ރަސްރަނި ބަގީޗާގައި ސަރުކާރުން ގާއިމްކޮށްފައިވާ "ރަސްރަނަ ވިންޓަރޕާކް" މިރޭ ހުޅުވައިދެއްވައިފިއެވެ.
ރަސްރަނި ޕާކުގައި މިރޭ ބޭއްވި ރަސްމިއްޔާތުގައި އެޕާކު ހުޅުވައި ދެއްވީ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމްގެ އަނބިކަނބަލުން (ފަސްޓް ލޭޑީ) ފާޠިމަތު އިބްރާހީމް އެވެ.
ޕާކު ހުޅުވުމުގެ ރަސްމިއްޔާތުގައި ރައީސުލްޖުމްހޫރިއްޔާ ވެސް ބައިވެރިވެ ވަޑައިގެންނެވިއެވެ. ވިންޓަރ ޕާކް ހުޅުވައި ދެއްވުމަށްފަހު ރައީސްގެ ދެކަނބަލުންވަނީ ޕާކް ބައްލަވާލައްވައިފައެވެ.
ރަސްރަނި ވިންޓަރ ޕާކަކީ ދިވެހިރާއްޖޭގެ ތާރީޚުގައިވެސް ވިންޓަރ ތީމްއަކަށް ހަދާފައިވާ މިފަދަ ފުރަތަމަ ޕާކެވެ. މި ޕާކު ފަރުމާ ކޮށްފައިވަނީގައި އޮލިމްޕިކް ފެންވަރުގެ އައިސް ސްކޭޓްކުރާ ރިންކަކާއި، ސްނޯ ސްލައިޑްއެއް ހިމެނޭ ގޮތަށެވެ. މިޕާކަކީ ފަރަންސޭސީވިލާތާއި، ސްވިޒަލޭންޑުގެ ދެ ކުންފުންޏަކު މާލެ އައިސް ސާވޭ ކޮށްގެން ތަރައްގީ ކޮށްފައިވާ ޕާކެކެވެ.
މިރަސްމިއްޔާތުގައި ވިންޓަރ ޕާކް ތެރޭގައި އައިސް ސްކޭޓިންގއާއި، ސްނޯގެ އެކިއެކި ޙަރަކާތްތައް ދައްކާލާފައިވެއެވެ. ރައީސުލްޖުމްހޫރިއްޔާގެ ދެކަނބަލުންގެ އަރިހުގައި މިނިސްޓަރ އޮފް ހައުސިންގ އެންޑް އިންފްރާސްޓްރަކްޗަރ ޑޮކްޓަރ މުޙައްމަދު މުޢިއްޒާއި، ޗީފް އޮފް ޑިފެންސް ފޯސް މޭޖަރ ޖެނެރަލް އަޙްމަދު ޝިޔާމް ބައިވެރިވެވަޑައިގެންނެވިއެވެ.
