( 24 މާރިޗު 2023 ގައި ޝާއިއުކުރި ބަޔާ ގުޅޭ
އާދައިގެމަތިން ، ލަހުން ގެޔަށް އަންނަ އަޝްހަރު މިރޭވެސް އަވަހަށް ގެޔަށް އަންނާކަށް ނުވިސްނައެވެ. އަޝްހަރު އިނީ ސާރާއާއެކު ރެސްޓޯރެންޓެއްގައި ކާށެވެ. ދެމީހުން މަޖާކުރަމުން އެކިވާހަކަ ދައްކަމުން ގެންދިޔައެވެ. އަޝްހަރާ ދިމާއަށް ، ސާރާގެ މަންމަ ބުނެފައިވާ ވާހަކަތަކުން ސާރާ ހުރީ ކަންބޮޑުވެފައެވެ. އަޝްހަރު އޭނާގެ ލޯތިން ގެއްލިދާނެ އެއްވެސް ކަމެއް ވާކަށް ސާރާއެއް ނޭދެއެވެ. އެކަން ވެދާނެ އެއްވެސް ވާހަކައެއް ، އެއްވެސް މީހަކު ބުނާކަށްވެސް ސާރާއެއް ނޭދެއެވެ. އޭނާގެ އަމިއްލަ މަންމައަކީ ، ސާރާގެ މަގަށް އެޅޭ ހުރަހަކަށްވާކަށް އޭނާ ބޭނުމެއް ނޫނެވެ. އެކަން ވަރަށް ސާފުކޮށް މަންމަޔަށް އޮތީ ހާމަކޮށްދީ ، އެފަދަކަމެއް ނުކުރުމަށް އިންޒާރުކޮށްފައެވެ.
މަންމަގެ ވާހަކަތަކަށް މާބޮޑަށް ނުވިސްނުމަށް ސާރާ ، އަޝްހަރުގެ ކިބައިން އެދުނެވެ. މަންމަމެން މުސްކުޅިން ދައްކާ ވާހަކައިގާ މިޒަމާނަށް ފެތޭފަދަ އޮށްޓަރެއް ނުހުންނާނެއެވެ. މީހަކާ އިނުމަށްފަހު ، އަނބިދަށުވެގެން ރައްޓެހިންނާ ދުރުވުން އެއީ ބޯދާ ކަމެކެވެ. މަންމަގެ ބަހަށް ނުހެއްލުމަށް ސާރާ ، އަޝްހަރުގާތު ބުންޏެވެ. އެހެންނަމަވެސް ، އެކަމުގައި އަޝްހަރުގެ ވިސްނުން ތަފާތެވެ. ފަހަރެއްގައި ސާރާގެ މަންމަ އެބުނީ ރަނގަޅުވާހަކައަކަށް ވެދާނެކަމަށް އަޝްހަރު ބުނެއެވެ. ސާރާއާއި އަޝްހަރާ ދެމީހުން އަބަދު ، އެގޮތަށް ބައްދަލުވެ އެކުގައިއުޅުން އެއީ ރަނގަޅުކަމެއް ނޫންކަމަށް އޭނާއަށް ވިސްނޭކަމުގައި އަޝްހަރު ބުންޏެވެ. އެވިސްނުން ސާރާއަކަށް ޤަބޫލެއް ނުކުރެވެއެވެ. ކުރިން ގޯސްނުވިކަމެއް މިހާރު ގޯސްވުން އެއީ ސާރާއަށް ޤަބޫލުކުރެވޭ ކަމެއްނޫނެވެ. ސާރާ އެބުނަނީ ކީކޭކަން އަޝްހަރަށް ވިސްނެއެވެ. ދެރައްޓެހިންގެ ގޮތުގައި ދެޖިންސުގެ ދެމީހުން ، ކައިވެންޏަކަށްފަހު ބައްދަލުކޮށްއުޅުން އެއީ ، ޒަމާނަށް ފެތުނަސް ، މީހުންނަށް ޤަބޫލުކުރެވޭނެކަމެއް ނޫނެވެ. އަމްދުން އެއީ ، އިސްލާމީ މުޖުތަމަޢެއްގެ ސުލޫކީ މިންގަނޑުތަކާ ޚިލާފު ކަމެކެވެ.
ސާރާގެ ސިކުނޑީގައި އޭނާގެ ކޮޅަށް އަޝްހަރު ލެންބުމަށްޓަކައި ރޭވިފައިއޮތީ ކޮންފަދަ ރޭވުމެއްކަމެއް ، ޚުދު ސާރާއަކަށްވެސް ނޭނގެއެވެ. އެނގޭހާވެސް ކަމަކީ ، އަޝްހަރު ދެކެ އޭނާ އިންތިހާއަށް ލޯބިވާކަމެވެ. އަޝްހަރު އޭނާގެ ދިރިއުޅުމަށް ގެނައުމަށްޓަކައި ކޮންމެފަދަ ކަމެއްވެސް ކޮށްފާނެކަމެވެ. އަދި ސާރާ ، އޭނާގެ ގޮތް ދޫނުކުރާނެ ކަމެވެ. އެކަން އެނގެނީ ސާރާ އަށާއި އޭނާގެ މަންމައަށް އެކަންޏެވެ. އެކަމާ ގުޅިފައިތިބި އެހެން އެންމެންގެ ލޮލުގައިވަނީ އަނދުނެއް އެޅުވިފައެވެ. ސާރާގެ އަޞްލެއް އެއްވެސް މީހަކަށް ނޭނގެއެވެ.
" ޚައިރާދަށް ވަގުތު ނުދެވޭތީ އެއީ ކުށެއްކަމަށް އަޝްހަރަށް ޤަބޫލު ކުރެވެނީ ދޯއެވެ ؟ ޚައިރާދަށް ޙައްޤު ވަގުތު އޭނާއަށްދީ އޭނާއާއެކު ވަގުތު ހޭދަކުރާށެވެ ! ފިރިއެއްގެ ވާޖިބު އަދާކުރެވޭތޯ ބަލާށެވެ ! ﷲ އަށްޓަކައި ބުނަމެވެ. އަޝްހަރުގެ ކައިވެންޏާ އަހަރެމެންގެ ރަޙުމަތްތެރިކަން ދެކަމެއްގެ ގޮތުގައި ބާއްވައިދޭށެވެ. އަހަރެމެންގެ ރަޙުމަތްތެރިކަމަކީ ، އަޝްހަރުގެ ކައިވެނީގެ މާކުރިން އުފެދިފައިއޮތް ގުޅުމެކެވެ. ތިޔައީ އަހަރެންގެ ބެސްޓް ފްރެންޑެވެ. އަޝްހަރަށްޓަކައި އަހަރެން މުޅިދުނިޔެއާ ހަނގުރާމަ ކުރާނަމެވެ. އަހަރެމެންގެ ރަޙުމަތްތެރިކަން ދަމަހައްޓަންޖެހޭ ސަބަބުތައް އަހަރެން ދައްކާނަމެވެ. " ކާމޭޒުދޮށުގައި ރެސްޓޯރެންޓްގައި ތިބެ ، ސާރާ ، އަޝްހަރަށް ނަޞޭޙަތް ލައިދެމުން ގެންދިޔައެވެ.
އަޝްހަރު އިނީ ސާރާގެ ވާހަކަތައް ކަނުލައި އަޑުއަހާށެވެ. އިތުރު ވާހަކައެއް ނުދައްކައި މަޑުމަޑުން ހިނިތުން ވެލައިގެންނެވެ. ސާރާ އެދައްކާ ވާހަކައިގެ ޙަޤީޤަތުގެ މައްޗަށް ޣާފިލުވެގެންނެވެ. އެވާހަކަތަކުގެ އަޞްލު މަޤްޞަދަކީ ކޮބައިކަމެއް އަޝްހަރަކަށް ނޭނގެއެވެ. ސާރާގެ ވާހަކަ ނިމި އެތައް އިރެއްވީ އިރުވެސް އަޝްހަރުގެ ހަމަހިމޭންކަން ފިލައިގެންނެއް ނުދެއެވެ. އަޝްހަރު އެއިނީ ޚައިރާދާ ބެހޭގޮތުން އޭނާގެ އަމިއްލަ ނަފްސު ، ވިސްނުމުގެ ތެރެޔަށް ދޫކޮށްލައިގެންނެވެ.
އަޝްހަރަށް ވިސްނޭގޮތުގައި އެކައިވެނީގެ މަޖުބޫރުކަން އޮތީ ހަމައެކަނި އޭނާއަށް އެކަންޏެއްނޫނެވެ. ޚައިރާދުވެސް ވަނީ އެމަޖުބޫރުގައި ތާށިވެފައެވެ. ދެމީހުންނަށްވެސް އެކަށިތަކުން ފުރިގެންވާ ބޯ ޖަންގައްޔަށް ވަދެވިފައި އެތިބީ ކުރިމަތިވި މަޖުބޫރީ ޙާލަތެއްގައެވެ. އެކަމަށް ދެމީހުން އެދިގެންނެއްނޫނެވެ.
" އަޝްހަރެވެ. ޚައިރާދުގެ ނަޞީބު ގަދައީއެވެ. އަޝްހަރުފަދަ ފިރިއެއް ލިބުމަކީ ހުވަފެނުންވެސް ޚައިރާދަށް ފެންނާނެ ކަމެއްނޫނެވެ. އެކަން އަޝްހަރަށްވެސް އެނގޭނެއެވެ. އެހެންވީމާ އެއީ ޚައިރާދަށް ލިބުނު ބޭއިންސާފެއްނޫނެވެ. ބޭއިންސާފު ލިބިފައި ތިއޮތީ އަޝްހަރަށެވެ. ބޭނުންނުވާ ، ހިތްނޭދޭ އަނތްބެއްގެ ފިރިއަކަށް ވުމުގެ ބަދުނަޞީބެވެ. " ސާރާ ބުންޏެވެ.
އަޝްހަރު އެބުނި ވާހަކަޔަކާއި ސާރާ އެދިން ޖަވާބު ދިމަލެއް ނުވެއެވެ. އަޝްހަރުގެ ނުކުތާއަކީ ، އޭނާއެކޭ އެއްގޮތަށް ޚައިރާދަށްވެސް ކުރިމަތިވި މަޖުބޫރީ ޙާލަތެވެ. މާމޮޅުކަމެއް ޙާޞިލްވެގެން އުފަލުން އުޅޭގޮތަކަށް ޚައިރާދެއް ނޫޅެއެވެ. އަދި އަޝްހަރު ހައްލާލައިގެން އެކައިވެނީގެ ދިރިއުޅުމުގެ ތެރެޔަށް ދަތުރުކުރަން ބޭނުންވާކަމުގެ އެއްވެސް ނިޝާނެއް ޚައިރާދުގެ ފަރާތަކުން ނުފެނެއެވެ. ކައިވެނި ދެމެހެއްޓުމަށް އެއްވެސް މިންވަރަކަށް އިސްނަގާތަނެއްވެސް ނުފެނެއެވެ. މުޅިންވެސް ފެންނަނީ ލަދުވެތިކަމާއި ދުރުހެލިކަމާ އަދި މަޖުބޫރީ އިޙްސާސް ތަކެކެވެ. އެހެންކަމަށްވަންޏާ ، އަޝްހަރު ކިތަންމެ މުއްސަންޖަސް އަދި ކިތަންމެ މޮޅަސް ، އެކައިވެނި އެއީ ޚައިރާދުގެ ނަޞީބުކަމަށް ބަލާނެގޮތެއް އަޝްހަރަކަށް ނުވިސްނެއެވެ.
**************************
ގޭގެ ބިޔަ ، އަދި މީރުވަސްދުވާ މާގަސްތަކުން ޒީނަތްތެރި ކުރެވިފައިވާ ތަނަވަސް ބަގީޗާ ތެރޭގައި ބަޝީރަތާއި ޚައިރާދު ވާހަކަ ދައްކާލަން ތިއްބެވެ. މުޅިތަނުން ދުވަނީ އެކިމާމަލުން އެކުވެ މަސްހުނިވެފައިވާ މީރު ވަހެވެ. އެދެމީހުން ނޫން އެހެން މީހަކު އެތާކު ނެތެވެ. ބަޝީރަތުގެ ވާހަކަ ފެށީ ޚައިރާދުގެ ކައިވެނިންނެވެ. އަޝްހަރުގެ ފަރާތުން ޚައިރާދަށް އެއްވެސް އުފަލެއް ނުލިބުން އެއީ ކަންބޮޑުވާ ކަމެއްކަމަށް ބަލައިގެންނެވެ. އެދެކުދިންގެ ކައިވެނިން ، ބަޝީރަތު އުއްމީދުކުރި މަޤްޞަދު ޙާޞިލް ނުވުމުގެ ހިތާމައިންނެވެ. ޚައިރާދާ ދޭތެރޭ އަޝްހަރު ކަންތައް ކުރަމުންގެންދާ ގޮތާމެދު ކަންބޮޑުވުން ފާޅުކުރަމުންނެވެ. އަޝްހަރު އުޅެނީ އޭނާގެ އަމިއްލަ ދިރިއުޅުމަށް ފިލައިގެންކަމަށް ބުނަމުންނެވެ. ރޭގަނޑު ލަހުން އައުން އެއީ ކުރިން އަޝްހަރުގެ އާދައެއް ނޫނެވެ. އެއްސުފުރާ މަތީ ދެބަފައިން ނުކާތާ އެތައް ދުވަހެއް ވެއްޖެއެވެ. ދެކުދިންކުރެ އެއްކުއްޖެއްގެ މޫނުމަތިންވެސް ހިނިތުންވުމުގެ އެއްވެސް އަސަރެއް ނުފެނެއެވެ. ދެމީހުން އެކުގައި އުޅޭތަނެއް ނުފެނެއެވެ. ފިރިއެއްގެ ފަރާތުން ޚައިރާދަށް ލިބެންޖެހޭ ޙައްޤުތަކަށް އަޝްހަރު އެދަނީ އިހުމާލުވަމުންނެވެ.
" އަޝްހަރާމެދު އެވަނީ އިހުމާލު ވެވިފައެވެ. ބޭނުންނުވާކަމެއް އޭނާލައްވާ ގަދަކަމުން ކުރުވިފައެވެ. މަންމަ ، އަހަރެންނާމެދު އަދި ބޭބެ ، ބޭބެގެ ދަރިފުޅާމެދު ކަންތައްކުރީ ރަނގަޅަކަށް ނޫނެވެ. ގަދަކަމުން ކުރެވުނު އެ ކައިވެންޏަކީ އަހަރެންނަށްވެސް އަދި އަޝްހަރަށްވެސް ލިބޭ ތަކުލީފެކެވެ. ކައިވެންޏަކަށް ، އަހަރެމެން ދެމީހުންކުރެ އެކަކުވެސް ތައްޔާރެއްނޫނެވެ. ފަހި ދިރިއުޅުމަކަށް މަގުފަހިކޮށްދޭނެ ބާއްޖަވެރި ކައިވެންޏަކަށް ، އަހަރެމެން ދެމީހުންގެ ހިތުގައިވެސް އުއްމީދުތަކެއް އޮންނާނެއެވެ. ބޭބެއާއި މަންމަ އެވަނީ އަހަރެމެންގެ ކިބައިން އެ ފުރުޞަތު ގެއްލުވައިލާފައެވެ. މިކަމުގައި އަޝްހަރުގެ އެއްވެސް ކުށެއް ނެތެވެ. އަޝްހަރާމެދު ހިތްބަރު ނުކުރާށެވެ. އަހަރެމެންނަކީވެސް އިންސާނުންނެވެ. މިފަދަ ޙާލަތެއްގައި އެހުންނަނީ ވެދާނެ ކަންކަމެވެ. އަޝްހަރުގެ ޢަމަލުތަކަށް އަހަރެންގެ ހިތުގައި އެއްވެސް ހިތްބަރުކަމެއް ނެތެވެ. " ޚައިރާދުގެ ވާހަކަ ފެށްޓިއެވެ.
" ކޮންމެ އިންސާނެއްގެވެސް ، ބޭނުންތަކަކާއި ބޭނުންވާ ގޮތާއި އެދޭގޮތްތަކެއް އަދި ކުރިމަގަށް ކުރާ ފޮނި އުއްމީދުތަކެއް އޮންނާނެއެވެ. އަންހެންކުއްޖަކު ގެނެސް މިހިރީ ކަލޭގެ އަނބިމީހާއޭ ބުނެވޭ ހިނދު ، ފިރިހެންކުއްޖާގެ ކުރިމައްޗަށް ގެނެސް އެއަޅައިލެވެނީ އަނދައަނދާހުރި އަނގުރު އަލިފާނަށްވެސް ވެދާނެއެވެ. އެންމެ ފިޔަވަޅެއްވެސް ކުރިޔަށް އަޅާކަށް ފުރުޞަތެއް ނުއޮންނާނެއެވެ. ކުރިޔަށް ފިޔަވަޅެއް އަޅައިފިނަމަ ލިބޭނީ ގެއްލުމާއި ވޭނާ އަދި ހިތާމައާއި ތަކުލީފެވެ. ފިޔަވަޅެއް އަޅަން ފައި ހިއްލައެއް ނުލެވޭނެއެވެ. ބޭބޭއެވެ ! އެއީ ކޮންކަހަލަ އިންސާފެއް ހެއްޔެވެ ؟ " ޚައިރާދުގެ ވާހަކަ ކުރިޔަށް ގެންދިޔައެވެ.
އެ ހަމަހިމޭން މާޙައުލުގައި ، ޚައިރާދުގެ އެ އަސަރުން ފުރިފައިވާ އިޙްސާސްތަކުގެ ކުރިމަތީ ، ބުނާނެ އެއްޗެއް ބަޝީރަތަކަށް ނުވިސްނުނެވެ. އެހެންނަމަވެސް ޚައިރާދުގެ އެ ސުއާލުތަކަށް ޖަވާބުދޭން ބަޝީރަތަށް މަޖުބޫރެވެ. އެކަމެއްކުރީ ޚައިރާދުގެ މަންމައާއި އޭނާއެވެ. ޚައިރާދުގެ މަންމަ ، މިދުނިޔެއަކު ނެތެވެ. ދެންހުރިމީހަކީ އޭނާއެވެ.
" ދަރިފުޅާއެވެ ! ކޮންމެވެސް ޙައްލެއް ހޯދޭތޯ ބޭބެ ، އަޝްހަރާ ވާހަކަ ދައްކާނަމެވެ. މިގުޅުމަށް ދަރިފުޅު ހިތްހަމަޖެހޭކަމަށް ބޭބެ ހީކުރަމެވެ. " ބަޝީރަތު ބުންޏެވެ.
" ނޫނެކެވެ ! ބޭބޭއެވެ ! އަހަރެން މި ގުޅުމަކަށް ހިތްހަމައެއް ނުޖެހެއެވެ. މިއީ އަހަރެން ކައިވެންޏެއްކުރާން އެދިހުރި ގޮތެއްނޫނެވެ. މިކައިވެނިން އަހަރެންނަކަށް އެއްވެސް އުފަލެއް ނެތެވެ. މި ގުޅުމުން އަހަރެން އުފަލެއް ހޯދާނީ ކިހިނެއް ހެއްޔެވެ ؟ މަންމަ މިދުނިޔެއިން ވަކިވެގެންދަމުން ، އަހަރެންނާމެދު ކަންތައް އެކުރީ އެއްގޮތަކަށްވެސް ރަނގަޅަކަށް ނޫނެވެ. މަންމަ އެދިޔައީ ދިރިހުއްޓަސް މަރުވެފައިވާ ފުރާނައެއްގެ ގޮތުގައި މިދުނިޔެއަށް އަހަރެން ބާކީކޮށްލާފައެވެ. އަހަރެން މީހަކާ ދެވަން މަންމަ އެދުނީމަ އަޝްހަރާ ދެވަން ނިންމި ނިންމުމަކީ ، ބޭބެވެސް ރަނގަޅަށް ކުރިކަމެއްނޫނެވެ. އަހަރެންގެ ނުރުހުމުގައި މަޖުބޫރުކޮށްގެން މީހަކާ ދެވަން ބޭބެ އެއްބަސްވެގެންނެއް ނުވާނެއެވެ. އެއީ އަޝްހަރާއި އަހަރެންގެ އަމިއްލަ ނަފުސަށް ބޭބެދިން އަނިޔާއެކެވެ. ބޭބެގެ ކޮއްކޮއެއްގެ ގޮތުގައި އަހަރެންނަށް މިގޭގައި ނީނދެވޭނީ ހެއްޔެވެ ؟ މިގޭގައި އަހަރެން ހުރުމަށްޓަކައި ބޭބެގެ ޅީ ދަރިފުޅަކަށްވާންޖެހޭ ހެއްޔެވެ ؟ ބޭބެގެ ޅީދަރިފުޅަކަށްވެގެން ނޫނީ އަހަރެންނަށް މިގޭގައި ނުހުރެވޭކަމަށް ވަންޏާ ، އެހެންތާކަށް ދާން އަހަރެންނަށް ފުރުޞަތެއް ނުދިނީ ކީއްވެ ހެއްޔެވެ ؟ މިގޭގައި އަޝްހަރުގެ އަނތްބަކަށްވެގެން ނޫޅެންޏާ ބޭބެއަށް އަހަރެންނާ އަޅައި ނުލެވޭނީ ހެއްޔެވެ ؟ ބޮޑުބޭބެ އެއްގެ ޙައިޞިއްޔަތުން އަހަރެންނާ އަޅައިލާ އެހީތެރިވެވެން ފުރުޞަތު އޮއްވާ ، މިކައިވެނި ގަދަކަމުން ކުރުވީ ކީއްކުރަން ހެއްޔެވެ ؟ މިނިވަން އިންސާނެއްގެ ދިރިއުޅުމަށް ގަދަކަމުން ، އަހަރެން ގެނެސް ވެއްދުން އެއީ އެއްގޮތަކަށްވެސް އަހަރެން އެދޭކަމެއްނޫނެވެ. ކޮންމެ މީހަކަށްވެސް އޭނާގެ އަމިއްލަ މިނިވަންކަމުގެ ޙައްޤު ކަށަވަރުވާން ޖެހޭނެއެވެ. އަޝްހަރުގެ އަމިއްލަ މިނިވަންކަން އެވަނީ ނަގައިލެވިވައެވެ. " ޚައިރާދު އޭނާގެ އިޙްސާސްތައް ބޭބެގެ ކުރިމަތީ ބަންޑުން ކޮށްލިއެވެ.
" އަހަރެންގެ ނަފްސު ، ގަދަބާރުން ގެނެސް މީހެއްގެ ފައިބުޑަށް އެއްލައިލެވުމަކީ ، އަހަރެންނަށް ދެވޭ ވަރަށްބޮޑު އަނިޔާއެކެވެ. އަހަރެންނަކީވެސް އިންސާނެކެވެ. އިންސާނެއްގެ ދަރަޖަ އަހަރެންނަށްވެސް ޙައްޤުވާނެއެވެ. އަދި އަހަރެން ބޭނުންވާ ގޮތެއް އިޚުތިޔާރުކުރުމުގެ ޙައްޤުވެސް އަހަރެންނަށްވެސް ލިބެންޖެހޭނެއެވެ. އަޝްހަރު އެހުންނަނީ ގަދަކަމުން ކުރެވުނު މިކައިވެނީގައި ހިތާދެކޮޅަށް ، ހިމޭންކަންމަތީގައި ބޭބެއަށްޓަކައެވެ. އޭނާގެވެސް ހިތެއް އޮންނާނެއެވެ. އެހިތް އެދޭ ގޮތްތަކެއްވެސް އޮންނާނެއެވެ. ހުރިހާކަމެއް ޤުރުބާންކޮށްފައި ، އެއްޗެކޭ ނުބުނެ ގަދަކަމުން ހިނިތުންވެލައިގެން އެހުންނަނީ ބޭބެއަށްޓަކައެވެ. އަހަރެން އެއާ ތަފާތެވެ. އަހަރެންނަކަށް ދެން ކެތެއް ނުކުރެވޭނެއެވެ. އަހަރެންގެ އަމިއްލަ ނަފްސުގެ ފަޚުރާއި އީގޯ އަދި އަމިއްލަ ނަފުސަށް ކުރި އިތުބާރު ވިއްސިވިހާލިވެ ހިނގައްޖެއެވެ. އެތައްފަހަރަކު ބުނަންޖެހުނަސް އަހަރެން ބުނާނަމެވެ. މިކަމުގައި އަޝްހަރުގެ އެއްވެސް ކުށެއް ނެތެވެ. ރޭގަނޑު ލަހުން ގެޔަށް އަޔަސް ، ގެއިން ނުކެޔަސް އަދި ގެޔަށް ފިލައިގެން އުޅުނަސް ، އަޝްހަރުގެ ބޮލުގައި އެއްވެސް އިލްޒާމެއް އެޅުވިގެންނެއް ނުވާނެއެވެ. ބޭބެއަށް ނަމަވެސް ، މިފަދަ ޙާލަތެއްގައި ވާނީ އެހެންނެވެ. އަހަރެމެން އެންމެންވެސް މިތިބީ ތަޤްދީރު އަހަރެމެންނަށް ދެއްކި މަޖުބޫރެއްގައި ތާށިވެފައެވެ. " ޚައިރާދު ރޮމުން ރޮމުން ވާހަކަ ކުރިޔަށް ގެންދިޔައެވެ.
" އަހަރެންގެ އެއްވެސް ބޭނުމެއް މިގެޔަކަށް އަދި މިގޭގެ އެއްވެސް މީހަކަށް ނުހިފެއެވެ. އަހަރެންގެ ބޭނުމެއް ނެތެވެ. އަހަރެންނަކީ ބާކީވެފައި އިން މީހެކެވެ. އެކަމާ ވިސްނާ ވިސްނާ އަހަރެން މިހާރު އަވަދިވެއްޖެއެވެ. ބޭބޭއެވެ ! އަހަރެން ބޭނުންވަނީ ބޭބެމެންފަދަ މުއްސަނދި ފިރިޔެއްނޫނެވެ. ބޭނުންވަނީ ހަމައެކަނި ޢިއްޒަތާއި އިޙްތިރާމެވެ. އަގުވަޒަން ކުރެވޭ ޤަދަރުވެރި ދިރިއުޅުމެކެވެ. " ގިސްލުމުގެ ތެރެއިން ޚައިރާދުގެ ވާހަކަ ނިންމައިލިއެވެ.
ޚައިރާދުގެ ވާހަކަތަކަށް ހަނުއިނުން ފިޔަވައި ، ދޭނެޖަވާބެއް ބަޝީރަތަކަށް ނުފެނުނެވެ. ޚައިރާދުގެ ކޮންމެ ވާހަކަޔަކީވެސް ތެދު ޙަޤީޤަތެވެ. ޚުލްޤު ހެޔޮ ، ވިސްނުންތޫނު ދުރުވިސްނޭ އަންހެނެއްގެ ދުލުން ބޭރުވާނެ ފިލާވަޅު ތަކެކެވެ. އަޝްހަރު ، ބޭރުން އައިސް ގެޔަށް ވަތްއިރު ބައްޕައާއި ޚައިރާދު ބަގީޗާތެރޭ ތިބިތަން ފެނިފައި އެމީހުންނާ ބައިވެރިވެލުމަށް ކުރިޔަށް ޖެހިލިއެވެ. އެހެންނަމަވެސް ޚައިރާދުގެ ޖަޒުބާތީ ވާހަކަތައް އަޑުއިވިފައި ދުރުގައި މަޑުކޮށްލިއެވެ. ޚައިރާދު ދެއްކި ހުރިހާ ވާހަކައެއް އަޝްހަރަށް އިވުނެވެ. ޚައިރާދުގެ ލޮލުން ފައިބަމުންދިޔަ ކަރުނަތައް ފެނުނެވެ. ގިސްލަމުން ޚައިރާދު އެދެއްކި ވާހަކަތަކުގެ އަޞްލާއި ޙަޤީޤަތް އަޝްހަރަށް ވަކިކުރެވުނެވެ. ހަމައެފަދައިން ، ޚައިރާދުގެ ވާހަކަތައް އަޑުއަހަންއިން އިރު ، ބައްޕަގެ މޫނުމަތިން ފާޅުވަމުންދިޔަ ހިތްދަތި އިޙްސާސްތައްވެސް އަޝްހަރަށް ފެނުނެވެ. ބައްޕައާއި ޚައިރާދުގެ ވާހަކަ ނިމުނުތަނާ ، އަވަސްއަވަހަށް ގެޔާދިމާލަށް އަޝްހަރު ހިނގައިގަތެވެ. އެމީހުންނަށް ނުފެނި ގެޔަށް ވަނުމުގެ ބޭނުމުގައެވެ. ބަޝީރަތު ނުހަނު ލޯތްބާއެކު ، ޚައިރާދުގެ ބޮލުގައި ފިރުމާލައި ، މެޔާލައި ބޮނޑިކޮށްލަމުން ބުރަކަށީގައި ފިރުމާލަމުން ގެންދިޔައެވެ. ބައްޕައެއްގެ ބަފައިވަންތަލޯބި އިޙުސާސް ކުރަމުންނެވެ.
އެ ހަމަހިމޭން މާޙައުލުގައި ، ފަނިފަކުސަ ގޮވާ އަޑުފިޔަވައި އެހެން އަޑެއްނެތެވެ. ޚައިރާދުގެ ހިތުގައި އެތައް ދުވަހަކުއްސުރެ ފުނިޖެހިފައިވާ ވާހަކަތައް ބޭބެގެކުރިމަތީ ހާމަކޮށްލެވުނީތީ ޚައިރާދުގެ ހިތަށް ކޮންމެވެސް ވަރެއްގެ ހަމަޖެހުމެއް ލިބުނެވެ.
(ނުނިމޭ)
Vvv teethi shukuran
Varah reethi