ދެ މީހުންނާއެކު ހާލުގައި ޖެހިފައިއޮތް ޑިންގީއެއް އަރި އަތޮޅުން ފެނިޖެއެވެ. އެމްއެންޑީއެފުން ވިދާޅުވީ އެ ޑިންގީ ފެނިވައިވަނީ އަރިއަތޮޅު ހުޅަނގުން 60 ނޯޓިކަލް މޭލު ބޭރުން ކަމަށެވެ.
މި ޑިންގީ ފެނިވައިވަނީ ރަސްދޫ "ރަންދުވެލި" މަސް ދޯންޏަށް ކަމަށް ވެސް އެމްއެންޑީއެފްގެ ތަރުޖަމާނު ކެޕްޓަން އިބްރާހީމް އާޒިމް ވިދާޅުވިއެވެ.
އެ ޑިންގީއާއި މީހުން ސަލާމަތް ކުރުމުގެ މަސައްކަތް އެމްއެންޑީއެފުން މިހާރު ފަށައިފައިވާ ކަމަށްވެސް އާޒިމް ވިދާޅުވިއެވެ. އެ މީހުންނަށް އެހީވުމަށްޓަކައި އެމްއެންޑީއެފް ކޯސްޓްގާޑުގެ ފާސްޓަރ އިންޓަރސެޕްޓަރ ވެލާނާ މިހާރު ދަނީ އެދިމާއަށް ދަތުރު ކުރަމުންނެވެ.
އާޒިމް ވިދާޅުވީ މިހާދިސާގެ މައުލޫމާތު އެމްއެންޑީއެފަށް ލިބިފައިވަނީ މިއަދު މެންދުރުފަހު 14:04 ގައި ކަމަށެވެ.
ހަވީރު 6:00 ގައި ސިފައިންވަނީ ޑިންގީގައިތިބި ދެމީހުން ލޯންޗަށް ނަގައިފައެވެ. އެމީހުން ގޮވައިގެން އެ ލޯންޗު މިހާރު މާލެއަށް ދަތުރު ކުރަމުން އަންނަ ކަމަށް އާޒިމް ވިދާޅުވިއެވެ. އެ ދެމީހުންނަކީވެސް ބޭރުގެ ދެމީހުންނެވެ. މިކަން ތަހުގީގު ކުރާނީ ފުލުހުންނަށް ވުމުން އެމީހުން ހަވާލު ކުރާނީ ފުލުހުންނާ ކަމަށް ވެސް އާޒިމް ވިދާޅުވިއެވެ. މިއީ ކޮން ގައުމެއްގެ ބައެއް ކަމެއް އަދި އެނގިފައެއް ނުވެއެވެ.
