ރަޝިޔާގެ އެސް400 އެއާ ޑިފެންސް ސިސްޓަމް ޤަޠަރުން ހޯދައިފިނަމަ އެގައުމާ ދެކޮޅަށް އަސްކަރީ ބާރުގެ ބޭނުންކުރާނެ ކަމުގެ އިންޒާރު ސަޢޫދީ ސަރުކާރުން ދީފިކަމަށް ފްރާންސުގެ ނޫހެއް ކަމުގައިވާ ލެމޯންޑް އިން ބުނެފިއެވެ.
އެ ނޫހުން ބުނާ ގޮތުގައި ސަޢޫދީ ރަސްގެފާނު ސަލްމާން ބިން ޢަބްދުލްޢަޒީޒު ވަނީ ފަރަންސޭސީ ރައީސު އިމާނުއެލް މެކްރޯންއަށް ފޮނުއްވި ސިޓީފުޅެއްގައި، ޤަޠަރުން އެންމެ ޒަމާނީ އެ މިސައިލް ސިސްޓަމް ގަތުން ހުއްޓާލުމަށް ބާރު އެޅުއްވުމަށް ފަރަންސޭސި ރައީސުގެ އަރިހުން އެދިވަޑައިގެންފައެވެ. އެހެން ނޫންނަމަ އެ ސިސްޓަން ނައްތާލަން ކުރަންޖެހުނު ކޮންމެ ކަމެއް ސަޢޫދީ ޢަރަބިއްޔާއިން ކުރާނެކަމަށާ، އޭގެ ތެރޭގައި އަސްކަރީ ބާރުގެ ބޭނުންކުރުން ވެސް ހިމެނޭ ކަމަށް ސައޫދީ ރަސްގެފާނު އެސިޓީފުޅުގައި ވިދާޅުވެފައިވެއެވެ.
މިމައްސަލަ ގާތުން ބައްލަވާ ފަރަންސޭސި މަސްއޫލުވެރިޔަކާ ހަވާލާދީ އެ ނޫހުން ބުނާ ގޮތުގައި ޤަޠަރާއި ރަޝިޔާއާ ދެމެދު ދެކެވުންދާ ވާހަކަތަކާ މެދު ސަޢޫދީ ރަސްގެފާނު ކަންބޮޑުވެވަޑައިގަންނަވާކަން ހާމަކުރައްވާފައި ވެއެވެ. އަދި ޤަޠަރުގައި އެސް 400 މިސައިލް ސިސްޓަމް ބަހައްޓައިފިނަމަ ސައޫދީ ވައިގެ ސަރަހައްދަށް ނުރައްކާވާނެކަން ވެސް ބަޔާންކުރައްވާފައި ވެއެވެ.
މޮސްކޯގައި ހުންނަވާ ޤަޠަރުގެ ސަފީރު ވަނީ ޤަޠަރުން އެ މިސައިލް ސިސްޓަމް ގަތުމަށް ރަޝިޔާއާއި ވާހަކަދައްކަމުންދާ ކަމަށާއި، އެވާހަކަތައް މިހާރު ނިމުމު މަރުހަލާގައިވާކަން ފާއިތުވި ޖަނަވަރީ މަހު ހާމަކުރައްވާފައެވެ.
މިކަމާ ގުޅިގެން ރަޝިޔާގެ ސިޔާސީ މުހައްލިލެއް ކަމުގައިވާ ޔެފްގޭނީ ސްދޭރޯފް ބުނީ އެސް400 ގެ މިސައިލް ސިސްޓަމް ގަތުމަކީ ޤަޠަރުގެ އަމިއްލަ ކަމެއް ކަމަށާ އެކަމާ އެހެން މީހުން ކަންބޮޑުވާން ނުޖެހޭ ކަމަށެވެ. އަދި ރަޝިޔާ އެހެން ގައުމުތަކާއި މުއާމަލާތްކުރަނީ އެގައުމުގެ އިގްތިސާދަށްވެސް ފައިދާކުރާނެ ގޮތަށް ބަލައިގެން ކަމަށެވެ.
އެސް400 އެއާ ޑިފެންސް ސިސްޓަމަކީ މިވަގުތު ދުނިޔޭގައި ބޭނުންކުރެވޭ އެންމެ ކުރިއަރާފައިވާ އެންމެ އިތުބާރު ބޮޑު ވައިގެ ދިފާއު ސިސްޓަމެވެ. ވައިގެތެރޭގައި ކޮންމެ އަމާޒަކަށް ހަމަލާދީ ނައްތާލުމުގެ ގާބިލުކަން އެ ސިސްޓަމަށް ލިބިގެން ވެއެވެ. އޭގެ ތެރޭގައި ހުރިހާ ވައްތަރެއްގެ ހަނގުރާމަމަތީ މަތިންދާބޯޓުތައް ހިމެނެއެވެ.
