މާޒީގައި ހިނގާފައިވާ ކަންތައް ފޮހެނުލެވޭނެކަމަށާ، އެހެންނަމަވެސް މުސްތަޤްބަލު ބައްޓަންކުރުމުގެ ފުރުސަތު އެބައޮތްކަމަށް މެލޭޝިޔާ ކުރީގެ ބޮޑުވަޒީރު އަންވަރު އިބްރާހީމް ވިދާޅުވެއްޖެއެވެ. އޭނާ މިހެން ވިދާޅުވެފައި ވަނީ މަހަތީރު މުޙައްމަދާއެކު ސިޔާސީ މައިދާނަށް އަލުން ނިކުންނެވުމަށް އިޝާރާތް ކުރައްވައެވެ.
އަންވަރު އިބްރާހީމް ވަނީ އޭނާގެ އެންމެ ބޮޑު ސިޔާސީ ވާދަވެރިޔާ ކުރީގެ ބޮޑުވަޒީރު މަހާތީރު މުޙައްމަދާ އަތުގުޅާލައްވައިގެން އޭނާގެ ހަޔާތުގެ އެންެމެ މުހިއްމު ނިންމެވުން ނިންމަވާފައެވެ. އެއީ 'މެލޭޝިޔާ ސަލާމަތްކުރުމަށްޓަކައެވެ.'
ކުރީގެ ބޮޑުވަޒީރުގެ ނާއިބު ޖަލުން ސަލާމަތްވެވަޑަގަތް ފަހުން މިވީ ހަފުތާއެއްހާ ދުވަހުގެ ތެރޭގައި އޭނާވަނީ ސިޔާސީ މަސްރަހުގައި އޭނާގެ ބުރަދަން ދައްކަވާފައެވެ.
"މާޒީގައި އަހަރުމެންގެ ދެމެދުގައި މައްސަލަ ޖެހިފައި ވަނީ. އެހެންނަމަވެސް އަހަރުމެން މިހާރު ސަމާލުކަން މިދެނީ ކޮރަޕްޝަނާއި، ނަސްލީ ތަފާތުކުރުމާއި، އަނިޔާވެރިކަމުން މެލޭޝިޔާ ސަލާމަތްކުރަން" ސައޫދީ އަރަބިޔާގައި އިނގިރޭސި ބަހުން ނެރޭ އަރަބްނިއުސް ނޫހަށް ދެއްވި ބަސްދީގަތުމެއްގައި އަންވަރު ވިދާޅުވިއެވެ.
އަންވަރު އިބްރާހީމަކީ މަހާތީރު މުޙަައްމަދު ކުރިން ބޮޑުވަޒީރުކަން ކުރެއްވި އިރު އޭނާގެ ނާއިބަކަށް ހުންނެވި ބޭފުޅެކެވެ. އެހެންނަމަވެސް ދެބޭފުޅުންގެ ދެމެދުގައި ޚިޔާލުތަފާތުވުން އުފެދި 1998 ވަނަ އަހަރު އޭނާ މަގާމުން ދުރުކުރެވުނެއެވެ. އަދި ބަދުއަޚްލާޤީ އަމަލެއް ހިންގުމާއި، ކޮރަޕްޝަންގެ ތުހުމަތުގައި އޭނާގެ މައްޗަށް ޝަރީޢަތް ހިންގައި ޖަލަށް ލެވުނެވެ. ފާއިތުވި ހަފުތާގައި އޭނާ ޖަލުން ދޫކޮށްލެވުނީ ޝާހީ މާފެއް ލިިބިވަަޑައިގަތުމުންނެވެ.
ޖަލުން މިނިވަންވެވަޑައިގަތް ފަހުން އަންވަރު ގެންދަވަނީ އަރާމުކުރެއްވުމެއްނެތި، ގިނަ ސިޔާސީ ބައްދަލުވުންތަކެއް ބާއްވަވައި، ގިނަ ކަންތައްތަކެއް ރާއްވަވަމުންނެވެ. މި ފާއިތުވި ހަފުތާގައި އޭނާ އަވަހާފުޅުލައްޕަވާފައި ވަނީ މަދު ވަގުތުކޮޅަކަށެވެ. "ދެން އަަހަރެންގެ އޮތް އެންމެ ބޮޑު ޕްލޭނަކީ ނިދުން" ސަމާސާ ކުރައްވަމުން އޭނާ ވިދާޅުވިއެވެ.
ޕީޕަލްސް ޖަސްޓިސް ޕާޓީގެ މައި އިދާރާގައި އިންނަވައިގެން އަންވަރު ވިދާޅުވީ މިހާރު މިނިވަންކަމުގެ އުފާ ހާސިލުކުރައްވަމުން ގެންދަވާ ކަމަށާ، އޭނާގެ އާއިލާއާއެކު އެގޮތަށް އިންނެވުމުގެ ފުރުސަތު ލިބިވަޑައިގަންނަވާނެކަމަށް އޭނާ އުއްމީދުކުރައްވާފައި ނުވާ ކަމަށެވެ.
"އަަހަރެން ވިސްނަމުން މިދަނީ ކުރިއަށް އޮތް ދުވަސްތަކުގައި ގާނޫނުހަދާ މަޖިލީހުގެ ގޮނޑިއަކަށް ކުރިމަތިލައިގެން މެންބަރަކަށް ވާން. އޭރުން ކަންކަން ހިނގާގޮތް މަޖިލީހުގެ އެތެރެއިންނާއި ބޭރުން އަހަރެންނަށް ބެލޭނެ" އަންވަރު ވިދާޅުވިއެވެ.
މަހާތީރު މުހައްމަދު ކުރިން ވިދާޅުވެފައިވަނީ އަހަރެއް ނުވަަތަ ދެއަހަރެއްހާ ދުވަހުގެ ތެރޭގައި އޭނާ ބޮޑުވަޒީރުކަމުން ދުރުވެވަޑައިގެން، އަަންވަރު އިބްރާހީމް އެމަގާމަށް ވަޑައިގަތުމަށް މަގުފަހިކޮށްދެއްވާނެ ކަމުގައެވެ.
