عَنْ عَائِشَةَ ـ رضى الله عنها ـ أَنَّ رَسُولَ اللَّهِ صلى الله عليه وسلم قَالَ " تَحَرَّوْا لَيْلَةَ الْقَدْرِ فِي الْوِتْرِ مِنَ الْعَشْرِ الأَوَاخِرِ مِنْ رَمَضَانَ ". (صحيح البخاري، كتاب فضل ليلة القدر، باب تحري ليلة القدر في الوتر من العشر الأواخر)
ޢާއިޝާ رضى الله عنها ގެ އަރިހުން ރިވާވެގެން ވެއެވެ. ރަސޫލުﷲ صلى الله عليه وسلم ޙަދީޘުކުރެއްވިއެވެ. ރަމަޟާން މަހުގެ ފަހު ދިހައިގެ އޮނަހިރި ރެއެއްގައި ލައިލަތުލް ޤަދްރި ފެނެތޯ ތިޔަބައިމީހުން ބަލާށެވެ. (ޞަޙީޙުލް ބުޚާރީ، ހަދީޘު: 2017)
އެއްވެސް ޝައްކެތް ނެތް ގޮތުގައި މާތް ﷲއީ އަބަދުމެ އިންސާނުންނަށް އެންމެ ދީލަތިވަންތަ ރަސްކަލާނގެއެވެ. އެކަލާނގެ ނިޢުމަތްތައް ވިޔަކޮށް ކޮޅުން ނުލާހައި ގިނައެވެ. އެކަލާނގެއަށް އުރެދުނު އިންސާނުންނަށްވެސް އެކަލާނގެ ދީލަތިވެވޮޑިގަންނަވައެވެ. ދެން، އެކަލާނގެއަށް އީމާންވި އަޅުންނަށް އެކަލާނގެ ދީލަތިވެވޮޑިގަތުން މާ ބޮޑެވެ.
ލައިލަތުލް ޤަދްރިއަކީ މުއުމިން އަޅުންނަށް އެކަލާނގެ މި ދީލަތިކަން އޭގެ އިންތިހާގައި ވާ ރެއެކެވެ. އެކަން އެންމެ ބޮޑަށް ހާމަވެގެން ދަނީ އެރޭ ސިއްރުކުރެއްވުމުންނެވެ. އެރޭ ސިއްރުކުރެއްވުމުގެ އެންެމެ ބޮޑު މަގްސަދަކީ އެރޭ ހޯދުމުގެ ބޭނުމުގައި އެތައް ރެއަކު އަޅުކަންކުރަން މުއުމިން އަޅާއަށް ޖެހުމެވެ. އެހެން އެކަން ވުމުގެ ސަބަބުން ރަމަޟާން މަހުގެ ފަހު ދިހައިގެ ގިނަ ރޭތައް މުއުމިނުން ހޭދަކުރަނީ މާތް ﷲ އަށް އަޅުކަންކުރުމުގައެވެ. އެރޭގައި އަޅުކަންކުރުމުގެ ފުރުޞަތު ހޯދުމުގެ ބޭނުމުގައެވެ. އޭރުން އެންމެ ރެއެއް ހޯދުމަށް ކުރާ މަސައްކަތުން އެތައް ރެއެއްގެ އަޅުކަމުގެ ސަވާބު މުއުމިނުންނަށް ލިބުނީއެވެ. މިކަމުން ހާމަވެގެން ދަނީ މާތް ﷲގެ ދީލަތިވަންތަކަމެވެ. އެގޮތަށް އެކަން ނުވިނަމަ އަޅުކަންކުރުމުގައި ފަރުވާކުޑަކުރެވޭނެ ކިތަންމެ ރެއެއްގައި އިޚްލާޞްތިކަމާއެކު މުއުމިނުންނަށް މާތް ﷲއަށް އަޅުކަން ކުރެވުނީއެވެ.
މި ކުރެވޭ އަޅުކަމުގެ ތެރޭގައި އެރެއާ ދިމާވެއްޖެ ނަމަ، އެރެއިން އެކަނި 83 އަހަރުގެ އަޅުކަމުގެ ދަރުމަ ލިބުނީއެވެ. އަޅުކަމުގައި އިންސާނަކު މުޅި އުމުރު ހޭދަކުރިއަސް ނުލިބޭނެ ދަރުމަ އެެއް ރެއިން ލިބުނީއެވެ. ދުނިޔޭގެ ރަސްރަސްކަލުން ނުވަތަ ވެރިންގެ ތެރެއިން 1 ދުވަހުގެ މަސައްކަތަށް 83 އަހަރުގެ އުޖޫރަދޭނެ މީހަކަށް ކުރީ ކާކު ހެއްޔެވެ؟ އެންމެ ދީލަތި މީހާވެސް އެކަން ނުކުރާނެއެވެ. އެހެންކަމުން ދީލަތިވަންތަ އިލާހުގެ ދީލަތިކަން އެރޭ އިންތިހާގައި ނުވޭތޯއެވެ؟
ޝައްކެއް ނެތް ގޮތުގައި އެންމެ ބޮޑު އަބާއްޖަވެރިއަކީ މާތް ﷲގެ ދީލަތިކަމުން އެފަދަ މަތިވެރި ރެއެއް ދެއްވުމުން އެރޭ ހޯދަން މަސައްކަތް ނުކުރި ނުވަތަ ނޭނގުނު މީހާއެވެ. އެހެންކަމުން އަނަސް ބިން މާލިކް رضى الله عنه ގެ އަރިހުން އިބްނުމާޖާ ރިވާކުރެއްވި ޙަދީޘެއްގައި އެރެއާ ބެހޭގޮތުން ރަސޫލުﷲ صلى الله عليه وسلم ޙަދީޘުކުރައްވަނީ: "مَنْ حُرِمَهَا فَقَدْ حُرِمَ الْخَيْرَ كُلَّهُ" (އެރޭގެ ހެޔޮކަމުން މަޙްރޫމުވެެއްޖެ މީހާ ހުރިހާ ހެޔޮަކަމަކުން މަހްރޫމުވެއްޖެއެވެ.)
