ރާޖް ކުމާރް ހިރާނީ ގެ ފިލްމު 'ސަންޖޫ' ގައި އާމިރް ޚާން އަށް އޮފަރ ކުރީ ސަންޖޭ ދަތުގެ ބައްޕަ ސުނިލް ދަތުގެ ރޯލެވެ. އެ ހުށަހެޅުން އޭނާ ގަބޫލު ނުކުރީ އޭނާ ބޭނުންވީ ސަންޖޭދަތުގެ ރޯލު ކުޅެން ކަމަށްވާތި ކަމަށް އާމިރް ބުނެފިއެވެ. އާމިރް މިހެން ބުނީ ބުދަ ދުވަހު ފޭސްބުކް އިން ލައިވް ކުރި ހަރަކާތެއްގައެވެ.
ސުނިލް ދަތުގެ ރޯލު ކުޅެން ރާޖް ކުމާރް ހިރާނީ ހުށަހެޅިތޯ ކުރި ސުވާލަށް ޖަވާބު ދެމުން އާމިރް ބުނެފައިވަނީ ފިލްމުގެ ސްކްރިޕްޓާ އެކު ހިރާނީ އޭނާ އާ ބައދަލު ކުރިކަމަށާއި އޭނާ އަށް ހުށަހެޅީ ދަތު ސާހަބް ގެ ރޯލު ކުޅެން ކަމަށެވެ. އެއިވެސް ވަރަށް ރަނގަޅު ރޯލެއް ކަމަށާއި މުޅި ވާހަކަ ބިނާވެފައި އޮތީ ބައްޕަ އާއި ދަރިފުޅުގެ ގުޅުމުގެ މައްޗަށް ކަމަށް އާމިރް ބުނެފައިވެއެވެ. ނަމަވެސް އޭނާ އެންމެ ގަޔާވީ ސަންޖޫގެ ރޯލަށް ކަމަށް އާމިރު ބުނެފައިވެއެވެ. އެހެން ކަމުން މި ފިލްމުގައި ސަންޖޫގެ ރޯލު ނޫން އެހެން ރޯލެއް ނުކުޅެވޭނެ ކަމަށް ރާޖް ކުމާރް ހިރާނީ ގާތު ބުނިކަމަށް އާމިރް ބުންޏެވެ.
ފިލްމު ސިނާއަތުގައި އާމިރް ވަނީ 30 އަހަރު ހޭދަކޮށްފައެވެ. ރަންބީރް އަކީ މޮޅު އެކްޓަރެއް ކަމަށް އާމިރް ގަބޫލުކުރެއެވެ. އަދި ފިލްމުގައި އޭނާގެ ރޯލު ވަރަށް މޮޅަށް ކުޅެފައިވާނެ ކަމުގެ ޔަގީންކަން އާމިރް އަށް އެބައޮތެވެ. ފިލްމު ބަލަން ކެތްމަދު ވެފައިވާ ކަމަށް ވެސް އާމިރު ބުންޏެވެ.
ހަގީގީ ދިރިއުޅުމުގައި ސުނިލް ދަތު އާ ވަރަށް ގާތް ގުޅުމެއް އޮތް ކަމަށްވެސް އާމިރް ބުންޏެވެ. އެ ހަންދާންތައް އާކުރަމުން އާމިރު ބުނީ "ދިވާލީ އާއި، އީދު ދުވަހާއި، އަދި އުފަން ދުވަހުގެ ތަހުނިޔާ ފޮނުވަން އަހަންނަށް އަބަދުވެސް ޓެލްގްރާމް ފޮނުވާ. އަދި އަހަރެންގެ ފިލްމެއް ރަނގަޅަށް ހިނގައިފިނަމަ މަރުހަބާގެ ނޯޓު ފޮނުވާ" ކަމަށެވެ.
ހަންދާން ތަކުގެ ތެރެއިންވެސް އޭނާ އެންމެ ހަނދާން ހުންނަ ކަން ވެސް އާމިރް ފާހަގަ ކުރިއެވެ. "1993ވަނަ އަހަރު ހިނގި ހަމަނުޖެހުމުގެ ތެރޭގައި ހަމަނުޖެހުން ހުއްޓުވައި ދިނުމަށް އެދި ހިންދީ ފިލްމު އިންޑަސްޓްރީގެ ވަފުދެއް އޭރުގެ ޗީފް މިނިސްޓަރާ ބައްދަލުކޮށްލަން ދިޔަ. ގާތްގަނޑަކަށް 40 ވަރަކަށް މީހުން އެ ވަފުދުގައި ހިމެނޭ. އެކަމާ ގުޅިގެން ވަގުތުން އެއްވެސް ފިޔަވަޅެއް ނޭޅުއްވުމުން އަޅުގަނޑުމެން ނިންމީ މަންތުރާލާޔާ ކައިރީގައި ބަހައްޓާފައި ހުންނަ މަހާތުމާ ގާނދީގެ ބުދު ގެ ދޮށުގައި އިށީނދެ ތިބެން. އަހަރުމެންގެ 40 މީހުން ނިންމީ ހަމަނުޖެހުންތައް ނުހުއްޓުވަނީސް އެތަނުން ނުތެދުވުމަށް. ރޭނގަނޑަށް އަހަރުމެން ނިންމީ ދަންފަޅި ބަހައިގެން ތިބެން. އެހެންކަމުން އަހަންނާއި ދަތު ސާހަބް އާއި ޔާޝް ޗޯޕްޅާ އާއި ޖޯނީ ވޯކަރ އާއި އަދި އެހެން ޕރޮޑިއުސަރަކު ފުރަތަމަ ރޭ މަޑު ކުރީ. އަނެއް ދުވަހު ހަވީރު ޗީފް މިނސްޓަރު ފިޔަވަޅު އެޅުއްވި."
" އެރެއަކީ އަހަންނަށް ވަރަށް މުހިއްމު ރެއެއް. މުޅި އެރޭ ދަތު ސާހަބް އައި ޖޯނީ ވޯކަރު ގެ ހަޔާތުގެ ގިނަ ވާހަކަތަކެއް އަހަންނަށް ކިޔައިދިން. އެރޭ އަހަރެން ވަރަށް ހަނދާން ހުރޭ."
މި އިންޓަރވިއުގައި މިހާރު ބޫޝަން ކުމާރް އާ އެކު ގުލްޝަން ކުމާރްގެ ހަޔާތުގެ މައްޗަށް ފިލްމެއް އުފައްދާ ކަންވެސް އާމިރް ޔަގީން ކޮށްދިނެވެ.
މި ޚަބަރު ނަގާފައިވަނީ ހިންދުސްޓާން ޓައިމްސް އިން
