އިސްރާއީލު ބޮޑުވަޒީރު ބެންޖަމިން ނަތަންޔާހޫގެ ސަރުކާރުން ޝަރުއީ ދާއިރާއަށް ގެންނަންއުޅޭ އިސްލާހުތައް މަޑުޖައްސާލުމަށް ގޮވާލައި ދިފާއީ ވަޒީރު ޔޮއާވް ގަލަންޓް ވާހަކަދެއްކިތާ އެއްދުވަސް ފަހުން، ބޮޑުވަޒީރު ނަތަންޔާހޫ އޭނާ މަގާމުން ވަކިކޮށްފިއެވެ. އިއްޔެ ނަތަންޔާހޫ އެޅި މިފިޔަވަޅާ ގުޅިގެން އޭނާއާ ދެކޮޅަށް ވަރުގަދަ މުޒާހަރާތަކެއް ފެށިގެން ކުރިއަށް އެބަދެއެވެ.
މުޒާހަރާތައް ވަރުގަދަވެފައި ވާއިރު، އެތައް ހާސް ބަޔަކު ދަނީ ޓެލްއަވީވްގައި އިސްރާއީލުގެ ގާނޫނުހަދާ މަޖިލިސް، ކްނެސެޓްގެ އިމާރާތާއި، ބޮޑުވަޒީރު ނަތަންޔާހޫގެ ގޭގެ ކުރިމައްޗަށް އެއްވެ އޭނާއާ ދެކޮޅަށް އަޑުއުފުލަމުންނެވެ. އަދި އެތައްހާސް ބަޔަކު ވަނީ ނުކުމެ މައި ހައިވޭއެއްވެސް ބަންދުކޮށްފައެވެ.
އިސްރާއީލު ސިފައިންގެ ރޭޑިޔާއިން ބުނި ގޮތުގައި، އިހުތިޖާޖުކުރާ މީހުން ވަނީ ނަތަންޔާހޫގެ ގޭގެ ކުރިމަތީގައި ސަލާމަތީ ބާރުތަކުން ބަހައްޓާފައިހުރި ދަގަނޑު ހުރަސްތައް ދުރުކޮށް އެތެރެއަށް ވަދެގަންނަން މަސައްކަތްކޮށްފައެވެ. އަދި އިސްރާއީލުގެ ޗެނެލް 12 ޓީވީން ބުނި ގޮތުގައި އިސްރާއީލުގެ "އެތެރޭގެ ކޮންޓުރޯލު ގެއްލިދާނެތީ" ސިފައިން ވަނީ ކުއްލި ހާލަތަކަށް ގެނެސްފައެވެ.
ޓެލްއަވީވްގެ އިތުރަށް ޤުދްސާއި، ހައިފާއާއި އެހެން ރަށްރަށުގައި ވެސް މުޒާހަރާކުރާ މީހުން ވަނީ މަގުމައްޗަށް ނުކުމެފައެވެ.
ދިފާއީ ވަޒީރު ގަލަންޓް މަގާމުން ވަކިކުރި އިރު، އޭނާއަކީ ނަތަންޔާހޫގެ ލިކޫޑް ޕާޓީގެ އިސް މެންބަރެކެވެ. އޭނާ ނަތަންޔާހޫގެ ޝަރުއީ އިސްލާހުތާ ދެކޮޅަށް ފާޅުގައި އަޑުއުފުލުމުން ލިކޫޑް ޕާޓީ ތެރޭގައި ބައިބައިވުން އުފެދިދާނެ ކަމުގެ ބިރު މިހާރު ވަނީ ހީވެފައެވެ.
ނަތަންޔާހޫގެ މިފިޔަވަޅުން ދޭހަވަނީ އެތައްހާސް ބައެއްގެ ދެކޮޅު ހެދުމާއެކުވެސް، އޭނާ ޝަރުއީ ނިޒާމަށް ގެންނަންއުޅޭ އިސްލާހުތަކާއިގެން ކުރިއަށް އޭނާ ހުރިކެމެވެ. އަދި މިކަމުގައި އެއްވެސް ވަރަކަށް ދޫދޭން އޭނާ ބޭނުންނުވާ ކަމެވެ. އޭނާގެ މި އިސްލާހުތަކާ ދެކޮޅު ހަދަނީ އާއްމުން އެކަންޏެއް ނޫނެވެ. ސިފައިންގެ އިސް އޮފިސަރުންނާއި، ބޮޑެތި ވިޔަފާވެރިންވެސް މިކަމާ ދެކޮޅުއިރު، އިސްރާއީލުގެ އެކުވެރި ގައުމުތަކުން ވެސް ވަނީ މި އިސްލާހުތަކާ މެދު ކަންބޮޑުވުން ފާޅުކޮށްފައެވެ.
ބޮޑުވަޒީރުގެ އޮފީހުން އިއްޔެ ނެރުނު ބަޔާނެއްގައި، ބޮޑުވަޒީރު ނަތަންޔާހޫ އޭނާގެ ދިފާއީ ވަޒީރު ޔޮއާވް ގަލަންޓް މަގާމުން ދުރުކޮށްފައިވާކަމަށް ބުނުފައިވާއިރު، ނަތަންޔާހޫ އިއްޔެ ކުރި ޓުވީޓެއްގައި ބުނެފައި ވަނީ "ދެކޮޅުހަދާ އެންމެންނާ ދެކޮޅަށް އަހަރުމެން ގަދަފަދައަށް ތިބެންޖެހޭނެ" ކަމުގައެވެ.
ދިފާއީ ވަޒީރު މަގާމުން ދުރުކުރުމާއެކު އެކަމާ ދެކޮޅަށް އިހުތިޖާޖުކުރުމުގެ ގޮތުން އެމެރިކާގެ ނިއުޔޯކުގައި ހުންނަ އިސްރާއީލުގެ ކޮންސުލް ޖެނެރަލް އަސަފް ޒަމީރްވެސް ވަނީ މަގާމުން އިސްތިއުފާދީފައެވެ. އޭނާ ބުނީ "މި ސަރުކާރު ތަމްސީލުކުރަން ދެން ނުހުރެވޭނެ" ކަމުގައެވެ.
ދީފާއީ ވަޒީރު މަގާމުން ދުރުކުރުމާ ގުޅިގެން އިދިކޮޅު ލީޑަރު ޔައިރް ލަޕިޑް ކުރި ޓުވީޓެއްގައި ބުނެފައި ވަނީ "އިސްރާއީލުގެ ބޮޑުވަޒީރު އިސްރާއީލުގެ ދައުލަތުގެ ސަލާމަތަށް ހުރި ނުރައްކަލަކަށް ވެފައި" ވާކަމުގައެވެ.
