މިއަހަރުގެ ރިޔާސީ އިންތިޚާބު އަންނަ ސެޕްޓެމްބަރު މަހު 23 ވަނަ ދުވަހު ބާއްވާ ގޮތަށް އިލެކްޝަންސް ކޮމިޝަނުން ނިންމަވައި އެކަން އިއުލާން ކުރައްވައިފިއެވެ.
އިތިޚާބު ބާއްވާ ތާރީޚު އިއުލާން ކުރައްވައިފައިވަނީ ބައު ޖަމާލުއްދީން ސްކޫލުގައި ގާއިމްކޮށްފައިވާ އިންތިޚާބާބެހޭ މަރުކަޒުގައި މިހާރުކުރިއަށްދާ ރަސްމިއްޔާތުގައެވެ. ތާރީޚު އިއުލާން ކޮށްދެއްވީ ސިޔާސީ ޕާޓީތަކުގެ މަންދޫބުންނެވެ. މިރަސްމިއްޔާތުގައި އިލެކްޝަންސް ކޮމިޝަނުގެ މެންބަރުންގެ އިތުރަށް ސިޔާސީ ޕާޓީތަކުގެ މަންދޫބުންވެސް ބައިވެރިވެ ވަޑައިގަންނަވައެވެ.
މި ރަސްމިއްޔާތުގައި ވާހަކަ ދައްކަވަމުން ކޮމިޝަނަރ ޝަރީފް ވިދާޅުވީ ރިޔާސީ އިންތީޚާބަށް ކުރިމަތި ލުމުގެ ފުރުސަތު ހުޅުވާލާނީ ޖުލައިމަހު 15 ވަނަ ދުވަހު ކަމަށެވެ.
އިލެކްޝަންސް ކޮމިޝަނުން ވިދާޅުވެފައިވަނީ އިންތިޚާބަށް ތައްޔާރުވާން ކުރަންޖެހޭ ކަންކަމުގެ 90 ޕަސެންޓް މަސައްކަތް ނިމިފައިވާ ކަމަށެވެ. އެގޮތުން އިންތިހާބާ ގުޅޭ ގައުމީ ލަފާދޭ ކޮމިޓީ މިހާރުވަނީ އެކުލަވާލައްވައިފައެވެ. އަދި ވޯޓު ފޮށި ބަހައްޓާނެ ތަންތަން ވެސް މިހާރުވަނީ ކަނޑައަޅައިފައެވެ. އަދި ވޯޓުލާ މީހުންގެ ރަޖިސްޓްރީ އެކުލަވާލައި ވަރަށް އަވަހަށް އިއުލާން ކުރައްވާނެ ކަމަށްވެސް އެކޮމިޝަނުން ވަނީ ވިދާޅުވެފައެވެ.
