ގައުމެއް އިސްލާހުވާނީ އެ ގައުމެއްގައި ތިއްބަވާ އިލްމުވެރިންނާއި އަމުރުވެރިން އެއްބައިވެ ގުޅިގެން ކަމަށް މަޝްހޫރު އިލްމުވެރިޔާ ޑރ. މުހައްމަދު ގުބާދު އަބޫބަކުރު ވިދާޅުވެއްޖެއެވެ.
ޑރ. ގުބާދު މިހެން ވިދާޅުވީ ބައެއް އިލްމުވެރިންގެ ތާއީދު ޕީޕީއެމްގެ ރިޔާސީ ކެންޑިޑޭޓް ރައީސް ޔާމީނާއި އެމަނިކުފާނުގެ ރަނިންމޭޓް ޑރ. މުހައްމަދު ޝަހީމް އަލީސައީދަށް ތާއިދު ކުރައްވާކަން ހާމަކުރެއްވުމަށް މިއަދު ބޭއްވީ ނޫސްވެރިންގެ ބައްދަލުވުމެއްގައެވެ.
"އަމުރުވެރިން އެއްމަގަކުންދާއިރުގައި އިލްމުވެރިން އަނެއް މަގަކުންދާ ކަމަށްވާނަމަ އެގައުމެއް އިސްލާހުގެ މަގުންދިޔުމަށް ފަސޭހައެއްނުވާނެ،" އޭނާ ވިދާޅުވިއެވެ.
ޑރ. ގުބާދު ވިދާޅުވީ ކުރިއަށްއޮތް ރިޔާސީ އިންތިޚާބުގައި ވާދަކުރައްވަން އެންމެ އެކަށީގެންވާ ޕެއއާއަކީ ރައީސް ޔާމީނާއި ޑރ. ޝަހީމްގެ ޕެއާ ކަމަށް އޭނާ ވިދާޅުވިއެވެ.
"އަޅުގަނޑުމެން އެންމެހާ އިލްމުވެރިން ގަބޫލުކުރާ ގޮތުގައި ދިވެހިރާއްޖޭގެ ގައުމީ ނައު، ދިވެހިރާއްޖޭގެ ދީނީ ނައު، އަމާން ބަނދަރަކަށް ވާސިލް ވުމަށްޓަކައި އެންމެ ރަނގަޅު ޕެއާއަކީ އަޅުގަނޑުމެން ގަބޫލުކުރާ ގޮތުގައި ޕީޕީއެމްއެގެ ކެންޑިޑޭޓާއި ފަޝީލަތުއްޝައިޚު މުހައްމަދު ޝަހީމް އަލީ ސައިދުގެ މައްޗަށް އެކުލެވޭ ޕެއާ،" ޑރ. ގުބާދު ވިދާޅުވިއެވެ.
