށް ތާއީދު ކުރާ މީހުން ބުނިގޮތުގައި އިސްރާއީލުން ދަނީ ހިފާފައިވާ ބިންތަކުގައި ތަކެތި އުފައްދައިގެން އެތަކެތިން ނުހައްގުން ފައިދާ ނަގަމުންނެވެ.
އަޔަލޭންޑުގެ ގާނޫނުހަދާ މަޖިލީހުގެ އުސޫލުތަކާ އެއްގޮތަށް އެ ގަރާރު ދެން ފޮނުވާނީ މަޖިލީހުގެ ކޮމިޓީއަކަށެވެ. ކޮމިޓީގައި ބަހުސްުކުރުމަށް ފަހު އެ ގަރާރު މަޖިލީހުގެ ތިރިގެއިން ފާސްކުރަން ޖެހެއެވެ.
