އާއްމު ތަންތަނުގައި މޫނުބުރުގާ އެޅުން މަނާކުރި ޔޫރަޕްގެ ގައުތަކުގެ ތެރޭގައި ޑެންމާކު އިއްޔެ ހިމެނިއްޖެއެވެ. އިންސާނީ ހައްގުތަކަަށް ވަކާލާތުކުރާ ޖަމްއިއްޔާތަކުން މިކަން ސިފަކޮށްފައި ވަނީ 'އަންހެންނުގެ ހައްގުތަކަށް އަރައިގަތުން' ކަމުގައެެވެ.
"އާއްމު ތަނެއްގައި މޫނު ނިވާވާ ގޮތަށް ހެދުންއަޅާ ކޮންމެ މީހަކު ޖުރުމާނާކޮށް އަދަބުދެވޭނެއެވެ." ޑެންމާކުގެ ގާނޫނު ހަދާ މަޖިލީހުން 75 ވޯޓުގެ ތާއީދާއެކު ފާސްކުރި ގާނޫނުގައި ވެއެވެ. ދެކޮޅަށް ވޯޓުދިނީ 30 މެންބަރުންނެވެ. މެދު-ކަނާތު ފިޔައިގެ ސަރުކާރުން ހުށަހެޅި ބިލަށް ސޯޝަލް ޑިމޮކްރެޓުންނާއި، ޑެނިޝް ޕީޕަލް ޕާޓިންވެސް ވަނީ ތާއީދުކޮށްފައެވެ.
މި ގާނޫނަށް އަމަލުކުރަން ފަށާނީ އަންނަ އޮގަސްޓު މަހުގެ ފުރަތަމަ ދުވަހުން ފެށިގެންނެވެ.
އާއްމު ތަނެއްގައި މުޅި މޫނު ނިވާވާ ގޮތަށް، ނުވަތަ ހަމައެކަނި ދެލޯ ފެންނަ ގޮތަށް ބުރުގާ އަޅައިފިނަމަ 1000 ޑެނިޝް ކްރޯނާ (156 ޔޫއެސް ޑޮލަރު) އިން ޖުރުމާނާ ކުރެވޭނެއެވެ.
ޑެންމާކުގައި މޫނު ބުރުގާ އަޅާ އަންހެނުން އުޅެނީ ކިހާވަރަކަށް ކަން ކުރިން ބެލިފައި ނެތެވެ.
އެމްނެސްޓީ އިންޓަނޭޝަނަލުން ވަނީ މިކަން ކުށްވެރިކޮށްފައެވެ. "މި ގާނޫނުގެ މަގްސަދަކީ އަންހެނުންގެ ހައްގުތައް ރައްކާތެރިކުރުން ކަމުގައި ވާނަމަ އެކަން އެވަނީ ފޭލްވެފައެވެ. މި ގާނޫނު މިވަނީ އަންހުން އަޅަން އިޚްތިޔާރުކުރާ ހެދުމެއްގެ ސަބަބުން އެމީހުން ކުށްވެރިންނަށް ހަދާފައެެެވެ. މިހެންވުމުން، ޑެންމާކުން ތާއީދުކޮށް ދަމަހައްޓަމުން އައި މިނިވަންކަމަށް އަރައިގަނެވުނީއެވެ." އެމްނެސްޓީގެ ޔޫރަޕް ޑިރެކްޓަރު ގައުރީ ވަން ގުލިކް ނެރުނު ބަޔާނެއްގައި ވެއެވެ.
ޔޫރަޕްގެ ގައުމުތަކަގެ ތެރެއިން ބެލްޖިއަމާއި، ފްރާންސާއި، އޮސްޓްރިއާއިން ވަނީ އާއްމު ތަންތަނުގައި މޫނު ނިވާކުރުން މަނާކޮށްފައެވެ. ޖަރުމަނުގައި ވަކި ބަޔަކަށް އެކަން މަނާކުރާ ގާނޫނެއް ވަނީ ފާސްކޮށްފައެވެ.
