ރަސްރަނި ބަގީޗާގައި ހަދާ "ވިންޓަރ ޕާކް" ފިތުރު އީދު ދުވަހު ހުޅުވަން ތައްޔާރުވަމުންދާ ކަމަށް ހައުސިން މިނިސްޓަރ ޑރ. މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު ކުރެއްވި ޓްވީޓެއްގައި ވިދާޅުވެފައިވަނީ ކުޑައީދު ދުވަހު އެޕާކު ހުޅުވުމަށް ވާންޖެހޭ ހުރިހާ ތައްޔާރީތަކެއް ކުރައްވަމުން ގެންދަވާ ކަމަށެވެ. "ރަސްރަނި ބަގީޗާގައި ހަދާ "ވިންޓަރ ޕާކް" ފިތުރު އީދު ދުވަހު ހުޅުވުމަށް ވާންޖެހޭ އެންމެހާ ތައްޔާރީތައް ދަނީ ކުރިއަށް،" މިނިސްޓަރުގެ ޓްވީޓުގައި ވިދާޅުވެފައިވެއެވެ.
އެތަން މިހުޅުވަނޫ ތަފާތު ސަބަބުތަކާހެދި ކުރިން ދީފައިވާ ތާރީޚުތަކުގައި ނުހުޅުވި ދިގުދެމިގެން ދިޔުމަށްފަހުގައެވެ. އެތަނުގައި ކެފޭއެއް ހިންގާނެ ބަޔަކު ހޯދުމަށް ވެސް މިނިސްޓްރީން ވަނީ އިއުލާން ކުރައްވައިފައެވެ. އެ ކެފޭ ހިންގާ މީހުން ވިންޓަރޕާކް ހިންގުމުގެ ހުރިހާ ޚަރަދެއް ކުރާނެ ކަމަށް ހައުސިން މިނިސްޓްރީން ކުރިންވަނީ ވިދާޅުވެފައެވެ.
ރައީސް ޔާމީން މިއަހަރުގެ ފިތުރު އީދު ސަލާން ކުރެއްވުން ވެސް އޮންނާނީ ރަސްރަނި ބަގީޗާގައެވެ. ބެލެވޭ ގޮތުން ވިންޓަރ ޕާކް ހުޅުވައި ދެއްވާނީ ވެސް އެމަނިކުފާނެއެވެ.
