އިންޑިޔާގެ ވެރިރަށް ނިއުދިއްލީގައި ދާދި ފަހުން ހިންދޫންނާ މުސްލިމުންނާ ދެމެދު ހަމަނުޖެހުން ހިނގި ޖަހާންގީރްޕޫރީ އަވަށުގައި ހުރި މުސްލިމުންގެ ފިޙާރަތައް ތަޅާލުމަށް ދިއްލީ ސަރުކާރުން ކުރިއަށް ގެންދާ މަސައްކަތް ހުއްޓާލުމަށް އިންޑިޔާގެ ސުޕްރީމް ކޯޓުން އަމުރުކޮށްފިއެވެ.
ހަމަނުޖެހުމުގައި ބައިވެރިވި މުސްލިމްގެ ފިހާރަތައް ސަރުކާރުން ބިމާ ހަމަކުރަމުން ދާކަމަށް ބުނެ ޖަމްއިއްޔަތު އުލަމާއެ ހިންދްއިން ހުށަހެޅި މައްސަލަައިގައި ޗީފް ޖަސްޓިސް އެން. ވީ ރާމަނާއާއި، ޖަސްޓިސް އެލް ނާގޭސްވަރަ ރާއޯއާއި، ޖަސްޓިސް ބީ އާރް ގަވާއީ ހިމެނިވަޑަައިގަންނަވާ ބެންޗުން ނެރުނު އަމުރުގައި ވަނީ އެ ތަންތަން ހުރި ގޮތަށް ބެހެއްޓުމަށް ސަރުކާރަށް އަންގާފައެވެ.
"އެހެން ގޮތަށް އަމުރުކުރަންދެން.... ހާލަތު އޮތް ގޮތަށް ދަމަހައްޓަން ޖެހޭ." ސުޕްރީމް ކޯޓުގެ އަމުރުގައި ވެއެވެ.
ސުޕްރީމް ކޯޓުން އަމަރު ނެރުނުއިރު ބައެއް ފިހާރަތައް ވަނީ ތަޅާލައި ބިމާ ހަމަކޮށްފައެވެ. އަދި އަމުރެ ނެރުނު ފަހުން ގަޑިއެއްހާ އިރަށް ތަޅާލުމުގެ މަސައްކަތް ކުރިއަށް ގެންގޮސްފައި ވެއެވެ. ތަޅާލި ތަންތަނުގެ ތެރޭގައި މިސްކިތަކަށް ވަންނަ ދޮރޯއްޓާއި މިސްކިތާ ހަމައަށް އަރަން ބޭނުންކުރާ ހަރުފަތްތައް ހިމެނެއެވެ. ފިހާރަތަކުގެ ވެރިން ވަނީ އެތަންތަން ތަޅާލި ފަހުންވެސް ފިހާރަތަކުގައި ހުރި މުދާތައް ނެރެވޭތޯ މަަސައްކަތްކޮށްފައެވެ.
މިސްކިތާ ޖެހިގެން ހުރި ފައްޅިއާ ހަަމަވުމުން، ފިހާރަތައް ތަޅާލަމުން ދިޔަ ބުލްޑޯޒަރުގެ މަސަައްކަތް ވަނީ ހުއްޓާލާފައެވެ. އެހެންކަމުން، އެކަމަކީ ސީދާ މުސްލިމުންނަށް އަމާޒުކޮށްގެން ހިންގާ ކަމެއް ކަމަށް ބުނެ އެ ސަރަހައްދުގައި ތިބި މުސްލިމުން ވަނީ އަޑުއުފުލާފައެެވެ.
"މަގައުމުގައި މުސްލިމުން ދިރިއުޅޭކަށް އެ މީހުން (ހިންދޫންގެ ސަރުކާރުން) ބޭނުމެއް ނުވޭ. އޭއީ ކީއްވެ؟" މުޅި އުމުރު އެ އަވަށުގައި ހޭދަކޮށްފައިވާ އުމުރުން 31 އަހަރުގެ މުސްލިމް އަންހެނަކު އަޑުއުފުލަމުން ބުންޏެވެ.
ބާރަތިޔާ ޖަނަތާ ޕާޓީ (ބީޖޭޕީ) އިން ހިންގާ ނޯތު ޑެލްހީ މުނިސިޕަލް ކޯޕޮރޭޝަންގެ މޭޔަރ ރާޖާ އިގްބާލް ސިންހް ސިފަކުރި ގޮތުގައި އެ ކޯޕޮރޭޝަނުން ތަޅާލަމުން ދަނީ "މަގަށް އެއްބައި ނުކުމެފައި ހުންނަ ގޮތަށް ގާނޫނާ ޚިލާފަށް އިމާރާތްކޮށްފައިހުރި" ފިހާރަތަކެެވެ. އޭނާ އިތުރަށް ބުނި ގޮތުގައި ފިހާރަތައް ތަޅާލުމާ، ފާއިތުވި 10 ވަރަކަށް ދުވަހުގެ ތެރޭގައި ހިނގައި ދިޔަ ހަމަނުޖެހުމާ އެއްވެސް ގުޅުމެއް ނެތެވެ. ތަޅާލާ ފިހާރަަތަކުގެ ތެރޭގައި ހަމަނުޖެހުމުގައި ބައިވެރިވި މުސްލިމުންގެ ފިހާރަތައް ހުރުމަކީ އިއްތިފާގުން ދިމާވި ކަމެކެވެ.
މީގެ އިތުރަށް ބީޖޭޕީގެ ނިއުދިއްލީ ގޮފީގެ ވެރިޔާ ވަނީ ފިހާތައް ތަޅާލުމުގައި އެޅި އަވަސް ފިޔަވަޅަށްޓަކައި" މުނިޕަލް ކޯޕޮރޭޝަނަށް މަރުހަބާ ކިޔާފައެވެ.
ފާއިތުވި ހަފުތާގައި މަދްޔާ ޕްރަދޭޝް ކަރްގޯން އަަވަށުގެ ބީޖޭޕީއަށް ނިސްބަތްވާ މުނިސިޕަލް ކައުންސިލުން ވެސް ވަނީ މުސްލިމުންނާ ދެކޮޅަށް މި ފަދަ އަމަލެއް ހިންގާފައެވެ. އެރަށުގައި މުސްލިމުންނާ ހިންދޫންނާ ދެމެދު ހިނގި ހަމަނުޖެހުމަކަށް ފަހު، ރަށުގެ ވެރިން ވަނީ ފިހާރަތަކާއި ގެތައް ހިމެނޭ 45 އިމާރާތެއް ތަޅާލާފައެވެ. އެއީ މުޅިންވެސް މުސްލިމުންގެ ތަންތަނެވެ.
