ރާއްޖޭގައި ޕްލާސްޓިކް ރީސައިކަލް ކުރެވޭ ބޮޑު ލެބެއް ގާއިމް ކުރުމުގެ ވިސްނުން ގެންގުޅުއްވާ ކަމަށް ވޭސްޓް މެނޭޖުމެންޓް ކޯޕަރޭޝަން (ވެމްކޯ) އިން ވިދާޅުވެއްޖެއެވެ.
ވެމްކޯގެ މެނޭޖިން ޑިރެކްޓަރ މުހައްމަދު ޝިފާއު ވިދާޅުވީ އެފަދަ ލެބެއް ގާއިމްކުރައްވާނީ މިމަހު 5 ވަނަ ދުވަހު މާލޭގައި ގާއިމްކުރު ލެބުގެ ތަޖުރިބާއަށް ބައްލަވާފައި ކަމަށެވެ.
މާލޭ އިންޑަސްޓްރިއަލް ވިލެޖުގައި ޖޫން 5 ވަނަ ދުވަހު ގާއިމްކޮށްފައިވާ ލެބަކީ ރީސައިކަލް ކުރެވޭކަމާއި އެކަމާބެހޭ މައުލޫމާތު ސްކޫލް ކުދިންނަށް ފޯރުކޮށް ދެއްވުމަށް ގާއިމްކޮށްފައިވާ އެޑިޔުކޭޝަނަލް ލެބެއް ކަމަށް ޝިފާއު ވިދާޅުވިއެވެ.
"އެއީ ސްޓޫޑެންޓުންނަށް (ކިޔަވާ ކުދިންނަށް) ރީސައިކަލް ކުރޭވޭ ގޮތް ކިޔާލަދޭން ގާއިމްކުރި ލެބެއް. އެއީ މާސް ޕްރޮޑަކްޝަންއަށް އެއްޗެހި ތައްޔާރު ކުރެވޭ އެއްޗެއްނޫން. އެއީ އެޑިޔުކޭޝަނަލް އެއްޗެއް ވަރަށް ކުޑައެއްޗެއް އެއީ. އޭގެ އެކްސްޕީރިއަންސަށް ބަލާއިފައި މާސް ޕްރޮޑަކްޝަން އެއްޗަކަށް ދާނީ. އެވިސްނުން ވެމްކޯއިން އެބަ ގެންގުޅެން،" ޝިފާއު ވިދާޅުވިއެވެ.
އޭނާ ވިދާޅުވީ މާލޭ ސަރަހައްދުގެ ކުނިޖަމާކޮށް ނައްތާލުމުގެ މަސައްކަތް ކުރަމުންދަނީ ތިލަފުށީގައި ކަމުން ޕްލާސްޓިކް ރީސަކަލް ކުރާ ލެބްހަދާނީ ތިލަފުށީގައި ކަމަށް އޭނާ ވިދާޅުވިއެވެ.
