ސީއެޗްއެސްސީގައި ކިޔަވަމުން އަންނަ އަންހެން ދަރިވަރަކު މާލޭ މާރުކޭޓާ ދިމާލުން މޫދަށް ފުންމާލައިފިއެވެ.
މިއަދު މެންދުރެއްހާއިރު ހިނގި މިހާދިސާގައި އަންހެން ދަރިވަރު މޫދަށް ފުންމާލުމުން އެ ސަރަހައްދުގައި ހަރަކާތްތެރިވި އާންމުންގެ ބަޔަކު ވަނީ މޫދަށް އެރި އެކުއްޖާ ސަލާމަތް ކޮށްފައެވެ. ސީއެޗްއެސްސީގެ ރަސްމީ ޔުނިފޯމާވެސް އެކުގައި މޫދަށް ފުންމާލި އަންހެން ދަރިވަރު އާންމުންގެ އެހީތެރިކަމާއެކު މޫދުން ނެގި ނަމަވެސް އޭރު ވަނީ ގިނަ އަދަދަކަށް ލޮނުބޮވި، ހޭނެތިފައި ކަމަށްވެއެވެ.
އަންހެން ކުއްޖާ މޫދުން ނެގުމަށް ފަހު އާންމުން ވަނީ ފުލުހުންގެ އެހީތެރިކަމާއެކު އައިޖީއެމްޗަށް ގެންގޮސްފައެވެ. މައުލޫމާތު ލިބިފައިވާ ގޮތުގައި އަންހެން ކުއްޖާއަށް މިވަގުތު އައިޖީއެމްއެޗުގައި ދަނީ ފަރުވާ ދެމުންނެވެ. ނަމަވެސް އަންހެން ކުއްޖާ އަމިއްލައަށް މަރުވާން އުޅުނީ ކޮން ސަބަބެއް މެދުވެރިވެގެން ކަމެއް ސާފެއް ނުވެއެވެ.
