ޝެރޯން މަރުވިކޮޓަރީގެ ނާމާންކަން

ބުލްޑޯޒަރުގެ ނަމުން ، ދުނިޔެއަށް މަޝްހޫރުވި ، އިސްރާއީލުގެ ބޮޑުވަޒީރުކަންކުރި ، އާރިއަލް ޝެރޯން އަކީ ، ދެވަނަ ބޮޑުހަނގުރާމަޔަށްފަހު ، ދުނިޔޭގެ ތާރީޚުގައި ، އެންމެ އަނިޔާވެރި މުޖުރިމުގެ ގޮތުގައި ފާހަގަކުރެވިފައިވާ މީހެކެވެ. ލާއިންސާނީ ޢަމަލުތަކުން ، ފަލަސްތީނުގެ ކުށެއްނެތް އެތައްބަޔަކު މަރާފައިވާ މީހެކެވެ. ޝެރޯންގެ އެންމެ އަނިޔާވެރި އެއް ޢަމަލަކަށް ބެލެވިފައިވަނީ ، އިސްރާއީލުގެ ދިފާޢީ ވަޒީރުކަމުގައިހުރިއިރު ،  މީގެ 41 އަހަރުކުރިން ،  1982 ވަނައަހަރުގެ ސެޕްޓެމްބަރ  މަހުގެ 16 އިން 18 އަށް ، ޞަބްރާއާއި ޝާތީލާގައި އޭނާ ހިންގި ޤަތުލު ޢާންމެވެ. ޞަބްރާއާއި ޝާތީލާގެ ދެފޭލިގެޔަކީ ، ޝެރޯންގެ އަނިޔާވެރިކަމުގައި ފަލަސްތީނުގެ ބިމުން ގަދަކަމުން ބޭރުކުރި ، ފަލަސްތީނުމީހުން ދިރިއުޅެމުން ގެންދިޔަ ފޭލިގެ ތަކެވެ. އެ ދެފޭލިގޭގައި 40 ހާހަށްވުރެ ގިނަ ޖިފުޓި ހުއްޓެވެ. އެ ޤަތުލުޢާންމުގައި ، ބުލްޑޯޒަރ ބޭނުންކޮށްގެން ، ފޭލިގެތައް ރޫޅައި ބިމާ ހަމަކޮށްލިއެވެ. ފަލަސްތީނުގެ ކުޑަކުދިންނާއި އަންހެނުން އަދި ދުވަސްވީ މީހުން ހިމެނޭގޮތަށް ، 3،500 އަށްވުރެ ގިނަމީހުން މަރާފައި ވެއެވެ. ނިކަމެތި އެތައް ބަޔެއްގެ ގައިމަތިން ބުލްޑޯޒަރު ދުއްވާ ލާއިންސާނީ މަރަކުން އެމީހުން މަރާފައި ވެއެވެ. ޝެރޯނަށް ބުލްޑޯޒަރގެ ނަމުން މުޚާތަބު ކުރެވި ، އެނަން މަޝްހޫރުވެގެންދިޔައީ އެދުވަސްވަރުއެވެ. ޝެރޯން މަރުވެއްޖެކަމަށް ޑޮކްޓަރުން އިޢުލާންކުރިއިރު ޢުމުރަކީ 85 އަހަރެވެ. އޭގެ ތެރެއިން 8 އަހަރަކީ ، މެޝިނުގެ އެހީގައި އޭނާ ބޭއްވިފައިއޮތް ދުވަސްތަކެކެވެ.

ޝެރޯން މަރުވީ ، ޞަބްރާ އަދި ޝާތީލާގެ ޤަތުލު ޢާންމުގައި އޭނާ ކޮށްފައިވާ ކުށަށް ، ނުވަތަ ޤަތުލު ޢާންމަށް އަދަބެއް ނުލިބި އޮވެއެވެ. އިންސާނިއްޔަތާޚިލާފު ޢަމަލާއި ، ހަނގުރާމައިގެ ކުށްވެރިއެއްގެ ގޮތުގައި ޝެރޯންގެ މައްޗަށް ، ދުނިޔޭގެ ކޯޓުގައި ދަޢުވާ އުފުލުނެވެ. ޞަބްރާ އާއި ޝާތީލާގެ ޤަތުލުޢާންމާ ބެހޭގޮތުން ، އިސްރާއީލުގެ ސަރުކާރުން ހިންގި ތަޙުޤީޤުގައިވެސް ، ޝެރޯން އަމިއްލަގޮތުން އެކަމުގައި ޒިންމާވާކަމުގައި ބަޔާން ކޮށްފައި ވެއެވެ. އަދި އެކަމާގުޅިގެން ދިފާޢީ ވަޒީރުކަމުން ވަކިކޮށްފައި ވެއެވެ.

އޭނާ މަރުވިއިރުވެސް ،  ޤަތުލުޢާންމުގައި މަރުވެގެން ދިޔަ ފަލަސްތީނުގެ ނިކަމެތި ރައްޔިތުންނަށް އިންސާފު ލިބިފައެއް ނުވެއެވެ. ދުނިޔޭގެ ކޯޓަށް ، ޝެރޯނާބެހޭގޮތުންހުށަހެޅުނު ދަޢުވާއިން އޭނާ ރެކުނެވެ. އެމެރިކާގެ މަދަދާއި ވާތްގާ އެކުގައެވެ. ހަނގުރާމައިގެ ކުށްވެރިއެއްގެ ގޮތުގައި އޭނާގެ މައްޗަށް އުފުލުނު ދަޢުވާ ، ކޯޓުން ބޭރުކޮށްލިއެވެ. އަދި ހިފާފައިވާ ފަލަސްތީނުގެ ބިމުގައި ޔަހޫދީން އާބާދު ކުރުމުގެ މަދަނީ ކުށުންވެސް ، އޭނާވަނީ ބަރީއަވެފައެވެ. އެއީވެސް އެމެރިކާގެ ވާތްގާލައިގެންނެވެ.

ޝެރޯން ބޭއްވިފައިއޮތީ ، ޓެލްއަވީވްގެ ޓެލްހެސޯމަރ ހޮސްޕިޓަލުގެ ޝެބާ މެޑިކަލް ސެންޓަރުގެ އިންޓެންސިވް ކެއަރ ޔުނިޓުގައެވެ. ޝެރޯން ބޭއްވިއިރު ، އެ ސެންޓަރުގައި 18 ބަލިމީހުން ތިއްބެވެ. ކޮންމެ ރޫމެއްގައި ބޭތިއްބިފައިވަނީ ބަލި ދެމީހުންނެވެ. އެހެންނަމަވެސް ، ޝެރޯނަށްޓަކައި އެއްރޫމް އެއްކޮށް ހުސްކުރެވުނެވެ. އަދި ޝެރޯން އަށް ޚިދުމަތްކުރުމަށްޓަކައި ޚާއްޞަ ނަރުހުން އަބަދުވެސް ޑިއުޓީގައި ތިބެއެވެ.

ޝެރޯން މަރުވީ ،  ހުޅުވިފައި އޮންނަ ލޮލަށް ފެންނަކަމެއް ، ނުފެންނަކަމެއް ނޭނގި ، ކަންފަތަށް އަޑުއިވޭކަމެއް އަދި ނުއިވޭކަމެއް ނޭނގި މަރުއެނދުގައި ހޮސްޕިޓަލުގައި 8 އަހަރު ވަންދެން ޙަރަކާތެއް ނެތި ، މެޝިންތަކެއްގެ އެހީގައި ގޮށްމަސްބުރިއެއްގެ ގޮތުގައި އޮތުމަށްފަހުގައެވެ. އަތެއް ފަޔެއް ހިރުވައެއް ނުލެވެއެވެ. ލޯ ތަޅުވައެއް ނުލެވެއެވެ. ދޫ ޙަރަކާތެއް ނުކުރެއެވެ. ތަދެއް އިޙްސާސެއް ނުކުރެވެއެވެ. ނޭވާލަނީ މެޝިނުންނެވެ. ކާންދެނީ ހޮޅިންނެވެ. ލޭ ފޮނުވެނީ ނާރަށް ޖަހައިގެންނެވެ. ސިކުނޑީގެ ދެފަރާތުން ސެލެބްރަލް ކޯރޓެކްސް ވަނީ ހަލާކުވެފައެވެ. ހިތުގައި ވިންދު ޖައްސުވަނީ ގަދަކަމުންނެވެ. ލޮލުގެ ފެނުންވަނީ ގެއްލިފައެވެ. އެސްފިޔަ ޙަރަކާތެއް ނުކުރެއެވެ. ނަޖިސް ބޭރުކުރަނީ ހޮޅިއަކުންނެވެ.

ޝެރޯންގެ ހަގު ފިރިހެންދަރި ، ގިލާޑް ޝެރޯން އަކީ ޝެރޯން ބަލިއެނދުގައި އޮއްވާ އޭނާގެ ބައްޕަޔަށް އެންމެ ގިނައިން ޒިޔާރަތްކުރި މީހާއެވެ. ދެންހުރި ދޮށީ ފިރިހެންދަރި އޮމްރީވެސް ޒިޔާރަތް ކުރެއެވެ. ދެމީހުންނާ އިނީތީ އެއްއަނތްބެއްވެސް ދުނިޔެއަކު ނެތެވެ. ފުރަތަމަ އިންމީހާ މާގަލިޓް ޔަހޫދާ މަރުވީ ކާރު އެކްސިޑެންޓެއްގައެވެ. ދެން އިނީ ދޮށީ އަނބި މާގަލިޓްގެ އެއްބަނޑު އެއްބަފާ ކޮއްކޮ ލިލީ ޔަހޫދާއާއެވެ. ލިބުނު ތިންކުދިންގެ ތެރެއިން އަންހެންކުއްޖާ މަރުވީ ، ބައްޕަ ބޭނުންކުރާ ، ވަޒަން ލައްވާފައި އޮތް ފިސްތޯލަޔަކާ ކުޅެނިކޮށް ރައްޓެއްސެއްގެ އަތުން އެފިސްތޯލައިގެ ވަޒަނެއް އަރައިގެންނެވެ. ޝެރޯން ބޭއްވިފައިއޮތް ކޮޓަރީގެ ބިރުވެރިކަމާއި ނާމާންކަމުގެ ގިނަވާހަކަތައް އިވިފައިވަނީ ، ޝެރޯންއަށް ޚިދުމަތްކުރަން ތިބި ނަރުހުންގެ ފަރާތުންނެވެ. ދަރިންގެ ފަރާތުންނާއި ޝެރޯނަށް ޒިޔާރަތްކުރާ މީހުންގެ ފަރާތުން ، އެއްވެސް ވާހަކައެއް އިވިފައެއް ނުވެއެވެ. މަރުވުމުގެ ކުރިންނާއި އޭގެފަހުންނެވެ. ގިނަ ވާހަކަތައް ދެކެވިފައިވަނީ ، ޝެރޯން މަރުވުމުގެ ފަހުންނެވެ. ކޯމާގައި އޮތް 8 އަހަރުދުވަހުގެ ތެރޭގައި ، ޝެރޯނަށް ޚިދުމަތްކުރުމަށް ޢައްޔަން ކުރެވުނު ވަރަށްގިނަ ނަރުހުން ބަދަލުވެފައި ވެއެވެ. އެކިއެކި ސަބަބާހުރެއެވެ.

ޝެރޯން ބޭއްވިފައިއޮތް ކޮޓަރިން ފެންނަމުންދިޔަ ބިރުވެރިކަންކަމާގުޅިގެން ބައެއްކުދިން އެކޮޓަރީގެ ޑިއުޓީ އަދާކުރުމަށް ޢުޒުރުވެރިވެފައި ވެއެވެ. އަނެއްބައިކުދިން ، ބިރުގަނެ ، ދަންވަރު އެތަނުން ނުކުމެ ، އަލުން ޑިއުޓީއަށް ވަނުމަށް ދެކޮޅު ހަދައެވެ. ބައެއްކުދިން ވަޒީފާއިން ވަކިވެފައިވެސް އެބަހުއްޓެވެ. ޝެރޯނަކީ ކިހާވަރެއްގެ ކާކުކަން ގިނަކުދިންނަށް އެނގެއެވެ. ބޮޑުވަޒީރުކަން ކޮށްފައިހުރި ، ބަލިއެނދުގައި އޮތް މީހަކަށް ޚިދުމަތްކުރުމަކީ ޝަރަފެއްކަމަށްދެކޭ ނަރުސްކުދިންވެސް ތިއްބެވެ. އެކޮޓަރިން ފެންނަ ކަންކަމަކީ އެކުދިންނަކަށް މާބޮޑުކަމަކަށް ނުވެއެވެ.

ޝެރޯން އިންޓެންސިވް ކެއަރ ޔުނިޓްގައި ބޭއްވުނު ފުރަތަމަ ދުވަސްކޮޅުގެ ތެރޭގައި ، ލޮލުން ފެން ފޭބިއެވެ. ކުޑަކުޑަކޮށް ތުންފަތަށް ހިނިތުންވުން އައެވެ. ބިރުވެރިގޮތަކަށް ކަޅި ހިންގިއެވެ. ދެބުމަ ގޮށްޖެހި ، ނިތްކުރިން ރޫއަރުވާކަމުގެ ނިޝާން ފައުޅުވިއެވެ. އޭނާއަށް އަޑު އިވޭކަމަށް ، އިސްރާއީލާއި އެމެރިކާގެ ސައިންޓިސްޓުންކުރި ޓެސްޓްތަކުން ދެއްކިއެވެ. އެހެންނަމަވެސް ، ފެންނަ އެއްޗަކަށް އިވޭ އަޑަކަށް ޖަވާބެއް ނުދެވެއެވެ. މިޙާލަތު ދާދިއަވަހަށް ބަދަލުވިއެވެ. ލޮލުން ފެންފޭބުމާއި ކަޅި ހިނގުންފަދަ ކަންކަންވެސް ހުއްޓުނެވެ. އެހެންނަމަވެސް ، ވަރަށްގިނަދުވަސް ވަންދެން ، އަޑުއިވުނުކަމަށް ސައިންޓިސްޓުންގެ ޓެސްޓްތަކުން ދެއްކިއެވެ. މިޓެސްޓްތައް ހެދީ ، އެމެރިކާއާއި އިސްރާއީލުގެ ސައިންޓިސްޓުންނެވެ. އިސްވެ ތިބީ ، ކޮގްނެޓިވް ސައިކޮލޮޖީގެ އެސިސްޓެންޓް ޕްރޮފެސަރ މާޓިން މޮންޓީ އާއި ޕްރޮފެސަރ އެލޮން ފްރީޑްމަން އެވެ.  ޝެރޯންގެ ޞިއްޙަތާބެހޭ މަޢުލޫމާތު ، ހޮސްޕިޓަލުގެ ފަރާތުން ހާމަކުރަމުން ގެންދިޔައީ ، ޓެލްހެޝޯމަރ ހޮސްޕިޓަލުގެ ޑިރެކްޓަރ ޑރ. ޒީވް ރޮޓްސްޓީން އެވެ.

ޝެރޯން ބާއްވާފައި އޮތް ކޮޓަރިއަކީ ތަނަވަސް ، ބޮޑު ކޮޓަރިއެކެވެ. ކޮޓަރީގެ ބިރުވެރިކަމާއި ނާމާންކަން އެންމެބޮޑަށް އިޙްސާސް ކުރެވުނީ ، ޑިއުޓީގައި ބައިތިއްބާފައިތިބޭ ނަރުހުންނަށެވެ. ޚާއްޞަކޮށް ، ރޭގަނޑުގެ ޑިއުޓީގައެވެ. ފުރަތަމަ ކޮޅުގައި ރޭގަނޑުގެ ޑިއުޓީގައި ބެހެއްޓުނީ އެންމެ ނަރުހެކެވެ. އެއްކުއްޖަކަށް ނިދިޖެހުމާއި އެކަނި ހުންނަން ބިރުގަތުންފަދަ ކަންކަމާ ގުޅިގެން ، ފަހުންފަހުންއައިސް އަބަދުވެސް ، ދެނަރުހުން ޑިއުޓީގައި ހޭލާ ބައިތިއްބައެވެ. ރޭގަނޑުގެ 8 ޖެހުމާއެކު ، އެންމެ ބޮތްކެއް ފިޔަވައި ، ކޮޓަރީގެ ބޮކިތައް ނިއްވައި ލެވެއެވެ. ދިއްލާފައި ހުންނަ ބޮކި ހުންނަނީ ޝެރޯން އާ ދިމާއަށް އަލިވާގޮތަށް ބެހެއްޓިފައެވެ. އަލުން ބޮކިތައް ދިއްލަނީ ހެނދުނު 8 ޖަހާއިރުއެވެ. ބޮކިތައް ނިއްވައިލުމާއެކު ، ނަރުހުން އެމީހުންނަށް ޚާއްޞަކޮށްފައިހުންނަ ގޮނޑީގައި ޖައްސައިލައެވެ. ބައެއްފަހަރަށް ދެކުދިންނަށް އެއްފަހަރާ ނިދިޖެހޭގޮތްވެސް ވެއެވެ. ރޭގަނޑުގެ ގަޑީގައި އެކުދިންކުރަން މާބޮޑުކަމެއް ނޯވެއެވެ. އަބަދުވެސް އޮންކޯލްގައި ، ޝެރޯނަށް ޚާއްޞަކޮށް ، ޑޮކްޓަރަކު ބެހެއްޓިފައި ހުރެއެވެ.

ކޮޓަރީގެ ނާމާންކަން ބޮޑުވަނީ ބޮކިތައް ނިއްވައިލީމައެވެ. ރޭގަނޑުގެ ދަންބަޔަށް އަޅައިލީމަ ، ކޮޓަރިތެރެއިން ކުނިވަސް ދުވާކަމަށް ނަރުހުން ފާހަގަ ކޮށްފައި ވެއެވެ. އެހެންނަމަވެސް ރޭގަނޑުގެ ފަތިސްބަޔަށް އަޅާއިރަށް އެވަސް ކެނޑިގެން ދެއެވެ. ބައެއް ނަރުހުންގެ ފަރާތުން އެނގުނުގޮތުގައި ، އޭގެތެރެއިން ބައެއްކުދިންނަށް ނިދިޖެހިފައި ތިއްބާ ، ތޫނު ނާމާން އަޑެއްއިވި ސިއްސައިގެންގޮސް ހޭލެވެއެވެ. ބައެއް ރޭރޭ ދަންގަޑީގައި ، ތުނިވިލާކޮޅެއްދާގޮތަށް ޝެރޯންގެ ވަށައިގެން ހިޔަންޏެއް އެނބުރެއެވެ. އަނެއްބައިފަހަރަށް އަލިކަމެއް އައިސް މުޅިކޮޓަރިތެރެ އަލިކޮށްލައެވެ. އެއަލީ އެހާގިނައިރަކު ނުހުރެއެވެ. ބައެއް ރޭރެޔަށް އެތައްބަޔަކު އެއްފަހަރާ ރޮއިގަންނަގޮތަށް ރުއިމުގެ އަޑުފައްގަނޑެއްވެސް އިވިފައި އެބަހުއްޓެވެ. އެއްނަރުހަކު ބުނެފައިވާގޮތުގައި ، އެއްރެޔަކު އޭނާއަށް އެނދާދިމާއަށް ބަލައިލެވުނު އިރު ، މީހަކު ދަންޖެހިފައިހުރިގޮތަށް ، ބޯއެލިފައި އެނދުމަތީ ޝެރޯން ކޮޅަށްޖެހިފައި ހުއްޓެވެ. ދެންއިން ކުއްޖާއަށް ގޮވާލައިގެން ދެމީހުން އެނދުކައިރިޔަށް ދިޔައިރު ، ޝެރޯން އޮތީ ކުރިންވެސް ބޭއްވިފައި އޮތްގޮތަށެވެ.

ޝެރޯން އެނދުމަތިކުރެވުނުތާ ކުރީކޮޅު ، ގުގުރިދަމާމީހަކު ބާރަށް ގުގުރިދަމާގޮތަށް އެނދާ ދިމާއިން ގުގުރީގެ އަޑު އިވުނެވެ. ނަރުސްކުދިން އެނދާހަމަޔަށް ދާއިރަށް އެއަޑު ކެނޑެއެވެ. އެއްކުއްޖަކު ބުނެފައިވާގޮތުގައި ، ޝެރޯންއަށް ޒިޔާރަތްކުރާމީހުން ގެންނަ މާބޮޑިތައް ހުންނަނީ ތަރުތީބުކޮށް ވަކިތާކު ބެހެއްޓިފައެވެ. ބައެއްދުވަސްދުވަހު ހެނދުނުވާއިރު ، އެމާބޮނޑިތައް ކުދިކުދިވެފައި ބިންމައްޗަށް އެޅިފައި ހުރެއެވެ. ޝެރޯންގެ ހެދުން ބަދަލުކުރާއިރު ، ހެދުމުގައި ގިނަޢަދަދަކަށް ލޭ ހޭކިފައި ހުރެއެވެ. އެހެންނަމަވެސް ، ހަށިގަނޑުގެ އެއްވެސްތާކުން ލޭއައިސްފައެއް ނުހުރެއެވެ. ނިދިޖެހިފައިތިބޭ ބައެއް ނަރުސްކުދިންނަށް ، ރޭގަނޑު ދަންވަރު އެކުދިންގެ ނަމުން ގޮވާލެވިގެން ހޭލެވޭކަމަށް ވެއެވެ. ހޭލެވިގެން ބަލައިލާއިރު އެކުދިންނަށް ގޮވާނެ އިތުރުމީހަކު އެކޮޓަރިތެރެޔަކުން ނުފެނެއެވެ. ބައެއް ނަރުސްކުދިންގެ ގައިގާ މީހަކު ބީހިލާކަމުގެ އިޙްސާސް ކުރެވިފައި އެބަހުއްޓެވެ. ހެނދުނު ބަލައިލާއިރު އެތަންތަން ރަތްވެފައި ހުރެއެވެ. ބައެއްކުދިންގެ ގައިން އެފަދަ ތަންތަނުގައި ފިތްގަނޑުގަނޑު ނަގާފައި ހުރެއެވެ.

ނަރުސްކުދިންނަށް ނިދިޖެހިފައި ތިބި ރެޔެއްގައި ދެބަދޭތެރެވީތަނާ ، ޝެރޯން ބޭއްވިފައިއޮތް އެނދުގެ ވަށައިގެން އަލިފާން ރޯވެފައިހުރިތަން ފެނިގެން ރަނގަޅަށް ދެލޯހުޅުވައިލިއިރު ، ހަމަ ރަނގަޅަށްވެސް އެނދުގައި ހުރީ އަލިފާން ހިފާފައެވެ. އަލިފާން ނިއްވާ ގޭސްފުޅި ހިފައިގެންއައިސް އެނދާ ކައިރިވިއިރު އަލިފާނުގެ އެއްވެސް އަސަރެއް އެނދަކު ނެތެވެ. އެކަމަކު ، އެނދާ ކައިރިވާވަރަކަށް ހޫނުގަދަވިއެވެ. ޝެރޯންގެ ލޯއޮތީ ހުޅުވިފައެވެ. އެކަމަކު ޙަރަކާތެއްނެތެވެ. ޝެރޯން ބާރަށް ރޯއަޑު އިވިގެން ނަރުސްކުދިން އެނދުކައިރިޔަށް ދާއިރު ، އެއަޑު ކެނޑެއެވެ. ޝެރޯންގެ އަނގައިން އެއްވެސް އަޑެއް ބޭރެއްނުވެއެވެ. ހޮސްޕިޓަލްތަކަކީ ޞިއްޙީ ސަބަބުތަކަކަށްޓަކައި ޢާންމުގޮތެއްގައި ފިނިކޮށް ހުންނަ ތަނެކެވެ. އައިސީޔޫއަކީ ވަކިންބޮޑަށް ފިނިކޮށްފައި ހުންނަ ތަނެކެވެ. ޝެރޯން ބޭއްވިފައި އޮތް ކޮޓަރި އެހާ ފިނިކޮށް އޮންނަ އިރުވެސް ، އެތާތިބޭ ނަރުސްކުދިން ދާހިއްލާވަރަށް ބައެއް ފަހަރަށް އެތަން ހޫނުވެއެވެ. އެކަން ބޮޑަށް އިޙްސާސް ކުރެވެނީ ރޭގަނޑުގެ ދަންގަޑީގައެވެ.

ޝެރޯން އެނދުގައި ބޭއްވިފައި އޮންނަނީ އުޑުތިލަމަތިންނެވެ. ޝެރޯން ސާފުކުރުމަށް އުޅޭ ބައެއްކުދިން ސާފުކުރަމުންދާއިރު ، ޝެރޯންގެ މޫނު ، އާދަޔާޚިލާފަށް ކަޅުވެފައި ހުއްޓާ ފެނިފައި އެބަހުއްޓެވެ. އެހެންނަމަވެސް ، އިރުކޮޅަކުން މޫނުގެ ކުލަ އަލިވެއެވެ. ޝެރޯން ސާފުކުރުމުގެ މަސައްކަތުގައި ހަ ނަރުހުން ޙަރަކާތްތެރި ވެއެވެ. ބައެއްފަހަރަށް ، އަރިއަރިޔަށް ޖަހަން ހިފާލާއިރު ، ބަރުކަމުން ނުއުފުލި އެނދާ ހަށިގަނޑު ގުޅިތަތްވެފައި ހުރެއެވެ. ވަތްކެއް ނުކުރެވެއެވެ. ޝެރޯނަކީ ބިޔަ އަދި ފަލަމީހެކެވެ. ހޮސްޕިޓަލަށް ގެންދެވުނުއިރުވެސް ބަރުދަނުގައި 136 ކިލޯ ހުއްޓެވެ. 8 އަހަރުވަންދެން ކޯމާގައި އޮތްއިރުވެސް ، މާބޮޑަކަށް ގައިގެ މަސްތައް ވިރިގެންނެއް ނުދެއެވެ. ގައިން މަސްކޮޅު ވިރި ހަމާ ކަށްޓާ ތަތްލާގޮތެއް ނުވެއެވެ.

ޝެރޯން ބޭއްވިފައި އޮތް ކޮޓަރިން ޢާންމުކޮށް ފެންނަމުންދިޔަ ކަމެއްގެ ގޮތުގައި ނަރުސްކުދިން ފާހަގަކޮށްފައިވަނީ ، ރޭގަނޑުގެ ވަގުތުތަކުގައި ، ކޮޓަރީގެ ދޮރު ހުޅުވާ އަޑުނީވި ، ދޮރުން މީހަކު ވަދެގެން އައިސް ޝެރޯންގެ އެނދުގެ ބޯލާކޮޅުގައި ހުއްޓޭ މަންޒަރެވެ. އެއީ ކާކުކަމެއް އަދި ކޮންސިފައެއްގައި ހުންނަ މީހެއްކަމެއް އެކުދިންނަށް ފާހަގަ ކުރެވިފައެއް ނުވެއެވެ. އެމީހަކު ހުންނަނީ ކަޅު ހިޔަންޏެއްގެ ސިފައިގައެވެ. ހުންނަނީ ކަޅު ހެދުމުގައެވެ. އޭގެ އިތުރަށް ދެން އިވޭކަމަށް ފާހަގަކުރެވެނީ ، ރޭގަނޑުގެ ދަންވަރުގަޑީގައި ، މީހަކު ނުފެނި ދޮރާހަމައިން ޝެރޯންގެ އެނދާހަމަޔަށް ބަރުފިޔަވަޅުތަކެއް އަޅާ އަޑެވެ. ބައެއް ފަހަރަށް ، އެނދުން ދޮރާހަމަޔަށްވެސް އެއަޑު އިވެއެވެ. ނުފެނި އެއަންނަ މީހަކު އައިސް ނުކުމެގެން ދަނީއެވެ. ޝެރޯން ކޯމާގައިއޮތް ދުވަސްތަކުގައި ، އޭނާ ބޭއްވިފައިވާ ކޮޓަރިން އިވި ފެނުނު ހުރިހާކަމެއް ހާމައެއް ކުރެވިފައެއް ނުވެއެވެ. މިއީ އޭގެތެރެއިން ބަޔެކެވެ.