ސަލްމާން ޚާން ގައިގަ ތަޅައި އަނިޔާ ކުރާ ބަޔަކަށް ހިންދޫންގެ ލީޑަރަކު ދެ ލައްކަ ރުޕީސްގެ އިނާމެއް ހުށަހަޅައިފިއެވެ. ސުޕަރސްޓަރ ސަލްމާން ގައިގައި ތަޅާ މީހަކަށް ފައިސާގެ އިނާމު ހުށަހެޅީ ވިޝްވާ ހިންދޫ ޕަރިޝާދް އިންޓަރނޭޝަނަލްގެ ކުރީގެ ރައީސް، ޕްރަވީން ތޮގާޑިއާ އެވެ.
އިންޑިއާގެ ބައެއް މީޑިއާގައި ރިޕޯޓްކޮށްފައިވާ ގޮތުގައި ސަލްމާނަށް އަނިޔާ ކުރާ ފަރާތަކަށް އޭނާ އިނާމް ހުށަހެޅީ ސަލްމާން ހިންދޫންގެ އިހްތިރާމް ގެއްލޭ ގޮތަށް ފިލްމަކަށް ނަން ކިޔާފައިވާތީ ކަމަށް ވެއެވެ. އެ ފިލްމަކީ އޭނާގެ ކޮއްކޮ އަރްޕިތާ ޝަރްމާގެ ފިރިމީހާ އަޔުޝް ޝަރްމާ ބޮލީވުޑަށް ތައާރަފް ކުރާ ފިލްމު "ލަވްރާތްރީ" އެވެ.
ހައްދުފަހަނައަޅައިފައިވާ ހިންދޫންގެ ގުރޫޕަކުން ވަނީ ބުރާސްފަތި ދުވަހު ސަލްމާނާ ދެކޮޅަށް އަޑު އުފުލާފައެވެ. މި ހަރަކާތުގައި ސަލްމާނުގެ ޕޯސްޓަރުތައް އެންދުމާއި އޭނާ އާ ދެކޮޅަށް ލިޔެފައިވާ ޝުއޫރުތައް ހިފައިގެން ހިންދޫން ތިބިކަމަށް އިންޑިއާގެ މީޑިއާއިން ރިޕޯޓް ކުރެއެވެ.
"ލަވްރާތްރީ" އަކީ ހިންދޫންގެ ދީނީ މުނާސަބަތެއް ކަމަށްޥާ "ނަވްރާތްރީ" ގެ އަސްލު އޮޅޭގޮތަށް އުފައްދާ ފިލްމެއް ކަމަށް ހިންދޫންގެ ލީޑަރުން ދަނީ ބުނަމުންނެވެ. އެފަރާތްތަކުން ވަނީ ފިލްމު ހުއްޓުވައި ދިނުމަށް އެދިފައެވެ. ނުހުއްޓުވައިފިނަމަ އެކަމާ ދެކޮޅަށް ކޮންމެ ކަމެއް ކުރަން ތައްޔާރަށް ތިބި ކަމަށް މި މީހުން ބުނެފައިވެއެވެ.
'ލަވްރާތްރީ" ރިލީޒް ކުރުމަށް ހަމަޖެހިފައިވަނީ މި އަހަރުގެ އޮކްޓޯބަރު މަހު އެވެ.
